Isaya 42
42
U mwitumami wo Muwaha Mulungu
1Muwaha Mulungu yakutya,
“Lanjenyi ta u mwitumami wangu
mono nghumusikamya,
yo yuyo mono namuhagula, kanyhi
mono nghwendezwa nayo.
Nakondya kumumemya muhe wangu,
nayo kowaletela makungugo gose wiling'ano.
2Nayo si kozoza hamba kwinula lizi lyakwe,
hamba kulalika cinji co cose mu zinzila.
3Hamba si kolibena yaye, lidete-lulenga,
hamba si kocizimya yaye cikoloboyi
cono cikufwifwiza.
Langa mwene kowaletela ling'ani wanhu wose.
4Nayo hamba si kotukuwika mutima hamba kukatala yaye,
langa mwene koleta ling'ani kono'nze.
Ne zi'si zose zolindila mejizo gakwe.”
5Mulungu yawumba wulanga, yakawa kuwutandaza,
yakawa kuyisikamya yinze na vyose vyono vili mumo.
Nayo yo kawapelaga wehele wanhu wose.
Ninga aluno Muwaha Mulungu yakumulonjela
mwitumami wakwe yakutya,
6“Ane yo nene Muwaha Mulungu mono nakucema,
nghakupela no wusume ho wusume
kuyiwona ling'ani yikunozwa kono'nze.
Nane nonozeza muli gwegwe cilagane cangu
ne wanhu wangu wose.
Na muli gwegwe,
mo nowuletela wuzelu wubulile muli makungugo.
7Nagwe kowanuguza meso i wabofu,
kanyhi kowawopolela wose
wono wekaye mu wutitu mu jela.”
8“Ane nili wene du,
yo nene Muwaha Mulungu u Mulungu wako.
Hasina kanyhi hamba mulungu yunji wo wose
mono kosuma kuhanga nane mu lukumyo lwangu,
hamba si noyikombolela lukulu milungu
yihanje lilumbo na nene.
9Ne zinghani zono nazilonga katali,
alu mbeka zakondya kwijela.
Ninga aluno nomulonjelenyi ze nghani mhya,
hamba ziwe zikali si nanza kwijela.”
Lwimbo lo lukumyo
10Mwimbilenyi Muwaha Mulungu lwimbo lupya,
mwimbe zo lukumyo lwakwe nye nyo yinze yose!
Nanye mono mukujendela mwi'lenga,
mukumyenyi Muwaha Mulungu!
Nanye nyo zi'si zo kutali mwimbilenyi Muwaha Mulungu.
11Vilecenyi nyika hamonga ne vikaya vyayo,
vyose vimukumye Mulungu.
I wanhu wono wekaye ku Kedali,
walecenyi wose wamukumye Mwene.
Nawo wono wekaye mwi'kaya lya Sela,
wembe ne nyemo mu wulawa mu matunda!
12Nawo wono wekaye mu zi'si zo kutali
wamupele Muwaha Mulungu lilumbo no lukumyo.
13Muwaha Mulungu kabitaga mu milewo yenha citung'ati.
Mwene yewikanizize lukulu,
kanyhi muhidimbazi ku milewo,
katowaga ndulele yo wulugu,
kalajilaga wusume kuli walugu wakwe.
Mulungu yakwihuwiza nha vyono kowapela wutazi wanhu wakwe
14Mulungu yakutya,
“Ane nali nyamaye du vilo vinji.
Hamba kuwapitula wanhu wangu.
Ninga luno cipango co witume cakondya kufika.
Holeka aluno nolila nho mucekulu mono
yali mu nghunga yo lusawo.
15Nane nogongomeza matunda ne vigongo,
noganyaza mahanze hamonga ne mabici.
Nonyaza makolongo ga mu malolo, gawe nyika
nonyaza hamonga ne malamba ge malenga.”
16“Nane nowatonga wanhu wangu wono wali cibofu,
wakole mu nzila yono wakali nayikola
hamba mwizuwa linji.
Nowunoza wutitu wawo, wuwe wuzelu,
ne hanhu hono hali sasala-sasala hawe hatelemeye.
Nawo wuwu wo wihuwizo wangu,
nowebatiliza ho walece kukatala.
17Na wose wono wetumbiye vihwani viseswe,
na wose wono wakuvitya vihwani vyenjedulwe
yo milungu yawo,
wawo wose wonyetywa no kukozwa cevu.”
Wulemwe we Waisilayeli ku wutanje
18Muwaha Mulungu yakutya,
“Ale hulicizenyi ta anye nyo wanhu we ciziwi!
Mulanjile behi' nye nyo wabofu ho muwone!
19Mwene howa hoyuli yunji mono yali cibofu yawucizize
wubofu wo mwitumami wangu,
hamba mono yali ciziwi yamucizize mwitumami
wangu mono namutuma?
20Alu nanye Isilayeli, nha mwakondya kuziwona
nghani nyinji muno,
ninga wulenyi, zina cambuzici kuli'nye?
Kanyhi mwina ne makutu go kuhulicila,
ninga hamba si mukuzitanga yaye.”
21U Muwaha Mulungu, yo Mulungu mono kezaga
no wuhile wo kuponya,
holeka yendile kuwukumya wulajilize wakwe
hamonga ne mafundo gakwe
kanyhi yendile ne wanhu wakwe wagakamise.
22Ninga alu wanhu wakwe nha wakondya kutekwa,
wadindiywe mu zijela, waweza wafungwa.
Hambi nha wakondya kuhizwa no kutekwa,
na hasina hamba yunji mono kokuza yawaponye.
23Alu, wulenyi! Nani wa muli nyenye
mono yakuzihulika zono nghulonga?
Ninga wulenyi! Mozihulika no kuzibata?
24Mwene nani mono yawalavya Isilayeli ho watekwe?
Yo mweneco Muwaha Mulungu mono sese camusutizya,
Hambi nha cekalaga mu mikalile yono
si yamwendezaga mwene,
hamba kwibata mejizo gakwe gono yacijiza.
25Holeka nayo yacijidila wukali we likuwo lyakwe,
no wusungu we milewo.
Ne likuwo lyakwe,
likawakolelwa Isilayeli nha moto mukali
ninga 'se hamba kumanya zono zacijelelaga yaye,
hamba kumanya co cose muli zizo.
Cigogo Bible © Bible Society of Tanzania, 2002.