Génesis 38
38
Judá judyeyaꞌ Tamar
1Chat muꞌ Judá farajjeyaqui vojity muꞌ, Adulamve qui jịjcaij, Hira jajbuꞌyete muꞌĉan. 2Muꞌĉan Adulamĉan chị́yeꞌ yiris nanas, Súa tịj jenꞌ mọꞌ, Canaánĉan bäꞌyity muꞌ, mọꞌcheꞌ qui vämi muꞌ Judá. Mọꞌtum ĉọshi 3judyeyaꞌ ạvaꞌyiꞌ mọꞌ, Er jịꞌtiꞌaquiꞌ ạvaꞌ muꞌ. 4Quivij ạvaꞌyiꞌ p̂en muꞌ Judásiꞌ, Onán jịꞌtiꞌaquiꞌ ạvaꞌ mọꞌ. 5Quivij ạvaꞌyiꞌ p̂en muꞌ, Sela jịꞌtiꞌaquiꞌ ạvaꞌ mọꞌ. Quezibĉan bäꞌyi in yoquiꞌdyemꞌ naꞌi muꞌ Sela u.
6Aty rijti muꞌ Er, tashchety ạvaꞌ muꞌ, jiꞌvämete Tamarcheꞌ tịj mọꞌ p̂ensiꞌ. 7Muꞌ na Er anic ac̣hiꞌ bäꞌyi Ayoꞌsiꞌyaꞌ vej muꞌ, mọꞌdyes qui muꞌ Ayoꞌ jajiꞌsändyi. 8Chat qui muꞌ Judá jéyaqui yoctyiꞌ ạvaꞌ muꞌ, Onán, päräꞌyity:
—Vämeva vojityvunsiꞌcheꞌ p̂en muꞌ, meꞌ raꞌ jịꞌcätsepte mi vojityvunsiꞌ dyijyedyeꞌ muꞌ, vojityvundyety raꞌ ạvaꞌ mi paj qui muꞌyaꞌ vóshiꞌ muꞌ —yi Judá jéyaqui ạvaꞌ muꞌ.
9Muꞌ na Onán chịj jam raꞌ ĉụiꞌtyidyety shupqui ạvaꞌ muꞌ, muꞌdyety ramꞌ vojityvundyety muꞌ, mọꞌdyes qui muꞌ yocve dyijyi. Ĉụiꞌdye vojityvunsiꞌtum p̂en ĉọshi muꞌ, yi muꞌ paj qui jam ạvaꞌyiꞌ, meꞌtyeꞌ tsanꞌ jam qui namꞌ jiꞌshupqueyeꞌ aꞌĉan mọꞌ.#38:9 Yiꞌ ọij p̂eyacdyeꞌ muꞌ Onán meꞌtyeꞌ tsanꞌ mọꞌ jam qui na camꞌ taĉan jiꞌshupqueyeꞌ fiꞌtyimꞌ. 10Muꞌ na Ayoꞌ jafaquibuti dyijyedyeꞌ Onánsiꞌ, mọꞌdyes qui muꞌ jajiꞌsändyi. 11Chat qui muꞌ Judá jéyaqui jäp muꞌ Tamar:
—Q̂uinꞌ raꞌ jenꞌsiꞌĉan acaꞌ bäꞌbanꞌ mi, yejĉoiꞌ ramꞌ muñes bäꞌyiꞌ mi junꞌ quiꞌ chuc rijti Sela, ạvaꞌ yụ —yi muꞌ jeꞌ.
Yocve dyijyi muꞌ Judá, jam mạꞌjeꞌ jiꞌvämete mọꞌcheꞌ ạvaꞌ muꞌ. "Vatyquej raꞌ muꞌ qui chimeꞌ säñi yojdyemꞌ vojity u muꞌ", yi ĉojtyiꞌĉan. Meꞌdye mọꞌ Tamar jenꞌsiꞌĉan acaꞌ jịjcabanꞌ, mọꞌĉan qui bäꞌbanꞌ.
12Aty men säñiꞌ Judásiꞌ p̂en muꞌ, Súasiꞌ ạvaꞌ muꞌ. Aty yaquintuĉanyaꞌ p̂envun muꞌ, chat qui Timnatve jịjcaij muꞌ, yóyaꞌdyemꞌ täꞌtsacyaꞌ ovecas fin o mọꞌin. Penꞌdyetute muꞌ Hira, Adulamĉantyiꞌ muntyiꞌ. 13Chị́quiꞌ mọꞌ Tamar aty muꞌ muꞌve jịjcaij päpäj mọꞌ Timnatve, yóyaꞌdyemꞌ täꞌtsacyaꞌ ovecas fin o mọꞌin. 14Mọꞌdyes mọꞌ Tamar c̣honaquiꞌ táredyedyety quịꞌsiꞌ mọꞌ, yoctyiꞌĉan qui cäbunꞌ, judyeyaꞌ busjitiꞌ vejyaꞌ paj qui jam chäꞌteiꞌ mọꞌ, chimeꞌdye paj qui jam chị́yeꞌve. Chịmoꞌvedye jịjcaiꞌ mọꞌyaꞌ bäꞌyiꞌ sisdyeꞌyaꞌ bäꞌyedyes Enaim, mọꞌ majmiyas bäꞌyedyeꞌ Timnatve jịjcaiꞌsiꞌ, jeñej meꞌtaqui p̂en meꞌ yuꞌtiꞌ. Meꞌ buꞌyiꞌ dyijyedyeꞌ mọꞌ Tamarsiꞌ, ĉaĉaij na chịꞌ mọꞌ aty rijti muꞌ Sela mijam qui namꞌ mạꞌjeꞌ jiꞌvämete mọꞌcheꞌ in.
15Judá dạquiqueꞌ jeñej meꞌtaquis p̂en ĉọiꞌ muꞌ, ĉaĉaij na bus buꞌyiꞌ vejyaꞌ jam chäꞌteiꞌ. 16Jeijmuñi mọꞌ majmi ĉọ́queꞌ mọꞌ, jam muꞌ chịj mọꞌ na jiquej ĉụiꞌsiꞌ jäp muꞌ. Jeꞌ muꞌ:
—Mạꞌjeꞌ yụ mítum ĉọshi.
Vorjete mọꞌ:
—¿Jedyeꞌ bu raꞌ soꞌmitim?
17—Yụ raꞌ juteyeye yirity banꞌtyity chivo yụ —jeꞌ muꞌ.
Mọꞌ qui vorjete:
—Jụdyej, jemoñeꞌ soꞌmitiꞌ chum tashcheꞌ mi jịꞌĉocdyes —jéte.
18Vorjeꞌ muꞌ:
—¿Jedyeꞌ bu raꞌ soꞌmeye?
Vorjete Tamar:
—Soꞌmitiꞌ cac̣htacdyeꞌ mi väc buꞌyedyetytum judyeyaꞌ mutyudyeꞌ unĉansiꞌ mi säräꞌsis mi.
Meꞌdye muꞌ soꞌmeꞌ räj chat qui q̂uinꞌdyemꞌ mọꞌtum ĉọshi judyeyaꞌ ạvaꞌyeꞌ. 19Chat qui jọbanꞌ mọꞌ Tamar, acatubanꞌ, meij jéyaĉanꞌ vejyaty quịꞌsimꞌ, cuvij chimuꞌĉan táredyedyetyĉan quịꞌsiꞌ cäbunꞌ.
20Judá juteyebanꞌ tsanꞌ chivo mọꞌ meꞌtaquis p̂en, penꞌdyeꞌyaꞌ muꞌ, Adulamve bäꞌyity, muꞌ cạyeꞌ paj qui soꞌmebajte mọꞌ cac̣htacdyeꞌ mutyudyeꞌtumdye, jam qui namꞌ dạquiqueꞌ mọꞌyaꞌ. 21Jéyacsi muꞌ muꞌĉan bäꞌyity in:
—¿Junaꞌ mọꞌ Enaimĉansiꞌ meꞌtaquis p̂en o, mọꞌ majmiyaꞌ bäꞌyis jiquej?
Vorjete in:
—Itŝiꞌ toꞌ caꞌ méquis ọ́yaꞌ meꞌtaquis in.
22Chat qui caꞌñibun Judáyaꞌ jịjcaban, jébajte:
—Itŝiꞌ méquis dạquiqueꞌ yụ mọꞌ p̂en. Chimeꞌdye muꞌĉan bäꞌyity in jin yụ in, "Itŝiꞌ méquis meꞌtaquis p̂en ọ́yaꞌ", yi muꞌyaty in jin yụ in.
23Vorjete Judá:
—Paj mọꞌyaꞌ yụ́siꞌ jedyeꞌ, areꞌĉa dyisacsinꞌ muntyiꞌ in. A na tsanꞌ yụ juteyeyeꞌ chivo, jam qui namꞌ dạquiquem mọꞌyaꞌ.
24Aty chibin ịvaj atsvun meꞌ buꞌyiꞌ, q̂uinꞌdyemꞌ jịꞌchiqueyete in muꞌ Judá:
—Jäp mi mọꞌ Tamar, anic där juchaiꞌ mọꞌ ĉaĉaij na meꞌtaquiꞌ jụꞌñitytum ĉụiꞌ sonꞌ, chäjämꞌdye jạjtsiꞌ.
Judá qui jéyacsi:
—Jäcvac judyeyaꞌ jiꞌcoꞌshayevac tŝijĉan.
25Aty mọꞌ tuiꞌ in, mọꞌ qui juteyete p̂eyacdyeꞌ päpädyes mọꞌ, yiꞌ mọꞌ:
—Muꞌ meꞌchuiꞌtyiꞌ ọij jedyeꞌ, muꞌdye nash ạvaꞌyin yụ. Jämꞌ cạvevaꞌ ọij cac̣htacdyeꞌ väc buꞌyistumsiꞌ judyeyaꞌ mutyudyeꞌ chimeꞌ, ¿tyis caꞌ ọij? —yiꞌ mọꞌ jéte.
26Jam jaijve Judá chị́yaqui ĉaĉaij na ĉụiꞌsiꞌdyemꞌ, mọꞌdyes yi muꞌ:
—Yụ́siꞌ na juchaj mọjoꞌchas, ọyaꞌyaꞌ mọꞌsimꞌ, ĉaĉaij na yụ jam jịꞌcätseꞌ p̂eyacdyeꞌ yụ soꞌmes jiquej yụ, jam jiꞌvämete yụ mọꞌcheꞌ muꞌ Sela, ạvaꞌ yụ —yi muꞌ Judá.
Meꞌquiꞌdye Tamartum ĉọshi muꞌ Judá.
27Aty basdyiꞌyaꞌ mọꞌ Tamar epoj na ạvamꞌ. 28Aty raꞌ tsanꞌ naꞌi yirity, aty tsanꞌ shupquiꞌ un muꞌ. Chat mọꞌ jiꞌbasacsis sapbite jäijnätyyaꞌ búmaꞌ un muꞌ. Yiꞌ mọꞌ: "Uts nash tashi naꞌity." 29Cuvij chimuꞌĉan sisanꞌ un muꞌ, muꞌ na taĉantyiꞌ vojity muꞌ, muꞌ chum qui naꞌi. Mọꞌdyes mọꞌ jiꞌbasacsis tịj yụꞌtyeyete, Fares, ĉaĉaij na yiꞌ: "Anic verꞌjem cạiꞌ mi". 30Muꞌ qui saptactyiꞌ unyaꞌ jäquiꞌve quimꞌ naꞌi. Zara yụꞌtyeyete tịj in.
Terpilih Sekarang Ini:
Génesis 38: CAS
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Copyright 2017 Nuevo Testamento en Chimane
Jen'si' P̂eyacdye'