MATIUS 21
21
Isa geutamong u Yerusalem deungon jaya
(Mrk. 11:1-11; Luk. 19:28-40; Yah. 12:12-19)
1Watée ka tô u Yerusalem, awaknyan laju trok u Betfage di Bukét Zaiton. Nibak teumpat nyan Isa laju geuyue bak dua droe murit Gobnyan geuyuejak leubeh dilée. 2“Neujak kheueh laju u gampông nyang na dikeue nyan,” peusan Isa bak awaknyan. “Nibak teumpat nyan eunteuk laju leumah gata kalon saboh keuleudée nyang mantong teu ikat meusapat ngon aneuëk jih. Neupeuleueh kheueh bandua boh keuleudée nyan dan neuba laju ubak Ulôn. 3Meunyoe na ureuëng nyang teumanyong sapeue-sapeue, neupeugah bak ureuëng nyang teumanyong nyan, ‘Tuhan#Tuhan: atawa Nyang po hak milék. nyang peureulée atra nyoe’, teuma di ureuëng nyang teumanyong nyan laju seungab jipeubiyeu mantong keuleudée nyan teuba.”
4Hai nyang lagée nyan mangat jeuet peue nyang ka lheueh geupeugah lé nabi,
5 #
Za. 9:9
“Peugah kheueh ubak Sion,
Raja gata teungoh geujak ubak gata.
Gobnyan miyueb até dan teungoh geupreh saboh keuleudée,
saboh aneuëk keuleudée nyang mantong muda.”
6Óh lheueh nyan bandua droe murit Geuh nyan laju geujak dan geupeubuet peue nyang ka geupeugah lé Isa nyan. 7Awaknyan jiba keuleudéenyan deungon aneuëk jih. Laju awaknyan jipeungui ateueh rhung keuleudée-keuleudéenyan deungon ija jubah awaknyan keudroe. Oh lheuehnyan Isa laju geu ék. 8Le that-that ureuëng disinan jileueng ija-ija jubah awaknyan di ateueh rot ueh, dan di ureuëng-ureuëng laén laju jikoh ranteng-ranteng kayée laju jitabu ateueh rot ueh. 9#Zab. 118:26 Ureuëng ramé nyang jak dikeue dan dilikot Isa jidumpék-dumpék, “Udeb Aneuëk Daud! Geubri beureukat kheueh Gobnyan nyang teuka ateueh nan Tuhan! Pujoe kheueh Allah nyang Mahamanyang!”
10Óh lheueh nyan, watée Isa geutamong u Yerusalem, bansaboh banda nyan teukeujot lumpah na. “Nyoe soe?” jitanyong lé ureuëng-ureuëng lam banda nyan.
11“Gobnyan Nabi Isa, nibak Nazaret di Galilea,” geujaweueb lé ureuëng ramé nyang seutôt Isa.
Isa geutamong lam Baét Tuhan
(Mrk. 11:15-19; Luk. 19:45-48; Yah. 2:13-22)
12Óh lheueh nibak nyan Isa geutamong laju lam Baét Tuhan, dan geu-use banmandum ureuëng nyang na bloe peubloe disinan. Bubena meuja-meuja teumpat tuka péng habéh geupeu kengkeueng saboh sahoe, dan bangku-bangku ureuëng meukat cicém mirah pati nyan pih habéh geubalek sampoe teueng bayeueng. 13#Yes. 56:7; Yer. 7:11 Óh lheueh nyan laju geupeugah bak ureuëng-ureuëng nyan, “Di dalam Alkitab na teutuléh bahwa Po teu Allah na geupeugah, ‘Rumoh Ulôn teupeugah rumoh teumpat meudoá.’ Teuma lé gata bandum ka gata peujeuet keu eumpung pancuri!”
14Ureuëng-ureuëng buta ngon lapée jijak laju ubak Isa nibak Baét Tuhan, dan Gobnyan laju geupeu puléh awaknyan. 15Teuma ulée-ulée Imeum dan gurée-gurée agama beungéh lumpahna watée geukalon buet-buet ajaéb nyang geupeubuet lé Isa. Dan meunan cit awaknyan beungéh that watée jikalon aneuëk-aneuëk miet jiseumurak mubura nibak Baét Tuhan, “Udeb Aneuëk Daud!”
16 #
Zab. 8:3
Awaknyan jipeugah ubak Isa, “Peu kheueh na deungoe peue nyang jipeugah lé awaknyan?”
“Nyoe, na Lôn deungoe,” geujaweueb lé Isa. “Peu kheueh hántom gata beuet ayat Alkitab nyang teutuléh nyoe: ‘Aneuëk-aneuëk miet ngon aneuëk-aneuëk manyak ka Gata purunoe keu jipeugah puja ngon pujoe nyang sampoereuna?’ ”
17Óh lheueh nyan Isa laju geutinggai awaknyan disinan, laju geuteubiet teuma nibak banda nyan geujak laju u Betania dan geudom di sinan.
Isa geukutôk bak ara
(Mrk. 11:12-14,20-24)
18Ban beungoh óh singoh teuma, watée geujak geugisa u banda, Isa jiteuka deuek. 19Gobnyan geukalon sibak bak ara nyang na timoh bak binéh rot. Laju geupeurab bak binéh bak ara nyan. Teuma bak ara nyan hana jimuboh bah pih meusaboh nyang jai cit meuôn. Laju geupeugah lé Isa keu bak ara nyan, “He bak ara, siumu udeb gata hana muboh le!” Watée nyan cit teuma bak ara nyan laju layée.
20Watée murit-murit Isa geukalon peue nyang ka teujadi nyan, awaknyan hireuen lumpah na. “Pakriban bak ara nyan langsong maté bak saát nyan cit teuma?” geutanyong lé awaknyan.
21 #
Mat. 17:20; 1Kor. 13:2 “Nyang sikeubiet jih, geukheun lé Isa, meunyoe gata meuiman dan hana ragu-ragu, gata pih hase tapeubuet pakriban nyang ka Ulôn peubuet keu bak ara nyoe. Dan kon nyan mantong, teuma gata jeuet tapeugah ubak gunong nyoe, ‘teubeuôt kheueh dan teuböh kheueh u dalam laôt’: teuma hai nyan teujadi. 22Peue mantong nyang gata lakée lam doá gata, nyang gata lakée nyan teuma gata teurimong, asai gata meuiman.”
Teumanyong keuhai hak Isa
(Mrk. 11:27-33; Luk. 20:1-8)
23Óh lheueh nyan Isa geugisa u Baét Tuhan, laju geutamong dan geuseumeubeuet disinan. Watée Gobnyan teungoh geuseumeubeuet, ulée-ulée imeum dan peumimpén-peumimpén Yahudi jijak ubak Gobnyan dan sira geutanyong, “Ateueh dasai peue bandum nyoe gata peubuet? Soe nyang jok hak nyan ubak gata?”
24Geujaweueb lé Isa, “Ulôn pi keuneuk teumanyong ubak gata. Dan meunyoe gata neujaweueb, di Ulôn pih teuma Lôn peugah ubak gata deungon hak soe Ulôn peubuet hai-hai nyoe. 25Nabi Yahya geupumanö ngon hak soe? Deungon hak Po teu Allah atawa manusia?”
Laju lé Imeum-imeum ulée dan peumimpén-peumimpén Yahudi geumeupakat sabe keudroe-droe, “Meunyoe tanyoe peugah, ‘Deungon hak Allah’, Gobnyan teuma geupeugah, ‘Meunyoe meunan pakon gatanyoe hana tapeucaya keu Gobnyan?’ 26Teuma meunyoe tapeugah, ‘Deungon hak manusia’, tanyoe ta takot keu rakyat ba, sabab awaknyan bandum jianggab nabi Yahya nyan sidroe nabi.” 27Teuma awaknyan jijaweueb, “Kamoe hana meuteupeue.”
Laju Isa geupeugah bak awaknyan, “Meunyoe meunan Ulôn pih hana Lôn peugah ubak gata deungon hak soe Ulôn peubuet bandum nyoe.”
Miseue keuhai dua droe aneuëk
28“Jinoenyoe pakriban peundapat gata keuhai nyoe?” geupeugah lom lé Isa. “Na sidroe bapak nyang na dua droe aneuëk agam. Ureuëng tuha nyan geujak ubak aneuëk gobnyan nyang tuha dan geupeugah, ‘Neuëk, tajak kheueh keureuja bak lampôh anggô uroe nyoe.’ 29‘Ulôn hán kutem,’ jaweueb aneuëk nyan. Teuma óh dudoe aneuëk nyan meu-ubah pikeran jih laju jijak mubuet u lampôh anggô nyan. 30Óh lheueh nyan ureuëng syiek aneuëk nyan geujak teuma ubak aneuëk gobnyan nyang keudua, dan geupeugah teuma haba lagée nyang ka geupeugah bak aneuëk geuh nyang awai. ‘Jeuet, bapak,’ jijaweueb lé aneuëk gobnyan nyang keudua nyan. Teuma di aneuëk nyan hana jijak. 31Nyan, bandua aneuëk geuh nyan, nyang toh kheueh nyang seutôt kheun ureuëng syiek jih?”
“Nyang tuha,” geujaweueb lé Imeum-imeum ulée dan peumimpén-peumimpén Yahudi nyan.
Teuma Isa geupeugah bak awaknyan, “Peucaya kheueh: Tukang-tukang kutéb cukée dan inong-inong jeuhet leubeh dilée jeuet keu anggota umat Po teu Allah nibak gata nyoe.#Lam padub-padubboh naseukah kuno na versi lageenyoe: 28 “Jinoenyoe pakriban peundapat gata keuhai nyoe?” kheun Isa lom. “Na sidroe ayah nyang na dua droe aneuëk agam, gobnyan geujak ubak aneuëk geuh nyang phon dan geupeugah, ‘Neuëk, gata jak kheueh meubuet bak lampôh anggô uroe nyoe.’ 29 Aneuëk nyan jijaweueb, ‘Gét, Ayah!’ Teuma jihnyan hana jijak lagée nyang geuyue lé ayah jih nyan. 30 Óh lheuehnyan ayah nyan geujak teuma ubak aneuëk geuh nyang keudua dan geupeugah hai nyang saban, aneuëk nyan jijaweueb, ‘ôn hana kutem,’ teuma óh dudoe meu-ubah pikeran nyang geuyue lé ayah jihnyan laju jijiak cit teuma. 31 Nibak bandua aneuëk nyan, nyang toh kheueh nyang jipeubuet meulakée ayah jih?” “Nyang keudua,” jaweueb imeum-imeum ulée dan peumimpén-peumimpén Yahudi nyan. 32#Luk. 3:12, 7:29-30 Sabab Nabi Yahya Pumanö teuka, dan geutunyok bak gata cara udeb nyang geulakée lé Tuhan, teuma gata hana cit ta patéh ubak ajaran gobnyan; teuma tukang-tukang kutéb cukée dan inong-inong jeuhet nyan peucaya keu gobnyan. Teuma bah pih gata na takalon bandum nyan, gata teutab hana tatem ubah bandum pikeran gata dan hana tapeucaya ubak Tuhan.”
Miseue keuhai ureuëng-ureuëng nyang meubuet di lampôh anggô
(Mrk. 12:1-12; Luk. 20:9-19)
33 #
Yes. 5:1-2
“Deungoe kheueh miseue nyang saboh trek nyoe,” kheun Isa, “Na sidroe ureuëng po tanoh jimeulampôh bak saboh sagoe tanoh gobnyan deungon jipula bak anggô. Laju jipageue ban silingka lampôh nyan, dan jikueh teuma uruek keu teumpat prah ié anggô, óh lheueh nyan jipeudong teuma meunara teumpat meujaga. Óh lheueh nyan laju jipeusiwa lampôh anggô nyan ubak ureuëng nyang keureuja bak lampôh gobnyan nyan, dan gobnyan laju jijak u nanggroe laén. 34Óh ka trok bak watée musém pot boh anggô, ureuëng po tanoh nyan laju jikirém namiet-namiet gobnyan ubak ureuëng-ureuëng nyang mubuet bak lampôh nyan keu jiteurimong jeumba gobnyan. 35Teuma lé ureuëng-ureuëng nyang mubuet bak lampôh nyan laju jidrob bandum namiet-namiet ureuëng po tanoh nyan: Nyang sidroe jipoh, nyang laén jipoh maté, nyang laén lom jirhom ngon aneuëk batée. 36Ureuëng po tanoh nyan jikirém teuma namiet-namiet nyang laén, leubeh jai nibak nyang phon jikirém. Teuma awaknyan teutab jipoh lagée nyang ka-ka. 37Akhé jih ureuëng po tanoh nyan jikirém aneuëk jih keudroe ubak ureuëng nyang mubuet di lampôh anggô nyan. ‘Pasti aneuëk ulôn jihoreumat.’ 38Teuma watée jikalon aneuëk ureuëng po tanoh nyan ka teuka keunan lé ureuëng-ureuëng nyang mubuet lam lampôh nyan, awaknyan laju jimarit sabe keudroe-droe, ‘Nyan, nyoepat jih, ahli waréh gobnyan. Jak tapoh maté aneuëk toke nyan, mangat hareuta warésan tateumé keutanyoe!’ 39Teuma aneuëk nyan laju jidrob, ji rhom uluwa, dan laju jipeumaté.”
40Geutanyong lé Isa, “Nyan, meunyoe ureuëng po lampôh anggô jiwoe, peue nyang teuma jipeubuet ateueh ureuëng-ureuëng nyang keureuja bak lampôh jih nyan?”
41Geujaweueb lé awaknyan, “Pasti ureuëng nyan geupoh maté banmandum ureuëng jeuhet nyan, dan lampôh anggô nyan laju geupeusiwa bak ureuëng laén nyang jitem weuek hase tanoh nyan keu gobnyan óh trok bak watée.”
42 #
Zab. 118:22-23
Teuma Isa geupeugah ubak awaknyan, “Peu kheueh gohlom na gata baca peue nyang teutuléh lam Alkitab?
‘Batée nyang hana jipeuguna lé tukang peugét bangunan
batée nyan ka jeuet keu batée nyang paleng lumboi sa.
Nyoe kheueh buet Tuhan;
keubiet lagak that!’ ”
43“Teuma, ingat kheueh,” kheun Isa, “bandum hak sibagoe umat Po teu Allah geutarek nibak gata dan geubri keu laén bansa nyang jipeubuet peurintah-peurintah Allah. [ 44Ureuëng nyang rhot ateueh batée nyan, hanco; dan ureuëng nyang jitimpok lé batée nyan, teugileng jeuet keu abée.]”
45Watée imeum-imeum ulée dan ureuëng-ureuëng Farisi geudeungoe miseue-miseue nyang geupeugah lé Isa nyan, awaknyan geuteupeue bahwa Isa geumeututoe keuhai awaknyan. 46Teuma awaknyan jiuseuha keuneuk jidrob Gobnyan. Teuma awaknyan teumakot keu ureuëng ramé, sabab ureuëng ramé nyan jianggab Isa sidroe nabi.
Old and New Testament in Today's Aceh Language @ LAI, 1997.