Genese 3
3
1Hakwila kapela diyi wadiŋi wasweja kubabala hadi anyama lamumpata ejima eliliyi Yehova. Yena hakumwihula mumbanda, nindi, Chalala Nzambi nahoshi nindi, Nyitondu yejima yemwitempa bayi mwakayi dyaku, tahindi? 2Mumbanda hakumwila kapela, nindi, Nyikabu yanyitondu yamwitempa tukutwesha kudya tuhu, 3hakwinza nyikabu yamutondu wekala mukachi ketempa, Nzambi nahoshi nindi, Bayi mwakayi dyaku, hela kukwataku nehi, mwakenda kafwa. 4Kapela hakumwila mumbanda, nindi, Chalala, himwakafwaku; 5muŋa Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama. 6Mumbanda chamweniyi mutondu wunawahi wakudya, kuwutala wakutiyisha kuwaha, mutondu owu wunawahi dehi wakuheta nachu maana, hakukumunaku ninyikabu, hakudya, yomwinkaku ninfumwindi adiŋiyi nindi, niyena hakudya. 7Mesu awu mwayedi wawu atona nikutona, eluka nikwiluka nawu tudinzekesi; hiya kuchima mafu achikuyu, atuŋi yuma yakuvwala.
8Chida wundili itaŋwa, atiyili izu daYehova Nzambi, owu wukwenda mwitempa owu, iyala namumbanda hiya kubatama kumesu aYehova Nzambi mukachi kanyitondu yamwitempa. 9Yehova Nzambi haku mutambika iyala, nindi, Wudi kudihi? 10Kutiya yena nindi, Natiyi izu deyi mwitempa, natiyi woma, muŋa nidi nzekesi, nibatama nikubatama. 11Nzambi nindi, Indi wakulejeli nindi wudi nzekesi hinyi? Wadya dehi mutondu wunakulekesheli nami bayi wakadyaku, tahindi? 12Kuchinka iyalanindi, Mumbanda wanyinkeli kushakama nindi diyi wanyinkahu wenamutondu owu, hinukudya.
13Yehova Nzambi hakumwila mumbanda, nindi, Ichichuma chiwunelihi chumanyi? Mumbanda nindi, Kapela diyi wandimba dichi nadya.
14Yehova Nzambi hakumwila kapela, nindi, Chiwuneli chumichi, mukachi kawayi muna ejima, nimukachi kawanyama amumpata ejima, eyi anakushiŋi tu-u; wakendela mwivumu deyi, Wakadyaŋa lunkuŋu mafuku ejima wuchidi mumi. 15Nukusha nkunyi mukachi keyeyi namumbanda, nimukachi kawanyaneyi nawanyanindi; akakuchika kunamutu, nineyi wakamuchika kukatutu. 16Hakumwila mumbanda, nindi, Nakakuvuli shilanankashi yihuŋu yiwakamona, nikuba aba kuwakaba abaŋa mavumu eyi; wakavwalapa anyana nakukabakana hohu; wakata muchima hadi nfumweyi, diyi wakela mwanta weyi.
17Hakumwila Adama, nindi, Chiwunatiyi mwizu daŋodeyi nakudya mutondu wunakulekesheli nami bayi wuwidyaku, iseki anadishipili dehini hamujimba weyi; mafuku ejima wuchidi wamumi wakadyaŋa chaku kabakanahohu; 18daka kusoŋe laŋa ninyipa ninyi sonsonyi; wakadya ŋayisakola yamumaha; 19kudya yakudya chiŋa wunasulwili kumesu eyi, nichiwamba kafunta cheŋi mumaseki; muŋa dihu hakufumi shiluwu; muloŋa eyi wulunkuŋu, nochu wakafunta cheŋi mwomulunkuŋu.
20Iyala wanamutumbili ipodindi ijina dindi, nindi, Evu, muloŋa diyimama yawakwakuhanda ejima. 21Yehova Nzambi wayitupilili Adama na ŋodindi yi kovwelu yayitembi, hakuyivwika.
22Yehova Nzambi welili nindi, iyala neli neyi chitwekaletu, weluka dehi nikuwaha nikutama; wakenza kolola chikasa chindi, atambuli mutondu wawumi, adiyi, ahandi haya nyaka. 23Dichi Yehova Nzambi wamwilili nindi, Fumaku mwitempa daEdeni wakadimi heseki hakufumishiluwu. 24Nochu wamute mwinumu iyala. Kwitempa daEdeni, mbadi yadu yamusela, hakwimikaku akerubi nimulaŋu wakesi wampoku yakabali wenda wubalumuka niniku niniku, kulonda kuhembaŋa njila yamutondu wawumi.
Terpilih Sekarang Ini:
Genese 3: MW62
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
The Bible in Lunda: Ndembu (Lunda of Kalunda) © B. F. B. S. 1962.