MATEO 13
13
Esohui ebameesahuajji eso' jeaajajji poaje dejjajo huohuicapoa
(Mc 4.1-9; Lc 8.4-8)
1Ma pojjajotiiya Jesosa equijo ani cuayaquimajje baesahuajo oya anioqueñaquiapoa. 2Queahuisoneecuana jjachichaquicapoa o anijo. Jamajjeya Jesosa oe bishe'aiyasijje nequisohuaquimajje aniapoa majo aniya esohui ehuohuijji. Dejjacuana, eponacuana ma ojo ejjachichaqui ca baesahua meshijajijotii anicapoa. 3Majo aniya Jesosaa esohui huohuica-aniapoa cuana pea esohuicuana ebameesahuajjijo.
Jama huohuime acapoa cuana ba'a: —Oe dejja eso' jeaajajji poani poquinaje oja queyasijje eso' jeaajaa. 4Majoya ohua eso' jeaajacajje becacuana eso' oquequinaje ejeojjiyasijje. Majoya quijjepishana cuichojjicuaa anioquecuajimajje eso'cuana ijjiaca'yonaje ejeojjiyasijje eoquequi ani. 5Pea eso'cuana ca ohua jeaajacajje pea meshi meicuana anicabiajje meshi oepojji aniyasijje oquequinaje. Majo aniya eso' pohuacuajiajja'yonaje meshi oepojji aniyasijje. 6Majoya eshequiya jaasohuamajje eso' epohua-ajja'yo nequi dahuayaaca'yonaje, oja sajja nequinobiquijjima poanaje meshi oepojji anijojoya. 7Pea eso'cuana ca ohua jeaajacajje acuishatatasajjatejjee ani meshiyasijje oquequinaje. Majoya eso'cuana acuishatatatejjee ojee pohua'yajo acuishatataa oya queyaca'yonaje. Jamajjeya oya tii'yoajja poanaje, jjajja-ajja poanaje. 8Pea eso'cuana ca ohua jeaajacajje meshi queapamenee aniyasijje oquequinaje. Jamajjeya majo nequi pohua'yomajje queajjajjahuisonee poanaje tii'yomajje. Becacuana ecuijo ejjajja queaso'huisonee poanaje, 100 huisome, pea ca 60 huisome, pea ca 30 huisome eso' poanaje. 9Cua shajja-ajjasapoaniya quiaa oe shajja-ajjaneicue jiquio esohui.—
Jesosaa huohuicapoa apiojji ohuaya pea esohuicuana ebameesahuajjijo huohuicani
(Mc 4.10-12; Lc 8.9-10)
10Majoya aje o shajja-ajjajji poanicuaa Jesosa huohuiajjacapoa apiojji ohuaya pea esohui ebameesahuajjijo huohuicani cuana. 11Jesosaa saja-acapoa cuana jama ba'a: —Eyacuiñajjiya miquianayanei queaja'a bameesahuacani ojaya ejjashahuabaquijjicuana. Achajja poaje quijje ohua ojjañacuana huoojeacapoquianitiijo bameepea-aicani ohuaya. Jiquio peacuanaja ca Eyacuiñajjija ejjashahuabaquijjicuana ebajjitii pojjeama poaje. 12Ojjaña joya Eyacuiñajjija esohuijo jjashajja-ajjaquisapoanicuanaja comacuanajaya queaja'anee popoquije oja esohui. Eyacuiñajjiya comacuanaya queaja'anee bameesahuacaje oja esohui. Joya Eyacuiñajjija esohuijo jjashajja-ajjaquisapo-ajja poanicuana caca Eyacuiñajjiya cua ojaya queaja'apishana poani esohui pajeameecaje'yo, queaquehua pomeecaje'yo. Joya ecua aema'neija oepojji oja aquiana peaa jjesheca'yani, jama pea-ai Eyacuiñajjija esohui acaje'yo 13Jamajojoya aje eyaya huohuiaña pea esohuicuana onajaya queaquehuatii epojji. Macuanaya cojjajji jjabaquijji poani jamatii queaja'a jjabaquiajja. Oya jjashajja-ajjaquijji pea-ai poani jamatii e'ejojonei jjabahuejjaneiquiajja. 14Yahuajonei Eyacuiñajjija esohuihuohuijji poa Isaías dejjaa esohui tehuecapoa ojo jama ba'a:
“Esohui queahuiso shajja-ajjamajamajacaje cuaa jamatii ojaya queaquehuatii popoquije.
Jjabaquipoquijetii jamatii ojaya queaja'a ebajji pojjeama poaje.
15Jiquio meshijo ba'ecacuanaja oja sapadojjo queaquehuanee poani.
Oja shajjahuejja enoco jayojja poani cuanaja.
Oya ecojjacahui jayojja ba'eca.
Jiquio ba'ecacuana jama pojjeama poanijjemo queaja'anee jjabaquime, queaja'a jjashajja-ajjaquipoquime, queaja'a jjashahuabaquime pome, pea jjashahuabaquime po'yome pea-ai ejo o nahue'yojji epojjijo.”
Jama tehuemeya yahuajonei esohui acapoa.
Ma ecua ohua tehuecapoa jayojja pocanaje cuana.—
16Majoya Jesosaa o shajja-ajjajji poanicuana huohuipea-aicapoa jama ba'a: —Miquianaya caca oe queabihuinee poani miquianaja ecojjaaneiya esohui queaja'anee bañajojoya, miquianaja eshajjahuejjaneijje esohui queaja'a shajja-ajjañajojoya pea-ai. 17E'ejojonei eyaya quiana huohuiaña queahuiso Eyacuiñajjija esohuihuohuijji poacuaa, pea judío dejjacuaa ma queapamenee poacuaa pea-aiya queaja'a basa-acapoa jiquio miquiaaya jjeya queaja'a baña esohuiya. Yahuajonei ojaya bajjimaneitii poa cuanaja. Jiquio miquiaaya jjeya queaja'a shajja-ajjaña esohui macuaaya shajja-ajjasa-acapoa, oya esohuiya. Yahuajonei ojaya shajja-ajjajjimaneitii poa cuanaja.—
Jesosaa huohuicapoa yajja poanijje esohui eso' jeaajajji dejjajo
(Mc 4.13-20; Lc 8.11-15)
18Jesosaa huohuitiicapoa cuana jama ba'a: —Shajja-ajjaneicue jiquio eya jjeya huohuije esohui yajja poanijje eso' jeaajajji poani dejjajo. 19Esohui Eyacuiñajji ojjañacuana huoojeapoquiajjitii poanijo shajja-ajjacani cuaa, jamatii ojaya queaquehuatii poani cuanaja yajja poanijje shai coma esohui. Oya jiquio ecua eso'cuana ejeojji jaahuasijje oquequiani majoya cuichojjicuaa ijjiaca'yani jamaya. Edosiquiaa esohui queapame oja sapadojjojo nequi eshajja-ajja pajeameecuajica'yani, chama'yo pomeecani. 20Ma pea eso'cuana mei anicabiajje meshi oepojji aniyasijje oquequinaje joya ecua dejjacuana, eponacuana pea-ai Eyacuiñajjija esohui shajja-ajjamajje queabihuinee jjashahuabacuajiquiani jama. 21Majoya ohuaya Eyacuiñajjija esohui queapame oja sapadojjohuasijje nequimeejjimatii acani. Jiquio ecua meshi oepojjijo esajja nobiquijjima poani jama pea-aiya oya poani. Majoya quijje oya Eyacuiñajjija esohuijo peacuaa queanee acajje, queacamajanee acajje pea-ai ohuaya cajaa acuajica'yani Eyacuiñajjija esohui. 22Ma pea eso'cuana acuishatatasajjatejjee ani meshiyasijje oquequinaje joya ecua dejjacuana, eponacuana pea-ai Eyacuiñajjija esohui shajja-ajjamajje jjashahuabaqui'yani jama. Majoya quijje oya jiquio meshijo ani eba'epoquijji aquianajo, echacojjijo pea-ai jjashahuabamajamajaquipoquiani. Oya queabejjohuiso pomajje queabihui epoaje'yotii poso jjabaquiani macuanajoya. Jamajjeya Eyacuiñajjija esohui oja sapadojjojo nequi pajeaca'yani ohuaya, nequimeejjimatii acani. Jiquio ecua ebanacuana acuishatatatejjee pohua'yo jjajja-ajja poani, jama pea-aiya oya ba'epoquiani. 23Ma pea eso'cuana meshi queapameneeyasijje oquequinaje joya ecua dejjacuana, eponacuana pea-ai Eyacuiñajjija esohui shajja-ajjamajje e'ejojonei jjashahuabaqui'yani oja esohuijo jamaya. Oya Eyacuiñajjijo queaja'a ba'epoquiani jiquio ecua ecuicuana queaso'huisonee poani, jama pea-aiya oya ba'epoquiani. Beca ecuijo queaso'huisonee, 100 huisome eso' poani, pea cuijo ca iyehuiso 60 huisome eso' poani, pea ca 30 huisome eso' poani jama pea-aiya ba'epoquiani cuana.—
Pea esohui ebameesahuajji Jesosaa huohuipea-aicapoa sipone queataijo
24Jesosaa pea esohui ebameesahuajjijo huohuicapoa cuana jama ba'a: —Achajja poaje quijje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a, ma ecua oe dejjaa oja quejo eso' queapame banameecanaje jamaya. 25Majoya quijjepishana oe mecajje ojjaña ecahui jaajo pea dejja o botiamanei ajji poaniya quehuapoemajje siponeso' queatai anosoai jama banacahuanaje mecajje oja anosoaitejjee. 26Jamajjeya anosoai sipone queatai so'tejje ojee pohua'yonaje. Oya jayojja pea-ai tii'yonaje. Majoya quijje anosoai jjajjajo bacanaje cuaa sipone queatai ojee tii'yonaje anosoaitejjee. 27Jama ojee tii'yonaje bamajje ma ojo chacochacoanicuana poquinaje equemese huohuiya. Jama acanaje oya ba'a: “Miyaya eso' oopana queapame quejo banameenaje. ¿Yajjajje shai sipone queatai majo pea-ai ojee pohua'yonaje?” 28Equemeseya saja-acapoa cuana jama ba'a: “Joya e botiamanei ajji poaniya ojee eso' quehuabanacahuanaje.” Majoya oja que chacojji poanicuaa oya huohuiajjacanaje jama ba'a: “¿A'a ecuana poquimeesa-aña ma sipone queatai nequi ojee pohua'yo chiyojea'yohua?” 29Ohuaya equemeseya jama saja-ame acapoa cuana ba'a: “Chojja, a'a ma sipone queatai epohua'yo nequi chiyojeaqui'yojji. Anosoai ojee nequi chiyojea'yochana. 30Majotiiya ojee catiiqui'yosahua anosoai ejahuajji. Majoya eyaya esejja'yojji poanicuana huohuije ebionei sipone queatai ojaya echiyojea'yojjijo. Sipone queatai chiyojea'yomajje ojee yica'acaje cuaa edahuajeajji. Majoya anosoai jjajjajeyomajje equiyasijje ejjajja iyanobiacaje cuaa majo eanipoquijji.”—
Pea esohui ebameesahuajji Jesosaa huohuipea-aicapoa mostaza eso'bisoneijo
(Mc 4.30-32; Lc 13.18-19)
31Jesosaa pea esohui ebameesahuajjijo huohuipea-aicapoa cuana jama ba'a: —Ae jayojja poaje quijje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a: ma ecua dejjaa oenei eso' mostaza bajjani banacanaje oja quejo jamaya. 32Jiquio mostazaja eso' queabisonee pea eso'cuana jama pojjeama che bisoneinei. Majoya quijje pohua'yomajje queaquemonee tiipoquiani pea ebanacuana jama pojjeama. Oya quea-aonee tii'yani pea acuicuana queaquemo jayojja pea-ai. Jamajojoya aje cuichojjicuana oja aahuasijje anioquequiani jomishocaa.—
Jesosaa huohuipea-aicapoa pea esohui ebameesahuajji pahui shejjeemeejjijo
(Lc 13.20-21)
33Jesosaa pea esohui ebameesahuajjijo huohuipea-aicapoa cuana jama ba'a: —Ae jayojja poaje quijje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a: jiquio ecua pahui shejjeemeejji poani jamaya. Eponacuaa oepojjinei pahui shejjeemeejji iyacani harina queahuisohuasijje pahui yajji. Jamatiiya oepojjineiya ojjaña harina eiñahuahuo shejjeemeejeyocani— jama huohuimeya acapoa cuana.
34Jesosaa esohui ebameesahuajji oopana huohuicapoquiapoa cuana. Pea esohuicuana pojjeama ohuaya huohuicapoa. 35Ohuaya jamaya esohui huohuicapoquiapoa cuana ma ecua yahuajonei esohuihuohuijji poa dejjaa tehuecapoa ojo jama ba'a:
“Eyaya pea esohuicuana ebameesahuajjijo huohuipoquiaje cuana.
Eyaya jjeya queaja'a bameeje esohuicuana
ma yahuajonei meshi panacoocajeahuajo bajjimanei poa cuanaja esohuiya.”
Jesosaa huohuicapoa yajja poanijje esohui eso' queapametejjee sipone queatai ojee pohua'yonajejo
36Majoya Jesosaa esohui huohuijeyomajje majo anica ejjachichaqui jiñaca'yapoa equiyasijje nobiquiya. Equijotii ani o shajja-ajjajji poanicuana jjanequichipiquiapoa Jesosa huohuiajjajji oja esohui ebameesahuajjijo. Yajja poanijje shai oja esohui sipone queatai ojee tii'yonajejo anosoaitejjee ojaya queaja'a ebajji Jesosa huohuiajjacapoa cuaa. 37Jamajjeya Jesosaa queaja'a huohuicapoa cuana yajja poanijje oja esohui jama ba'a: —Jiquio eso' queapame banameejji poani caca eya Dejjapojji epo. 38Oja que jiquio ecua ojjaña meshicuana poani jama. Eso' queapame poani joya ecua dejjacuana, eponacuana pea-ai Eyacuiñajjija esohuijo jjashahuabaqui'yani jama. Comacuanaya jjabaquiani Eyacuiñajji eomese poanijo o huoojeapoquiajjitii poani. Sipone queatai ojee tii'yonaje joya ecua dejjacuana edosiquianaja epeejjitii poani jamaya. 39Ma equemese botiamanei ajji poanaje dejja ma quehuajje sipone queatai banahuajji poanaje caca oe edosiquiana jamaya. Oja bana anosoai jahuajo apoa esejja'yojji jiquio ecua oe-ejjenei epojjajo meshi oe poaje'yo jamaya. Jiquio esejja'yojji poanicuana Eyacuiñajjija angelcuana jama pea-aiya poani. 40Ma ecua sipone queatai yica'amajje dahuajeacanaje cuaa jama pea-aiya Eyacuiñajjiya oja angelcuana ameecaje'yo ojjaña joya ojo jjashahuabaqui'yoajjanei poanajecuana oe-ejjenei epojja meshi chama'yo poajo. 41Eyaya Dejjapojji epohua ecue angelcuana huoojeaje ojjaña joya queamimishitii ba'epoquianicuana, joya pea queamimishi pomeejji poanicuana pea-ai queahueshatii nequimee'yojji ojjaña ecuea epeejji poanicuanajo. 42Majoya angelcuaa ojjaña joya queamimishitii ba'epoquinajecuana jeajeacaje'yo Cuaqui-ai queaquiyonee jijiquiyasijje, horno jamahuasijje. Majotii ani'yocuana paneineianicaje'yo queaneeneejo, ese' ijjiayaica'yoanijetii quiyoneejo. 43Ojjaña joya e'ejojonei Eyacuiñajjija po'yanicuana oja mimishima'yo poaniya caca oe jijipoquijetii queaja'a Eyacuiñajjiya ojjañacuana huoojeacapoquianitii meshi Eyahuasijje jiquio ecua eshequi jijinequiani jama. Jamajjeya oe joya shajja-ajjasapoaniya quiaa jiquio esohui shajja-ajjaneicue.—
Pea esohui ebameesahuajji huohuicapoa aquiana queanahuenee emoquehua anijo
44Jesosaa huohuitiicapoa cuana pea esohui ebameesahuajjijo jama ba'a: —Achajja poaje quijje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a: joya ecua dejjaa aquiana queanahuenee meshiquipajo peaja quehuamo iya ani baca'yani jamaya. Majo ani ba'yomajjeya ohuaya oja ejjocohuasijjetii quehuaiyanobiaquicaje'yo oya dejjaaya. Majoya ohuaya queabihuiya poquimajje ojjañatii oja aquianacuana quiacaje ma meshi jjeshe'yojjiya.—
Pea esohui ebameesahuajji huohuicapoa meicopo-oshe queanahuenee perla bajjanijo
45-46Achajja poaje quijje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a: joya ecua oe dejjaa meicopo-oshe queasosehuisonee perla bajjani sa-ajjaneicani ejjeshejji jamaya. Majoya quijje oe meicopo-oshe perla queasosehuisonee poani bamajje ejjeshejji oya poquinaje ojjaña oja aquianacuana quiaa. Majoya oja aquiana quiajeyomajje jjeshecanaje ma meicopo-oshe perla queasosehuisonee poani.
Pea esohui ebameesahuajji huohuicapoa nahuooshojeajjijo
47Achajja poaje quijje Eyacuiñajjiya ojjañacuana huoojeacapoquianitiijo miquianaja queaja'a ebajji huohuije. Jama poaje ba'a: jiquio ecua nahuooshojeajji esipi baeyasijje jjequiyiyejeacani jamaya. Jjequiyiyejeacajo pea pea nahuoocuana nobiquiani. 48Majoya nahuoo queahuisonee nobiquiajo eshojeajji cuiocajo nahuooshojeajji poanicuaa jjequiyiyejeasohuacaje meshijajisahuahuasijje. Majo jaaya nahuoocuana dejjacuaa babacacaje ache queapame, ache peajja ijjiaca-ajja. Cua queapame poani huisotii biocani eshajahuasijje, cua queatai peajja jeajeacani. 49Oya jayojjaya Eyacuiñajjijaya oja angelcuana ameecaje'yo cuana oe-ejjenei epojja meshi chama'yo epojji poeajo. Eyacuiñajjija angelcuaa nequiashiñacaje oopana ojjaña joya queamimishitii ba'ecapoquinajecuana queahuesha enequi'yojji ojjaña joya Eyacuiñajjiya oja mimishima'yo bacani cuanajo. 50Majoya ojjaña joya queamimishitii ba'ecapoquinajecuana jeajeameecaje'yo Cuaqui-ai queaquiyonee jijiquiyasijje horno jamahuasijje. Majotii ani'yocuana paneineianicaje'yo queaneeneejo, ese'cuana ijjiayaica'yoanijetii quiyoneejo.
Eyacuiñajjija esohui eyacua ejaa, yahuajonei esohui pea-ai ejaa
51Majoya Jesosaa o shajja-ajjajji poanicuana huohuiajjacapoa jama ba'a: —¿A'a jiquio esohuicuana ebameesahuajji ecue huohui quianaja queaja'a poani?—
Jesosa saja-acapoa cuaa jama ba'a: —E'e queaja'a.—
52Jesosaa huohuipea-aicapoa cuana jama ba'a: —Moisesja tehuehuohuijji poanicuaa Eyacuiñajji ojjañacuana huoojeapoquiajjitii poanijo queaja'a bamajje esohui eyacuacuana, ma yahuajonei poa pea-ai esohui queaja'a huohuipea-aicaje. Oya joya ecua equimeseya oja aquianacuana eiyachicha ani eyacua, echii pea-ai nequiacuayacani jama pea-aiya poaje.—
Jesosa pueblo Nazaret meshiyasijje poquio'oyapoa
(Mc 6.1-6; Lc 4.16-30)
53Majo ani Jesosa esohuicuana ebameesahuajjijo huohuijeyomajje poqui'yapoa oja meshineiyasijje. 54Oja pueblo Nazaret meshi bañaqui'yomajje ohuaya judiocuanaja equi-ai ejjachichaquijji oja meshineijo nequiya esohui huohuicañaquio'oyapoa cuana. Ohua esohui queaja'a huohuicani shajja-ajjamajje jjabaneineiquicapoa cuana Jesosajo. Jama poa cuana ojo ba'a: —¿Achacua shai, ajea huohuijo jiquio dejjaa esohui queapamenee bacanaje? ¿Acheya shai oya queaca'anee pomeecani dejjaja ajjima'neineicuana ojaya eajji? 55Jiquio nequi dejja acuicacajjija bacuaejja, María oja nae. Oja chahuacuana Santiago, José, Simón, Judas pea-ai. 56Oja jjo'icuana esenijje pea-aiya ba'e. Jamajjeya, ¿acheya shai oya queaca'a pomeecani? ¿Ajea huohuijo oya queasapaja'anee poani?—
57Jamajjeya oja meshineijo ba'ecacuaa oya Jesosa cajaa acapoa ojaya oya ebaneijojoya. Jamajojoya aje Jesosaa jama huohuime acapoa cuana ba'a: —Cua Eyacuiñajjija esohuihuohuijji poanicuana poquije meshicuanahuasijje, majo ba'ecaa oya shajja-ajjacani, queapame ja'acajjequiani pea-ai. Onijjejaajjinei oja meshijo ba'ecacuana, oja huapa pojjeamacuana pea-ai caca oe o shajja-ajjasapo-ajjanei poani— jamaya acapoa Jesosaa.
58Jamajojoya aje Jesosaa oja meshineijo nequiya dejjaja ajjima'neineicuana mi-acapoa macuiñajjicuana ojo jjashahuabaqui'yosapo-ajjatii poanajejojoya.
Terpilih Sekarang Ini:
MATEO 13: ESE
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
Copyright Mision Nuevas Tribus, 2006