मरकुस 8
8
यीशु को चार हजार लुखुं तैं खांणु खिलांण
(मत्ती 15:32-39)
1एक दिन जब यीशु ल दिकापुलिस जै कु मतलब च दस शहर ऊख छो तब लोग वेमा ऐनी अर वेमा जमा हवे गैनी, अर ऊंमा कुछ खांण कु नि छो त वेल चेलों तैं अफ मा बुलै के ऊंमा बोलि 2“मि तैं ईं भीड़ पर दया औंणि च किलैकि यु लोग तीन दिन बट्टी बराबर मि दगड़ी छिन अर अब ऊंमा खांण कु भि कुछ नि च। 3जु मि ऊं तैं भुखी ऊंका घौर भेजि दयुलु त बट्टा मा थकि के उखि रै जाला किलैकि यूं मा बट्टी कुई-कुई त भौत दूर बट्टी अयां छिन।” 4यीशु का चेलों ल वे तैं जवाब दींनि कुई भि इख सुनसान जंगल मा सब लुखुं कु रुट्टि कख बट्टी लौ कि उ तृप्त हवे जौनु? 5यीशु ल ऊंमा पूछि, तुम मा कथग रुट्टि छिन ऊंल बोलि “सात।” 6फिर वेल लुखुं तैं धरती पर भुय्यां बैठणैं कि आज्ञा दींनि अर उ बैठ गैनी यांका बाद ऊं तैं सात रुट्टियुं तैं अपड़ा हथ मा ले के परमेश्वर कु धन्यवाद कैरी कै रुट्टि तोड़ी के टुकड़ा वेल अपड़ा चेलों तैं दींनि अर ऊं लुखुं का अगनैं परोसि दींनि। 7ऊंमा थोड़ा सी छुटा माछा भि छा तब यीशु ल परमेश्वर कु धन्यवाद कैरी कै रुठी अपड़ा चेलों तैं दींनि अर बोलि, यूं तैं लुखुं तैं बांटि द्या। 8तब सभि लोग खै के तृप्त हवे गैनी अर चेलों ल फिर बाद मा बचयां रुटियों का टुकड़ों का सात ठुपरा कठ्ठा करिनी। 9अर लोग चार हजार का लगभग छा तब यीशु ल ऊं तैं विदा कैरी फिर उ अर वेका चेला नाव पर चलि गै 10यीशु तुरंत अपड़ा चेलों का दगड़ी नाव मा चढ़ी के दलमनूता जिला मा चलि गै।
फरीसियों को स्वर्गीय चिन्हों की माँग
(मत्ती 16:1-4)
11फिर फरीसी वे दगड़ी बहस कन लगि गैनी अर वेमा सामर्थ का काम का चमत्कार कनु कु बोलि, अपड़ा अधिकार तैं साबित कनु कु हम तैं कुई स्वर्गीय चिन्ह देखो, किलैकि उ वे तैं फंसाण चांदा छा। 12यीशु ल ऊंका अविश्वास का कारण निराश हवे के बोलि “यु बगत का लोग चमत्कार का काम का चिन्ह किलै खुज्योंदींनि? मि तुम मा सच बुल्णु छौं कि यु बगत का लुखुं तैं कुई चिन्ह नि दिये जालो।” 13फिर वेल फरीसियों तैं छोड़ी के अपड़ा चेलों दगड़ी नाव पर चढ़ी के गलील झील का पल्या छाला पर चलि गै।
फरीसियों अर हेरोदेस कु खमीर
(मत्ती 16:5-12)
14यीशु का चेला और रुट्टि लिजांण बिसरी गै छा अर नाव मा ऊंमा एक ही रुट्टि छै अर वीं रुट्टि का अलावा ऊंमा कुछ नि छो। 15यीशु ल ऊं तैं चितै “देखा तुम फरीसियों का खमीर से अर राजा हेरोदेस का खमीर से सचेत रावा।” 16उ आपस मा विचार कैरी कै बुल्ण लगि गैनी “वेल यु इलै बोलि, किलैकि हम मा रुट्टि नि च।” 17यु जांणि के यीशु ल ऊंमा बोलि, “तुम आपस मा किलै यु विचार कना छा कि हम मा रुट्टि नि च? क्य तुम ल अपड़ा जिकुड़ा ढीट कैरेली की तुम अब तक नि समझ सक्यां?” 18क्य तुमारा आँखा अंधा अर कंदूड़ बैहरा छिनी? क्य तुम तैं कुछ भि याद नि च। 19जब मिल पाँच हजार लुखुं कु पाँच रुट्टि तोड़ी छै त तुम ल टुकड़ों का कथग ठुपरा कठ्ठा करिनी? चेलों ल यीशु मा बोलि कि, “बारह ठुपरा।” 20अर जब चार हजार लुखुं कु सात रुट्टि छै त तुम ल टुकड़ो का कथग ठुपरा भोरिके उठै छा ऊंल यीशु मा बोलि सात ठुपरा। 21तब यीशु ल ऊंमा बोलि, कि तुम अभि तक भि नि समझयां कि मि कु छो?
बैतसैदा मा अंधा तैं ठिक कन
22तब यीशु अर वेका चेला बैतसैदा नगर मा ऐ अर लोग एक अंधा आदिम तैं वेमा लैंनि अर वे बट्टी बिनती कैरी कि वे आदिम तैं छवे के ठिक कैरी दे। 23यीशु वे अंधा आदिम का हथ पकड़ी के गौं का भैर लीगि अर वेका आँखों पर थूकी अर हथ रखिनि अर वेमा पूछि क्य तु कुछ दिखणी छै? 24वेल आंखा उठै के बोलि, “मि मनिख्युं तैं देख सकदु छौं उ मि तैं जन कि डालो हिटणा होला उन दिखेंणा छिन।” 25तब यीशु ल दुबारा वेका आँखों पर हथ रखिनि अर अंधा ल ध्यान से देखि कि उ खूब हवे गै अर सब कुछ साफ-साफ दिखण लगि गै। 26यांका बाद यीशु ल वे तैं यु बोलि, कि अपड़ा घौर चलि जा अर “गौं का लुखुं तैं कुछ भि नि बतै।”
पतरस को यीशु तैं मसीह मनणु
(मत्ती 16:13-20; लूका 9:18-21)
27यीशु अर वेका चेला बैतसैदा शहर तैं छोड़ी के कैसरिया फिलिप्पी नगर का नजीक गौं मा चलि गैनी, बट्टा मा ऊंल अपड़ा चेलों मा पूछि, कि लोग मि कु क्य बुल्दींनि कि मि कु छो? 28चेलों ल जवाब दींनि, कुछ लोग बुल्दा “तु यूहन्ना बपतिस्मा दींण वलो पर कुई-कुई सुचदींनि कि एलिय्याह परमेश्वर का तरपां बट्टी बुल्दो छो अर कुई-कुई पुणा जु परमेश्वर का तरपां बट्टी बुल्ण वला मा बट्टी कुई एक भि बुल्दींनि।” 29फिर यीशु ल ऊंमा पूछि, कि तुम मेरा बारा मा कि सुचदियां की मि कु छो, पतरस ल वे तैं जवाब दींनि, “तू परमेश्वर कु भिज्युं मसीह छै।” 30तब यीशु ल ऊं तैं चितै के बोलि, कि मेरा बारा मा यु कै मा नि बुल्यां की मि मसीह छो।
यीशु को अपड़ी मौत का बारा मा बतांण
(मत्ती 16:21-28; लूका 9:22-27)
31तब यीशु अपड़ा चेलों तैं सिखौंण लगि गै, “कि मि मनिख का नौंनो तैं जरूरी च कि उ भौत दुःख उठौ अर लुखुं का दाना-सयाणों अर प्रधान याजक अर मूसा की व्यवस्था तैं सिखांण वलो वे तैं तुच्छ जांणि के मारि दयूंनु अर उ तीन दिन का बाद मौत से फिर ज्यूँदो हवे जालो।” 32यीशु ल या बात अपड़ा चेलों मा साफ-साफ बोलि दींनि ईं बात पर पतरस वे तैं अलग मा लिजै के झिड़कंण लगि गै 33पर यीशु ल पिछनै फरिकी के अपड़ा चेलों जनै देखि अर पतरस तैं झिड़की के बोलि, “हे शैतान मेरा संमणी बट्टी दूर हवे जा किलैकि तु परमेश्वर का तरपां बट्टी नि सुचणी बल्कि मनिख्युं कि तरपां बट्टी सुचणी छै।”
चेला बनण कु मतलब
34वेल भीड़ तैं अपड़ा चेलों का समेत अपड़ा संमणी बुलै के ऊंमा बोलि “जु कुई मेरा पिछनैं आंण चौ उ अपड़ी इच्छाओं तैं छोड़ी के अर अपड़ो सूली उठै के मेरा पिछनैं हवे जौं। 35किलैकि जु कुई अपड़ो जीवन बचौण चौ त उ वे तैं गवांलू पर जु कुई मेरा बाना अर शुभ सन्देश का बाना अपड़ा आत्मा तैं गवांलू उ अनन्त जीवन तैं पालो। 36ऊं कु कुई कीमत नि च जु मनिख सैरा दुनिया तैं पै ल्यो अर अपड़ा प्राण अर आत्मा तैं ख्वे द्यो। 37क्य यु हवे सकद की मनिख अनन्त जीवन पांणु कु कुछ दे साको उ अपड़ा आत्मा का बदला क्य दे सकद? 38जु कुई यु व्यभिचारी अर पापी जाति का बीच मा मि अर मेरी बातों सै शर्मालो मि मनिख कु नौंनो भि जब उ पवित्र स्वर्गदूत का दगड़ा मा अपड़ा बुबा बड़ी महिमा का प्रकाश मा आलो त तब उ भि ऊंको इन्कार कैरी दयालो।”
Terpilih Sekarang Ini:
मरकुस 8: GHMNT
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
