Lûm 7
7
Əbtaawe nchile bo ghale wiy ghɛn
1Ghone-nyii, mɛ kɛŋe ge ghɛn kuume kine ka ghel ghɛ ɛ́ keen nchil. Nchile lóó ɛy yɛ ghale wel kɛn ɛ lefɛ əb bo bɛɛyen ɛ ɛyyio. 2Əbchəyte lu ge nchile dine ge əbvii loo ki lum fene əb lu se yɛ lu kɛn ghene wen ɛ əbliy wɛ lum bo bɛɛyen ɛyyio. Əb kuo fene əb boymen se nchil yɛ ɛy ghalen wen kum lum nɛ̂ vin. 3Yɛ́ lu wɛ əbvii nɛ̂ vin fəy lum è yɛ lu wiy ə wel əbchin nɛ lum ə wen bo bɛɛy ɛ ɛyyio, fene ɛ́ yɛ toŋte wen ge əbvii wɛ əb kaalen lum. Dî nɛ lum ə wen kuo, é nchil nɛ̂ yin jia bo ghal wen, ɛ́ jia yɛ toŋte wen ge əbvii wɛ əb kaalen lum ɛ lefɛ əb chèmè kè ghalen lum əbchin. 4Lu kɛn ghɛɛ-ghɛɛ ka ke luun kum ghɛne ghone-nyii. Nchil bo ki wiy kenəə se nɛɛy nɛ̀ ghɛn bek ka ghɛn chintenmen è kuo ghɛne ghe Christ ɛ kentam ka ghɛne yɛ lu ghɛ́ wel əbchine. Se lu ɛ leenen nɛ ghɛn lu ghel ə wel vi wɛ Feyine nè losen se ɛykuo ka ghɛsene yɛ chii ɛychii ɛyjuŋe ɛyshiɛ nə Feyine. 5Nè lu ka ghɛsen nè bo chiin ka ɛyghun ə yɛ́sene kɛŋen ge ɛ́ yɛ chii, nchil nè domse ghɛsen ge ɛ́ yɛ chii ɛychii ɛybee yɛ ɛy gwiyen nɛ lu nɛ̀ ɛykuo. 6Se lu ɛ leenen nɛ ghɛsen bo ki wiy kenəə se nɛɛy nɛ̀ nchil bek ka ghɛsen nè se shiin ka ɛ́ kuonmen kuon se nchil kediake nchil nɛ̂ yi yɛ ɛy nè ghalen ghɛsen me buu. Ghɛsen bo fɛle wiy kekos ɛ jii ɛyməə ka nchil yɛ ɛ́ nyaken nyaken dinen, ghɛsen se fɛle ɛ jii ɛyfɛɛ yɛ luun jii yɛ Keyioy ə Feyine dinen.
Nchile chiote kenəə kɛ luun mbee
7Lòó ghɛsen bo suuy gee ghɛɛ? Ge nchil se wene ngeŋ lu mbee-a? Ke wiy dî. Nɛ nè buu se nchil fene mɛ báà se ke kenəə kɛ luun mbee. Nè buu nɛ nchil din ge: Ghàà wel yɛ semte kefaa ə wel əbchin; fene mɛ nè baa se ke ge se semte kefaa wel lu mbee. 8Mbee me yɛn nsan ɛ keleŋe nchil nɛ̂ ghan è chia ɛ ten è se lose tenkii nseemese əbnəə lólò ɛ mɛ ɛytem. Nè buu se nchil fene mbee lu kefaa kekuone. 9Nè lu se mbiy nɛ mɛ bɛɛy ghàà yɛ ke nchil, nɛ mɛ ki ɛychii, se lu ka mɛ nè keelen nchil, mbee me taa ɛ mɛ ɛytem, ke me se lu ka mɛ kuomen kuon. 10Nchil yɛ ɛy nè gwiyen se nɛɛy ge wel yɛ chii chiin sɛy me nɛɛy ge mɛ kuo kuon. 11Mbee dì nè kiile nsan nɛ lu ɛ məme nchil è lɛɛse mɛ è yuy.
12Ke me se lu ge ɛysake lu kefaa kelanene, nɛ nchil lu kefaa kelanene, lu ɛ titiy gese jofe. 13Ke chèmè dine ge kefaa kejuŋe nè nɛɛy ge mɛ kuo-a? Ke báà se lu dî. Di nè kiile mbee nsan ɛ məme kenəə kejuŋe è nɛɛy mɛ kuo. Ke kooy dì mbee me se loote yɛnsen ge lu mbee. Nchile me gese loote se dine ge mbee lu naa kefaa kebee se nkan.
Əbnoo wɛ əb luun ɛ wele məm
14Ghɛsen ke ge nchil lu kefaa nɛ ke lòò se Feyine, dî nɛ mɛ lu kɛn wel se nchɛk ka ɛ́ nè feenen, ge mɛ yɛ́ fɛle kekos se mbee. 15Mɛ báà se ke kenəə kɛ ke nɛɛyen mɛ, bek ge mɛ loo kɛŋ ge mɛ nɛɛy kenəə ghàà mɛ nɛɛy keghene, mɛ sɛy nɛɛy nɛ lu kɛ mɛ banen. 16Ka mɛ nɛɛyen əbnəə nɛ lu wɛ mɛ koŋen wiy, fene ke dine ge mɛ beeme ge ɛysake lu kefaa kejuŋe. 17Ke me se lu nɛ báà se nɛɛy mɛ əbnəə nɛ̂ vin, sɛ́y bò nɛɛy mbee yɛ ɛy luun ɛ mɛ ɛytem. 18Mɛ ke ge kenəə kejuŋe báà se lu ɛ mɛ məm, dìì ge njuŋ wiy ɛ mɛ kechak əbghun bek ka mɛ lóó mɛ yɛ kɛŋ se nɛɛy əbnəə əbjuŋe, dî mome lolo se nɛɛy. 19Ke lu dî bek ka mɛ báà se nɛɛy njuŋ yɛ mɛ koŋen se yɛ nɛɛy, mɛ sɛ́y nɛɛy nɛ lu mbee yɛ mɛ banen se nɛɛy. 20Nɛ mɛ nɛɛy kenəə kɛ mɛ báà se koŋe se nɛɛy fene báà gese se nɛɛy mɛ kenəə ten, fene dì nɛɛy mbee yɛ ɛy luun ɛ mɛ məm.
21Ke me se lu san dì ka lu ɛysak ɛylee ge mɛ yɛ loo kɛŋ se nɛɛy kenəə kejuŋe kenəə kɛ mɛ nɛɛy yɛ lu kɛn kebee. 22Mɛ koŋe se yɛ yionen ɛysak ə Feyin nɛ̀ ɛytem ə yom ɛyjime; 23dî nɛ mɛ yɛne nɛ lu ɛysak ɛychine ɛ mɛ əbghun yɛ ɛy noon ɛysak yɛ ɛytem ə yome koŋen. Lu ɛysak nɛ̂ yin yɛ ɛy kulen mɛ, mɛ me se lu ka kekos se əbnəə əbbee wɛ əb luun ɛ mɛ əbghun. 24Lu ngɛk sekɛ se mɛ lɛ! Lòó boyse ndɛ mɛ se əbghun ghan wɛ əb kálen mɛ se yuy yuyén lɛ? 25Mɛ bɛ́ɛ̀lè Feyin bek Báàba ə wɛsen Jesus Christ.
Ke me se lu ɛ mɛ ɛytem nɛ mɛ koŋe se yɛ yionen ɛysak ə Feyine, dî nɛ lu ɛ mɛ kechak əbghun nɛ mɛ lu kekos ə ɛysak yɛ ɛy gwiyen nɛ̀ mbee.
