Lûm 4
4
Ablaham lu nfeke wele titiy
1Ghɛsen liɛ nfek əbnəə ghan se Ablaham wɛ ba ə ɛykfəə nə ghɛsen. Əb nè lu ɛ́ titiy ɛshiɛ nɛ̀ Feyine bek ghɛ? 2Nè bóy se yɛ lu ge Feyine liɛ Ablaham ge wele wɛ̂ titiy bek əbnəə əbjuŋe wɛ Ablaham nè nɛɛyen, fene Ablaham nè ki kenəə kɛ lòó əb yɛ ghaŋse əbghun ɛ ten. Dî nɛ əb nè lòó əb jia yɛ ghaŋse əbghune bek kenəə ɛ ɛyshiɛ nə Feyine. 3Ŋwaale-Feyine me se suuye ge: Ablaham nè fo ɛytem se Feyine, Feyine me liɛ wen ge wele wɛ̂ titiy. 4Wele sɛɛ fɛl ɛ́ lak wen, ghàà yɛ lu ge əblaake tene lu fomɛ. Ə́b yɛ lu nɛ lu əbghiy ɛghoo nə wen. 5Se lu se wel wɛ əb báà se nɛɛy nɛ lu əbnəə əbjuŋe ge Feyine liɛ yi ka wele titiy, dî foo ɛytem se vi wɛ əb lɛyse mbeese ghel, lu nɛ Feyine yî liɛ wen ge wele titiy kɛn bek ɛytem yɛ əb foon se Feyine. 6David ko lu nɛ əb din sɛy ge, ke lu kejuŋ se ghel ghɛ Feyine liɛn ge ɛ́ lu ɛ titiy nɛ wiy bek kenəə kɛ ghene nɛɛyen. Əb nè suuy ge:
7“Ke lu kejuŋ se ghel ghɛ Feyine lɛysemen əbjas ə ghen,
ghel ghi ghɛ Feyine chitenmen mbeese ghen.
8Ke lu kejuŋ se wel wɛ Báàba jia yî yɛ kuume mbeese ə wen.”
9Ke lɛ lu kejuŋ nɛ lu kɛn se ghele Juuse ge yi ka ɛ́ nɛyten ghene moo, ke lu sɛy kejuŋ se ghel ghɛ ɛ́ baa nɛyte-a? Kéné ghɛsen lóó ɛ́ yɛ suuy ge Feyine nè liɛ Ablaham ge wele titiy bek ɛytem yɛ əb nè foon se Feyine. 10Feyine nè liɛ Ablaham ka wele titiy ɛ leghɛ? Nè lu nɛ ɛ́ nɛytemen Ablaham moo, nɛ ɛ́ bɛɛy ghàà nɛ̀yte-a? Nè lu nɛ ɛ́ bɛɛy ghàà nɛ̀yte. 11Ɛ́ nè nɛyté Ablaham, kii nɛ̂ kine se lu kɛn əbchəysen se din ge əb lu wele titiy kɛn bek ɛytem yɛ əb nè foon se Feyine nɛ ɛ́ bɛɛy ghàà chèmè nɛyte wen. Feyine nè liɛ wen ge wele titiy ɛ jii nɛ̂ ghan ka əb yɛ lu ba-ɛykfəə se wel əbjim wɛ əb foon ɛytem se Feyine di nɛ ɛ́ báà nɛ̀yte. 12Ablaham ko gese se lu sɛ̂y ba-ɛykfəə se ghel ghɛ ɛ́ nɛyten, nɛ wiy ge yî ka ɛ́ nɛyten kɛn ghene nɛyten; nɛ lu bek ɛytem yɛ ghene foon se Feyine, ghɛɛ-ghɛɛ ka Ablaham nè foon ɛytem se Feyine nɛ ɛ́ gee se naa se nɛ̀yte wen.
Ghɛsen kiile nkakma ə Feyin bek ɛybeeme
13Feyine nè kak Ablaham ghene ɛykfəə wene ge ghene yî yɛ ki ketuu ntiɛ se kɛ́ ghene. Ɛykak nɛ̂ yin nè báà gwiy ge yí ka Ablaham nè lɛmen nchil. Ɛy nè gwiy bek ka Feyine nè liɛn Ablaham ge wele titiy bek ɛytem yɛ əb nè foon se wen. 14Nɛ dì kè lòò è yɛ lu ge ghel ghɛ ɛ́ chiin ɛ ɛyshaa ɛysak yɛ lu ghene ghɛ ɛ́ kiile nkakma ə Feyine, fene ɛytem yɛ fo se Feyine jia bo yɛ ki kenəə se nɛɛy, nɛ ɛykak yɛ Feyine nè kaken lu kenəə keyume. 15Wele kole nchil Feyine yafse ɛytem è mak ngɛk se wen. Nɛ nchil dì kè wiy é kelee jia bo yɛ lu ge wel kol nchil.
16Di ghɛy kenəə kɛ Feyine foon nkakma nɛ̂ yin nɛ lu bek ɛytem yɛ wel fó se wen. Feyine nè fo nkakma nɛ̂ yin nɛ lu bek ka əb nè chamen nɛ lu ɛysen se ghone Ablaham ɛjim nɛ wiy kɛn ghii dii ghɛ ɛ́ lɛmen nchil əb nè fo se ghii dii ghɛ ɛ́ foon nɛ lu ɛytem se Feyine ka Ablaham wɛ luun bay se ghɛsen ɛjim nè foon. 17Ke lu ka ɛ́ nyaken ɛ ŋwaale-Feyin ge: “Mɛ lu nɛ mɛ nɛɛymen ge wɛ̀ yɛ lu Bay se əbtume se ɛydio.” Ablaham me se lu ba ə wɛsen ɛ ɛyshiɛ nə Feyine wɛ əb nè foon ɛytem se wen, nɛ lu vi wɛ əb fóon ɛychii se ghel ghɛ ɛ́ kuonmen, gese nɛɛy ge əbfua wɛ əb bɛɛy ghàà tese yɛ lu, yɛ lu. 18Ablaham nè fo ɛytem è se ki ɛykwaate ɛ kenəə kɛ ke nè yɛnsen ge lòó ke jia yî yɛ lu ge əb yi yɛ lu bay se əbtume se ɛydio, kɛn ka Feyine nè suuyen se wen ge: Lɛɛ jii yɛ ghon ə ghiɛ yî yɛ dio ɛ ten. 19Chèmè lu ka Ablaham nè se koken nguk əbviɛ, è se yɛne ge əbghun nə vii se shi ka kenkuo kefaa, nɛ wiy ə wene Sala gese bii wiy, əb nè báà buu se yɛ foo ɛytem se Feyine. 20Ablaham nè báà shiken se yɛ kuume nkakma yɛ Feyine nè foon se wen. Ɛybeeme wene sɛy nè taa è ndu kɛn ɛ mbiy, əb me se foo ɛykokse se Feyine; 21loote ke se əbluuy ge Feyine lòó əb nɛɛy kenəə kɛ əb kaken se yi. 22Feyine liɛ Ablaham ge wele wɛ̂ titiy bek ɛytem yɛ əb nè foon se wen. 23Giɛ sɛ ge: “Feyine me liɛ wen ge wele wɛ̂ titiy” lu nɛ ɛ́ nè báà nyak kɛn bek Ablaham. 24Ɛ́ nè nyak bek ghɛsen sɛy. Feyine nɛ̂y liɛ ghɛsen ge ghele ghɛ́ titiye, ghɛsen ghɛ ɛ́ foon ɛytem se wen wɛ əb nè losen Jesus wɛ Báàba ə wɛsen se ɛykuo. 25Ɛ́ nè lô fo Jesus Christ ɛ́ yuy bek mbee ə sɛsen, Feyine kase lose wen se ɛykuo ka ghɛsene yɛ lu ɛ titiy ɛ ɛyshiɛ nə Feyine.
