MATIUS 5
5
Khutubah di bukét
1Watée Isa geukalon ureuëng ramé nyan, laju geuék u ateueh bukét. Óh ka lheueh geuduek, murit-murit Gobnyan laju jijak ubak Gobnyan. 2Dan geupeuphon peurunoe awaknyan:
Keubahgiaan nyang seujati
(Luk. 6:20-23)
3“Mubahgia kheueh ureuëng nyang meurasa hana meudaya dan meugantung ubak Tuhan mantong;
awaknyan kheueh nyang po keurajeuen syeuruga.
4 #
Yes. 61:2
Mubahgia kheueh ureuëng nyang meuseudeh até;
Allah teuma geuhibur awaknyan!
5 #
Zab. 37:11
Mubahgia kheueh ureuëng nyang miyueb até;
teuma Allah geupeuwaréh donya keu ureuëng nyan!
6 #
Yes. 55:1-2
Mubahgia kheueh ureuëng nyang meucen jipeubuet keuheundak Allah;
Allah teuma geupeupuih até ureuëng nyan!
7Mubahgia kheueh ureuëng nyang murah até;
Allah teuma murah até keu ureuëng nyan!
8 #
Zab. 24:3-4
Mubahgia kheueh ureuëng nyang gleh até;
ureuëng lagée nyan na kheueh jituri Allah.
9Mubahgia kheueh ureuëng nyang ba damé lamkawan manusia;
Allah teuma geu akui ureuëng nyan sibagoe aneuëk-aneuëk Gobnyan!
10 #
1Ptr. 3:14
Mubahgia kheueh ureuëng nyang meudeurita keunong iénanya sabab jipeubuet keuheundak Po teu Allah;
ureuëng nyan kheueh nyang po keurajeuen syeuruga!
11 #
1Ptr. 4:14
Mubahgia kheueh gata meunyoe jihina, ji-iénanya, dan jipiteunah meusabab lé Ulôn. 12#2Taw. 36:16; Kis. 7:52 Nabi-nabi nyang udeb sigohlom gata pih ka ji-iénanya lagée nyan. Meusuka cita kheueh dan meugeumbira kheueh, sabab raya that upah nyang geubri lé Tuhan keu gata.”
Sira dan trang
(Mrk. 9:50; Luk. 14:34-35)
13 #
Mrk. 9:50; Luk. 14:34-35 “Gata na kheueh sira donya. Meunyoe sira ka jeuet keu tabeue, peu kheueh mungken teupeumasen lom? Hana meunguna lé, teuma jitiek dan jigiloe-giloe lé gob.
14 #
Yah. 8:12, 9:5 Gata na kheueh trang donya. Banda nyang teuduek di ateueh bukét hana mungken hase teusöm. 15#Mrk. 4:21; Luk. 8:16, 11:33 Hana ureuëng nyang peuhu panyöt, laju jigom panyöt nyan deungon guci. Ureuëng nyan teuma jikeubah panyöt nyan bak teumpat panyöt, mangat jeuet peungéh keu mandum ureuëng nyang na lam rumoh. 16#1Ptr. 2:12 Meunan cit trang gata harôh meucahya dikeue ureuëng, mangat awaknyan jikalon buet-buet gata nyang gét, laju ji pujoe Bapak gata di syeuruga.”
Peulajaran keu huköm agama Yahudi
17“Bék kheueh ta anggab Ulôn nyoe Lôn teuka keuneuk jak sampôh huköm Nabi Musa dan peungajaran nabi-nabi. Ulôn teuka bukon keuneuk sampôh nyan, teuma keuneuk tunyok makna nyang sibeuna jih. 18#Luk. 16:17 Ingat kheueh! Simantong bumoe dan langét mantong na, saboh hurof atawa titek nyang paleng ubit pih nyang na lam huköm nyan, hana teuma teusampôh, meunyoe mandum nyan gohlom teujadi!#meunyoe mandum nyan gohlom teujadi: Atawa sigohlom banmandum peungajaran huköm nyan teujadi. 19Ngon sabab nyan, barang sigasoe nyang iengkeue saboh mantong nibak peurintah-peurintah nyan, bahpih nyang paleng ubit, dan jipeurunoe ureuëng laén mangat jipeugét lagée nyan cit teuma, teuma jeuet nyang paleng ubit lamkawan umat Allah. Seubalek jih, barang sigasoe nyang jipeubuet peurintah-peurintah nyan dan jipurunoe ureuëng laén mangat jipeubuet lagée nyan cit teuma, ureuëng nyan teuma jeuet keu rayeuk di teungoh-teungoh umat Allah. 20Jadi, ingat kheueh: Gata hana mungken jeuet keu umat Po teu Allah, meunyoe hana leubeh nibak gurée-gurée agama dan ureuëng-ureuëng Farisi lam hai tapeubuet keuheundak Po teu Allah!”
Naseuhat keuhai beungéh
(Luk. 12:57-59)
21 #
Keu. 20:13; Tel. 5:17 “Meunyoe tateupeue bahwa indatu geutanyoe na meuteumé ajaran nyang lagée nyoe: Bék seumeupoh maté; barang sigasoe seumupoh maté, ureuëng nyang lagée nyan harôh teuadili. 22Teuma jinoenyoe Ulôn peugah ubak gata, barang sigasoe beungéh#barang sigasoe beungéh: padub-padubboh naseukah kuno: barang sigasoe beungéh ngon hana meusabab. ubak ureuëng laén, teuma teuadili; dan barang sigasoe nyang seurapa ureuëng laén, ureuëng nyan teuma teupeusidang dikeue Mahkamah Agama. Dan barang sigasoe nyang peugah ubak ureuëng laén, ‘Bangai,’ ureuëng nyang kheun wajéb teutiek lam apui nuraka. 23Ngon sabab nyan, meunyoe sidroe lamkawan gata teungoh jipeuseumah meuneubri jihnyan ubak Po teu Allah, dan laju teu-ingat bahwa na ureuëng nyang sakét até keu jihnyan, 24bah kheueh teutinggai ilée nyang jipeuseumah nyan dikeue miseubah, laju jijak meudamé ngon ureuëng nyan. Óh lheueh nyan, barô kheueh jeuet jigisa lom teuma jijak peuseumah meuneubri jih nyan ubak Allah.
25Seukira jih na ureuëng nyang jijak gadu gata ubak gantoe mahkamah, meudamé kheueh ngon ureuëng nyan singoh na watée sigohlom trok ubak kantô mahkamah. Meunyoe hán, ureuëng nyan teuma jijok gata ubak hakém, nyang teuma seurah gata ubak peulisi, dan lé peulisi laju jipeutamong gata u dalam glab. 26Dan ingat kheueh: Pasti gata hana hase tateubiet lam glab nyan, sigohlom mandum denda gata lunaih teubayeue.”
Keuhai meumukah
27 #
Keu. 20:14; Tel. 5:18 “Gata tateupeue bahwa na ajaran lagée nyoe: Bék meumukah.
28Teuma bak saát nyoe Ulôn peugah ubak gata: Barang sigasoe watée jigieng ureuëng inong deungon nafeusu gurangsang, ureuëng nyan ka jimeumukah ngon inong nyan lam até jih. 29#Mat. 18:9; Mrk. 9:47 Meunyoe mata uneuen gata jeuet keu sabab gata meudesya, cungke kheueh dan gata böih kheueh mata nyan! Leubeh gét gadôh saboh anggota tuboh gata nibak bansaboh tuboh gata teutot lam apui nuraka. 30#Mat. 18:8; Mrk. 9:43 Meunyoe jaroe uneuen gata jeuet keu sabab gata meudesya, taköh dan taböih kheueh jaroe nyan! Leubeh gét gadôh jaroe gata sibalih nibak bansaboh tuboh gata teutot lam apui nuraka.”
Keuhai taleuek
(Mat. 19:9; Mrk. 10:11-12; Luk. 16:18)
31 #
Tel. 24:1-4; Mat. 19:7; Mrk. 10:4 “Na cit peulajaran lagée nyoe: tieb-tieb ureuëng nyang jitaleuek peurumoh jih, harôh jijok surat taleuek ubak inong nyan. 32#Mat. 19:9; Mrk. 10:11-12; Luk. 16:18; 1Kor. 7:10-11 Teuma jinoenyoe Ulôn peugah ubak gata: barang sigasoe nyang taleuek peurumoh jih padahai peurumoh jih nyan hana jimeumukah ngon agam laén, teupeusabab peurumoh jih nyan ka meumukah, meunyoe peurumoh jih nyan jimeukawen lom. Dan barang sigasoe nyang meukawen ngon inong nyang ka teutaleuek nyan, teuma nyan ka jimeumukah.”
Keuhai sumpah
33 #
Im. 19:12; Teu. 30:2; Tel. 23:21 “Gata tateupeue bahwa nibak ajaran indatu geutanyoe na meuteumé ajaran nyang lagée nyoe: bék mungkie janji. Peue nyang ka gata meujanji deungon sumpah dikeue Po teu Allah, nyan harôh gata peubuet. 34#Yes. 66:1; Mat. 23:22; Yak. 5:12 Teuma jinoenyoe Ulôn peugah ubak gata: bék sagai-sagai mubudok, bah kheueh deumi langét, sabab langét na kheueh takhta Po teu Allah, 35#Yes. 66:1; Zab. 48:3 meunan cit deumi bumoe, sabab bumoe na kheueh lapek gaki Gobnyan: atawa deumi Yerusalem, sabab nyan kheueh banda Raja rayeuk. 36Meunan cit bék meubudok deumi ulée gata, sabab gata keudroe hana hase tapeujeuet ôk gata buputéh atawa itam, bahpih meusiôn mantong. 37Peugah mantong, ‘Nyoe’ atawa ‘Hán’ – leubeh nibak nyan teuka jih nibak si Iblih.”
Naseuhat keuhai teubalah
(Luk. 6:29-30)
38 #
Keu. 21:24; Im. 24:20; Tel. 19:21 “Gata tateupeue bahwa na cit peungajaran nyang lagée nyoe: mata gantoe mata, gigo gantoe gigo. 39Teuma jinoe Ulôn peugah ubak gata: bék gata balaih dam keu ureuëng nyang jipeubuet jeuhet u ateueh gata. Seubalek jih, meunyoe na ureuëng jitampa mieng gata nyang blaih uneuen, bah kheueh jitampa mieng blaih wie gata. 40Dan meunyoe na ureuëng jigadu gata ubak hakém sira jilakée bajée gata, taujok kheueh laju ubak ureuëng nyan meusigoe ngon bajée jubah gata. 41Meunyoe na sidroe peunguasa jipaksa bak gata jiyue gulam barang gob nyang jiôh jih sikilo metée, tagulam kheueh beujiôh sampoe trok dua kilo metée. 42Meunyoe na ureuëng jilakée sapeue-sapeue ubak gata. Dan bék cit tatulak ureuëng nyang keuneuk lakée ngui sapeue-sapeue nibak gata.”
Teugaséh musoh
(Luk. 6:27-28,32-36)
43 #
Im. 19:18
“Gata tateupeue bahwa na cit peungajaran lagée nyoe: cinta kheueh keu rakan-rakan gata dan banci kheueh keu musoh-musoh gata. 44Taeuma jinoenyoe Ulôn peugah ubak gata: cinta kheueh musoh-musoh gata, dan meudoá kheueh ureuëng-ureuëng nyang iénanya gata, 45mangat gata jeuet keu aneuëk-aneuëk Bapak gata di syeuruga. Sabab Po teu Allah geupeuteubiet mata uroe Gobnyan keu ureuëng nyang jroh dan meunan cit keu ureuëng nyang jeuhet. Gobnyan geupeutron ujeuen keu ureuëng nyang peubuet surôh dan keu nyang peubuet jeuhet. 46Sabab meunyoe gata tagaséh ubak ureuëng nyang gaséh gata mantong, keupeue guna jih Po teu Allah harôh geubalaih buet gata nyan? Bukon kheueh ureuëng nyang kutéb cukée pih jipeubuet lagée nyan? 47Dan meunyoe gata tabeuôt saleuem teuma keu rakan-rakan gata mantong, peu kheueh istimewa jih? Ureuëng-ureuëng nyang hana jituri keu Allah pih jipeubuet lagée nyan! 48#Im. 19:2; Tel. 18:13 Bapak gata di syeuruga geugaséh ubak bandum ureuëng deungon sampoereuna. Dan gata pih beutagaséh cit lagée nyan.”
Old and New Testament in Today's Aceh Language @ LAI, 1997.