2 कुरन्थीयो 11
11
पोलुस अर झूठ म बण्या बेठ्या भेजेड़ा चेला
1म चाऊँ हूँ क जद म बावळापुणा करूं जणा थे बिनै दया कर सेल्यो। 2क्युं क जंय्यां परमेसर थारी चिंत्या करै ह बंय्यांई म बी थारी चिंत्या करूं हूँ अर थे पबितर कुंआरी छोरी की जंय्यां हो जिकी सगाई म मसी क सागै करबा को करार कर दिओ हूँ। 3पण मनै डर ह क्युं क कदै अंय्यां नइ होज्या क जंय्यां हवानै जखी धरती की सऊँ पेली नारी ही बिनै साँप चतराईऊँ भंगरा दिओ हो, बंय्यांई थारा हियानै नइ भंगरा दे जिमै मसी ताँई थारी खरी भगती अर ईमानदारी ह। 4म्हें जि ईसु क बारां म थानै बताया हा अर जखी पबितर आत्मा थानै मिली अर जखो चोखो समचार थे मान्या बिकै अलावा ज थे कोई मिनखनै दुसरा ईसु क बारां म बोलबा द्यो जणा इको मतबल ओई ह क थे ओरई ईसुनै, ओरई चोखा समचारनै अर ओरई आत्मानै मानबा अर लेबा ताँई राजी हो। 5पण म खुदनै बा मिनखाऊँ छोटो कोनी जाणू जखा खुदनै थारा भेजेड़ा चेला बतावीं हीं। 6म बोलबा म अनाड़ी हो सकूँ हूँ, पण म ज्ञान म कम कोनी। सगळी बाता म म्हें थानै आ साप-साप खेता आर्या हां। 7के म खुदनै छोटो कर थानै उपर उठाबानै सितमित म परमेसर को चोखो समचार सुणार कोई पाप कर दिओ? 8के थे खे सको हो, थारी सेवा करबा ताँई दुसरी बिस्वासी मंडळ्याऊँ जखी मदद भेजी गई ही बानै लेर म बानै लूट्यो? 9#फलि 4:15–18अर जद म थारै कनै हो जणा मनै कमी-घटी होई ही पण बि टेम बी म थार प कोई बोज कोनी गेर्यो। क्युं क मकीदुनियाऊँ मेरा बिस्वासी भाईड़ा आर मेरी सगळी जुर्ता पूरी करी। अर म हर बर खुदनै थार प बोज बणबाऊँ रोक्यो, अर आगै बी रोकस्युं। 10अर ज मसी की सचाई मेरै मांयनै ह जणा अखाया दिसावर म कोईबी इ बात बेई मनै गुमान करबाऊँ कोनी रोक सकै। 11अर मेरा खेबा को ओ मतबल थोड़ी ह क म थारूँ परेम कोनी करूं? परमेसर इ बातनै जाणै ह क म थारूँ परेम करूं हूँ। 12इ ताँई जोक्यु म करूं हूँ बिनै करतो रेहस्युं, जिऊँ जखा खुदनै थारा भेजेड़ा खास चेला बतावीं हीं बानै म्हारी जंय्यां बाका काम प गुमान करबा को मोको नइ मिलै जखी बात ताँई बे गुमान करीं हीं। 13क्युं क अंय्यां का मिनख झूठ मई भेजेड़ा चेला बण्या बेठ्या हीं अर धोकाऊँ काम करीं हीं, अर मसी का भेजेड़ा चेला जंय्यां को भेस बणावीं हीं। 14आ ताजूब की बात कोनी ह क्युं क सेतान बी चमकबाळा ईस्बर नगरी दुता को रूप धारण कर सकै ह। 15इ ताँई आ कोई ताजूब की बात कोनी ह क बिका दास धरम का काम करबाळा मिनखा जंय्यां को भेस बणावै ह। पण आखीर म बाको नास बाकै काम गेल होसी।
मसी क चलतै पोलुस को दुख भोगबो
16म ओज्यु खेऊँ हूँ, कोई मनै बावळो नइ जाणै। अर ज अंय्यां ह जणा मनै बावळो समजई मनै सेल्यो, जिऊँ म थोड़ो भोत गुमान ओर कर सकूँ। 17थे अंय्यांई मानल्यो क, म जखो गुमान करूं हूँ बो परबु क कानिऊँ कोनी ह पण बो मेरो बावळोपुणोई ह। 18क्युं क बोळा हीं जखा काया-माया को गुमान करीं हीं, जणा म बी गुमान करस्युं। 19थे स्याणा हो इ ताँई राजी-राजी बावळा की बाता सेल्यो। 20मनै बिस्वास कोनी होर्यो, जद थानै कोई दास बणाले, थारो बुरो चावै, ज कोई थानै धोको दे, अर खुदनै थारूँ बडो बणावै अर कोई थारै मुंडा प थपड़ मारै जणा थे बिनै राजी-राजी सेल्यो हो। 21के म सरमिंदा होर खेऊँ हूँ म्हें बाकी जंय्यां थारै सागै सलुक करबा म बोळा कमजोर हां?
पण ज कोई ख्याताई बी गुमान करबा की हिमत कर सकै ह जणा म बावळापुणाऊँई खेऊँ हूँ क म बी हिमत करस्युं। 22बे इबरानी हीं, जणा म बी तो इबरानी हूँ। बे इजरायल का हीं, जणा म बी तो इजरायल को हूँ। बाकी जड़ अब्राहम ह, जणा मेरी जड़ बी तो अब्राहमई ह। 23#काम 16:23बे मसी का दास हीं जणा म बावळा की जंय्यां खेऊँ हूँ, म बाऊँ बी बढर मसी को दास हूँ। म बाऊँ बेत्ती मेनत करी ह, बार-बार केद म गयो हूँ, अर बोळीबर कोड़ा खाया, बार-बार मोत को सामनो कर्यो हूँ। 24पाच बार म यहूदिआ क हाता उणचाळिस-उणचाळिस कोड़ा खाया। 25#काम 16:22; काम 14:19तीन बर तो म बेत खाई अर एकर तो मेरै उपर भाठा की बोछाड़ करी गई; अर तीन बर तो जखा झाजा म चढ्यो बे टूटगा; एकर तो म एक रात अर एक दिन समदर क मांयनै रिह्यो। 26#काम 9:23; काम 14:5म बोळीबर लामो-लामो सफर कर्यो, कई बर तो म उफणती नद्या को तो कदै डाकूआ का खतरा को सामनो कर्यो। खुदका मिनखाऊँ खतरा को सामनो कर्यो अर गैर-यहूदि मिनखाऊँ बी खतरा को सामनो कर्यो। नगर्या म, उजाड़ म, अर समदर म मनै तो खतरोई मिल्यो। अर बा मिनखाऊँ बी जखा खुदनै बिस्वासी बतावीं हीं बाऊँ बी मनै तो खतरोई मिल्यो। 27पिड़ा अर बोळी मेनत करबा क पाछै बी बार-बार भूखो तिसायो रिह्यो जिऊँ म सोयो बी कोनी। अर बोळी बार तो दावा म बिना गाबा क धुजतो रिह्यो। 28अर इकै अलावा मेरै उपर सगळी बिस्वासी मंडळ्या की चिंत्या को बोज बी रोजकी रिह्यो। 29जद कोई कमजोर ह तो म बी खुदनै कमजोर म्हेसुस करूं हूँ, अर ज कोई पाप म पड़्यो ह जणा मनै दुख होवै ह।
30ज मनै गुमान करबोई ह जणा म मेरी कमजोरी पई करस्युं। 31परमेसर जखो आपणा परबु ईसु को परम-पिता ह, जिकी सदाई जे होती रेह्वै ह, बो जाणै ह क म झूठ कोनी बोलुँ। 32#काम 9:23–25जद म दमिसक नगरी हो बि टेम का अरितास राजा को राजपाल बि नगरी क दरूजा प मनै पकड़बा ताँई पेरो बिठा राख्यो हो। 33पण मनै छाबड़ी म बिठार नगरी की भीत का जंगला क मांयनैऊँ बारनै भेज्यो गयो, अंय्यां म बिकै हाताऊँ बच निकळ्यो।
Terpilih Sekarang Ini:
2 कुरन्थीयो 11: एस डब्लु वी
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
(c) 2010-2017, New Life Computer Institute. All rights reserved