ZEFANIA 2
2
Ligoonya Kigira Lieganira
1Munyi avandu vi zihiiri zitaveeye ni zisoni, mwivungikizi harara 2ni mukikiri kukungwa kuli mukuzi guhuuzwa ni imbuza, imbiri wu vutima vululu vwa Yahova vukikiri kuduuka ku munyi, imbiri wi lidiku lwa Yahova akikiri kumanyia uvutima vwivwe vululu. 3Mwilane ku Yahova, munyi avandu vosi vegehiza mu kivala, avatizaa malago geege. Mukore agaveeye amalungi kandi mwegehizi aveene imbiri wa Yahova. Hawundi mulahononoka kutura ku linyola mageri lidiku lia Yahova amanyia vutima vwivwe.
Lidivizwa lie Zihiiri Zikumberizaa Isiraeli
4Avulaho mundu kali mulala ulitigara mu lidaala lia Gaza. Lidaala lia Ashikeloni lilakatigale hazwa. Avandu vi lidaala lia Ashidodi valakakungwi mu ing'inga yi inusu yi lidiku, kandi avandu vi lidaala lia Ekironi valakakungwi mu lidaala liavo linene. 5Munyi avandu va Filisitia mwadiva! Munyi avandu vamumenyi ahimbi ni inyanza. Yahova umali ku mukalagiraa. Alakamudivizi kandi avulaho mundu kali mulala ku munyi ulitigara. 6Kivala chiinyu ekeveeye ahimbi ni inyanza kilakagwi viguuti viveeye mu na madiri ga vayi kandi zingala zia magondi gaya mucho. 7Avandu vi Ivuyuda avalihononoka valakavuguli kivala chiinyu. Valakaye mu viayo viavo uwene yeyo kandi valakagone mu zinyumba zia vandu va Ashikeloni. Yahova Nyasaye wavo alakave harara navo kandi alakavilanyiri miandu jaavo.
8Yahova Wuvunyali avoora, “Inzi mali kuhulira vandu vi kivala cha Moabu na Amoni, vagemehiza kandi vaageriza kokora vandu vange kuva vu vutima, kandi vigingira ndi vanyara kuvugura kivala chavo. 9Kuli Inzi mbeeye ligali Yahova omenya, Nyasaye wa vandu va Isiraeli ndaga ndi, kivala cha Moabu kandi Amoni vizizaa kudivizwa kuli kivala cha Sodoma na Gomora. Na vigwi havundu ha marina gi jumbi kandi mang'anye mihiga ni mihiga; indiva ilakizuli mucho. Valala ku vandu vange avalihononoka valakavingiliri nu kuvugura kivala chavo.”
10Nindio avandu vi kivala cha Moabu na Amoni valakanyore amageri kigira lielola kandi kilage harara ni ligemihiza lia vakolera vandu va Yahova Wuvunyali. 11Yahova alakavatiihizi. Alakalombe avanyasaye vaavo vi kivala kuva kindu vuzwa, maku zihiiri ziosi zilakamusigamiri muvivala viavo.
12Yahova alakiti avandu va Ezopia ni kivavi.
13Yahova alakanyiiri mukono gwigwe kolovega lwi Ivaale nu kudiviza Asiria. Alakakole lidaala lia Nineve kuva mang'anye kandi changalangwe vugira mazi, 14halakave havundu hi viayo, hi zing'ombe kandi zinyama zing'ano ziosi zilakagone. Amakuure galakamenye mu mang'anye gacho kandi galakakubi liyoga lie zinguru kuvitira mu madirisha. Majikoro galakaliri vululu ku vika vie miliango. Misaala jaavo ji midaragwa javumbakila jilakatulizwi ho. 15Yaga nigo galiekoleka ku lidaala liu kwigingira kigira zinguru zialio, niliganagana ndi liveeye mu mirembe. Avandu vi lidaala yili vagagana ndi lidaala liavo liveeye linene ligali mu kivala. Lidaala yili lilakave havundu haveeye vuzwa, havundu hi zinyama ziu muvulimu zilakasosere! Vuli mundu woosi ulivitira ahimbi nalio alakegose nuvuti.
Terpilih Sekarang Ini:
ZEFANIA 2: LOGOOLI
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©Bible Society of Kenya, 2019