HLIMI 1
1
Nyɛʔɛlɛ li dá hɛɛn hanri ní yrɛbɛ pì bɛfu ní
1Ki hlinyiŋi na, Nyɛʔɛlɛ li dá namuru ní tra hanri de.
2Tra ti dá bo nɛ pa waʔafe kpangbanŋa nyɛ we. Wɔ̀mo à mi po wa nyugbɔmo yugu na. Nyɛʔɛlɛ li Nyili à li na lɛŋɛ wa nyumu mi yugu na ge. 3Ki nyiŋi na, Nyɛʔɛlɛ à liʔi yo mà yo: «Paʔama mi hanri.» Paʔama à mi hanri. 4Nyɛʔɛlɛ à liʔi nya paʔama mí nyɛ kmama. À li paʔama ní wɔmo kon mi na.#1:3-4 ma wèle wa 2Kor 4:6 ni wè.
5Ki nyiŋi na, Nyɛʔɛlɛ à li na paʔama yeri me kpɛnmɛ na wɔmo yeri me yebliʔi. Yaa àʔa kɔ. Ki kruʔu ma, kpɛnmɛ à mi to. Àʔa po wlɛgblɛʔɛ kiì gi.
6Nyɛʔɛlɛ à li yo nɛ: «Kí ma yala kpafoʔo bí hanri ki nyumu kon mì na syɛn.» 7Nyɛʔɛlɛ li dá kpafoʔo hanri mà namuru nyumu ní noʔoma womo kon me mì na. Ki woʔo àʔa hanri ban. 8Nyɛʔɛlɛ à li na ki kpafoʔo yeri nyɛʔɛlɛ. Yaa àʔa kɔ. Ki kruʔu ma, kpɛnmɛ à mi to. Àʔa po wlɛʔɛ syɛnwoʔo kiì gi.#1:6-8 ma wèle wa 2Pyɛ 3:5 ni wè.
9Nyɛʔɛlɛ à li yo nɛ: «Nyumu ma mí nyɛ wa nyɛʔɛlɛ li noʔo na mi kpoʔolo deʔe nigbe na jango tra ti nyini.» Ki woʔo àʔa hanri ban. 10Nyɛʔɛlɛ à li na tra yeri de tra mà na nyufafaʔama yeri me nyugbɔmo. À liʔi nya kí nyɛ kmaʔa. 11Ki kruʔu ma, Nyɛʔɛlɛ à li yo: «Kí ma yala tra ti nya fin, nya ní tiri da nì tí na pibi seri, ti sɛ ti yala ti tyɛnʔɛ ní ge.» Ki woʔo àʔa hanri ban. 12Tra à ti nya fin ga kí na pibi seri ge. Tiri à ti na pibi seri ga nì ki tyɛnlɛ, ga nì ki tyɛnlɛ. Nyɛʔɛlɛ à liʔi nya kí nyɛ kmaʔa ban. 13Yaa àʔa kɔ. Ki kruʔu ma, kpɛnmɛ à mi to. Àʔa po wlɛrɛ tanriwoʔo kiì gi.
14Nyɛʔɛlɛ à li yo nɛ: «Kí ma yala paʔama tyɛnʔɛ fafaʔa bí bo wa namuru ni jango mi da kpɛnmɛ nì, ní yeblimi konʔolo mì na. Ki paʔama mi nì mi da ganʔa pee nyiri cɛnni de, wlɛrɛ nì, ní yɛʔɛ́ ní ge. 15Ki paʔama tyɛnʔɛ ke po wa namuru ni, kee bari naʔa tra na de kpo.» Ki woʔo àʔa hanri. 16Nyɛʔɛlɛ à li ki paʔama kpangbanma pomo syɛn hanri. Kpangbanma à mi po yaa nì jango ki da kpɛnmɛ sinni. Tatunmu à mi po yege nì jango ki da yeblimi sinni. À li ní mà ŋoŋoo hanri ge kpo. 17Nyɛʔɛlɛ li da pi tyɛʔɛ wa namuru ni jango pi da bari naʔa tra na de. 18Pi da wlɛʔɛ nì, ní yeblimi sinni, pi nì pi da kpɛnmɛ kon mì na wɔmo nì me. Nyɛʔɛlɛ à liʔi nya kí nyɛ kmaʔa. 19Yaa àʔa kɔ. Ki kruʔu ma, Kpɛnmɛ à mi to. Àʔa po wlɛrɛ ticɛrɛwoʔo kiì gi.
20Nyɛʔɛlɛ à li yo nɛ: «Ki ma yala awyefafaʔaba bí bo wa nyumu ni me. Kajɛnʔɛ ke da lɛŋɛ wa namuru ní tra ní ti yugu na ge.» 21Nyɛʔɛlɛ li dá nyumu yrɛbɛ ba kpandobo pì bɛfu hanri mà plɛn ajobo tyɛnʔɛ kè bɛfu ní ba pí na koro wa nyumu ni me. Ki podeme na li dá kajɛnʔɛ ke tyɛnʔɛ kè bɛfu hanri. Nyɛʔɛlɛ à liʔi nya kí nyɛ kmaʔa. 22Nyɛʔɛlɛ à li frɛmɛ pa pí na mà yo: «Yrɛbɛ pì bɛfu ba pí na koro wa nyumu ni pi nyɛʔɛ, pi nyugbɔmo nyi me. Kajɛnʔɛ fanna ke nyɛʔɛ wa tra na de.» 23Yaa aʔa kɔ. Ki kruʔu ma, kpɛnmɛ à mi to. Àʔa po wlɛrɛ kɔgunnuwoʔo kiì gi.
24Nyɛʔɛlɛ à li yo nɛ: «Awyebe tyɛnʔɛ kè bɛfu ke po wa tra na de: Kàʔà ajobo ní, aflolobo ní, ní ajoyribi nì be, nya ajobo tyɛnʔɛ kè bɛfu ní.» Ki woʔo àʔa hanri ban. 25Nyɛʔɛlɛ li dá nya ajobo tyɛnʔɛ, ní kàʔà ajobo woʔo ní aflolobo hanri ní, ajoyribi nì be banmɛ ge. À liʔi nya kí nyɛ kmaʔa. 26Ki kruʔu ma Nyɛʔɛlɛ à li yo: «Wo hɛn hanri we. Wi wo lɛ̀. Wi klɛn nyugbɔmo fyɔɔ pe yugu na, kajɛnʔɛ ní, kàʔà ajobo ní, ní tra tì bɛfu ní, ní aflolobo ní ajoyribi nì ba pí na flolo wa tra na de.»#1:26 ma wèle wa 1Kor 11:7 ni wè.
27Nyɛʔɛlɛ li dá hɛnwyee hanri we li lɛgɛ na. Li dɔɔ hanri Nyɛʔɛlɛ li lɛgɛ na. Li da pé hanri naŋa nì cɛlɛ nì.#1:27 ma wèle wa Mat 19:4; Mar 10:6 ni wè.
28Nyɛʔɛlɛ à li frɛmɛ pa pé na mà pe po: «Ye pii ta, ye nyɛʔɛ, ye tra tì bɛfu nyi, ye po ti yugu na. Nyugbɔmo fyɔɔ pe klɛn pe ye kan, ní kajɛnʔɛ ní, ajobo pì bɛfu ní ba pí na flolo wa tra na de.» 29À li ní mà yo: «Nya kì bɛfu ga kí na akaba seri wa tra na de mí biʔi kân ye ma ní tiri tì bɛfu ní da tí na pibi seri ge. Pa ti bo yè akaba. 30Di mí bi nyapriʔi kan ajobo pì bɛfu ma wa tra na de, kajɛnʔɛ kè bɛfu ní, ajobo pì bɛfu ní ba pí na flolo wa tra na de, ali yrɛbɛ pì bɛfu ba wa nyuwyeʔe na ge.» Ki woʔo àʔa hanri ban. 31Nyɛʔɛlɛ à li kì bɛfu nya ga li dá hanri ge, àʔa po kmaʔa ceŋge. Yaa àʔa kɔ. Ki kruʔu ma, kpɛnmɛ à mi to. Àʔa po wlɛrɛ noliwoʔo kiì gi.
Terpilih Sekarang Ini:
HLIMI 1: NLK10
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Bible Society of Côte d'Ivoire