2 Makabiis 2
2
Jɛrimia zaŋ Naawuni biɛhigu shee suɣili tanti sɔɣi
1A yi lihi bɛ ni daa sabi binshɛŋa din daa niŋ sɔŋ litaafinim’ ni, a ni nya ka bɛ ni daa gbahi shɛb’ daba ni bɛ zaŋ ba chaŋ la, 2anabi Jɛrimia daa zali ba ni bɛ moomi buɣim maa shɛli mali chaŋ kaman bɛ ni pun yɛli shɛm maa. Ka anab’ maa ni daa zaŋ zaligu maa ti ba la nyaaŋa, o daa wuhi ba ni bɛ di tam Naawuni fukumsi zaligunim’ la yɛla bee nti chɛ ka anzinfa mini salima ni bɛ nachiinsi binyɛr’ shɛŋa bɛ ni ti yɛn nya nimaani ti zaŋ ba kpe yɔɣu. 3Ka o daa lan zaŋ lala yɛtɔɣa pam saɣisi ba ni bɛ di chɛ ka zaligu maa yi bɛ suhuri ni.
4Lala litaafinim’ maa puuni ka anab’ maa daa deei anabitali yɛligu ka daa zali ni Naawuni biɛhigu shee suɣili la mini Alikauli Adaka la dol’ o chaŋ Musa ni daa du nti nya Naawuni tiŋgbɔn shɛl’ la ni. 5Ka Jɛrimia daa du di zuɣu nti nya tampiŋ voli din nyɛ kpɛhili shee, ka o daa zaŋ Naawuni biɛhigu shee suɣili maa mini Alikauli Adaka la ni tulaale zim sara maligu bimbini la sɔɣi di ni ka zaŋ binyara tabilitabili di dunoli maa. 6Ka ninvuɣ’ shɛb’ bɛn daa dol’ o maa ni shɛb’ daa ti kana ti bɔri ni bɛ dalim nimaani soli amaa ka daa bi nya li. 7Jɛrimia ni daa wum lala ka o daa kpahi bɛ zuɣuri ni ka yɛli ba, “So n-ku baŋ di ni be luɣ’ shɛli hal ka Naawuni ti lan laɣim o niriba, ka wuhi ba o nambɔzɔbo. 8Di saha ka Naawuni ni ti yihi binyara ŋɔ palo, ka Naawuni jilima mini sagbani ti yina kaman di ni daa niŋ shɛm Musa saha la ni kaman Sulemaana ni daa suhi ni Jɛmbu Duu maa mali maani gahindili m-be kasi la.”
Sulemaana ni puhi chuɣu shɛm
9Di daa lan kahigi wuhi ni Sulemaana ni daa mali yɛm zuɣu n-daa chɛ ka o mali sara Naawuni jɛmbu duu la me n-naai mini di zaŋ ti Naawuni saha. 10Kaman Musa ni daa kul suhi Naawuni ka buɣim yi alizanda ni na ti di sara la shɛm, lala ka Sulemaana gba daa suhi Naawuni ka buɣim kana ti di bɛ ni zaŋdi sara shɛli nyɔri buɣim la zaa. 11Ka anabi Musa daa yɛli ni bɛ ni daa bi di alahichi sanyoo sara maa zuɣu n-daa chɛ ka buɣim maa di li maa. 12Lala n-daa nyɛ li, Sulemaana gba daa gbibila dabisa anii la.
Nɛhimia kundinim’ duu
13Yɛla ŋɔ nyɛla bɛ ni daa lan sabi shɛli yɛla Nɛhimia ni daa sabi omaŋmaŋ’ yɛla niŋ gban’ shɛŋa la ni, ka o daa lan piligi laɣisiri kundinim’ din tɔɣisiri nanim’ mini anabinim’ yɛla ni Dauda ni daa sabi yɛl’ shɛŋa ni nanim’ ni sabi gban’ shɛŋa din wuhiri alikauli palibu sara ni yɛn mali shɛm. 14Lala ka Judas gba daa doli laɣisi kundi shɛŋa zaa din daa bɔrigi saha shɛli tɔb’ ni daa lu ti zuɣu la, di zaa be ti sani. 15Dinzuɣu yi yi bɔri di shɛli, nyin’ timmi niriba na ka bɛ ti deei li tin ya na.
Bɛ yɛli ba ni bɛ puhim’ chuɣu
16Dinzuɣu ti ni maani shili ni ti puhi daɣiri ni yibu chuɣu ŋɔ, ka ti sabiri gbaŋ ŋɔ tiri ya na ni yi gba puhimi li di dabisa maa ni. 17Naawuni n-daa tilig’ o niriba, ka labisi tiŋgbɔŋ maa ti bɛ zaa, di mini nam ni maligumaanitali ni binyara zaŋ ti Naawuni 18kaman o ni daa lo alikauli shɛm o zalikpana puuni la. Ti mali tahima ni di ku yuui, Naawuni ni zo ti nambɔɣu ka laɣisi ti ti ni be dunia ŋɔ ni luɣ’ shɛli kam zaa na ti ʒil’ o tiŋgbɔŋ kasi ŋɔ ni. Dama ŋuna n-daa tiligi ti zaɣ’ biɛ’ titaŋa ni, ka mali nimaani ka di yi daɣiri ni.
Ŋun sabi litaafi ŋɔ yɛtɔɣa piligu
19Judas Makabius min’ o mabihi la ni Naawuni jɛmbu du’ tital’ la daɣiri ni yibu ni sara maligu bimbini zaŋ ti Naawuni la 20nti pahi tɔb’ shɛŋa bɛ ni daa tuhi Antiɔkus Ɛpifanɛs min’ o bia Yupato 21ni binshɛŋa din daa yi alizanda ni ka ninvuɣ’ shɛb’ bɛn daa tuhi Yɛhudianim’ daadiini zuɣu ni suhukpeeni la sanna la. Ka hal bɛ kalinli daa kul bi galisi maa zaa yoli, bɛ daa tuhi deei tiŋgbɔŋ maa zaa ka kari Chɛfirinim’ maa bahi. 22Bɛ daa lan deei Naawuni jɛmbu duu din yuli daa du dunia ni la ka di lan leei bɛ ni su shɛli, ka daa fa Jɛrusalɛm bahi, ka lan labisi fukumsi zaligu din daa yɛn kpihim’ la zali. Ka Naawuni ŋun nyɛ nirilim titalilan’ ŋɔ daa kul niŋdi ba nirilim.
23Jeesɔn ŋun daa nyɛ Sairiini nir’ la daa sabila dimbɔŋɔnim’ zaa niŋ kundi diba anu puuni, ka ti bɔri ni ti kpaŋ timaŋa n-kahim li niŋ kundi yini punni. 24Dama a yi zahim kalinli gbaliŋ shɛŋa din be di ni mini tom shɛli din yɛn beni zaŋ ti ninvuɣ’ shɛb’ bɛn bɔri ni bɛ karim yɛl’ shɛŋa din daa niŋ maa polo, 25ti nia nyɛla ti chɛ ka di niŋ bɛn bɔri ni bɛ karim li nyaɣisim, ka niŋ asama ti bɛn bɔri ni bɛ karim li n-gbaai li niŋ bɛ suhuri ni, ka niŋ bɛnkam karinda anfaani. 26Tinim’ bɛn mooi ti nini n-sabiri yɛla ŋɔ zaɣ’ jihi ŋɔ, di pala din be asama, amaa woligu puhiri ti mi ka ti gali gom di zuɣu 27kaman di ni kul bi niŋ asama ti ŋun maani chuɣu titali puhibu shili ni di ti niŋ sokam anfaani shɛm la. Amaa di zaa yoli, ti ni bɔri ni niriba pam nini tiɣi li zuɣu, ti ni tum tuun’ shɛli din to ŋɔ ni suhupiɛlli. 28Ti ni ŋmaai li la jiajia, ka lee chɛ di yɛlimaŋli maa ti ŋun daa tuui sabi li maa. 29Dama kaman ŋun su yili palli mɛbu fukumsi ni su yili maa tuma zaa fukumsi shɛm, ka ŋun mi yɛn piɛnti yili maa ni yuuni bɔri piɛnta shɛŋa din ni veeni yili maa shɛm la, man’ gba zahimbu puuni, lala n-nyɛ ti gba. 30Di nyɛla ŋun daa tuui sabi yɛlikura ŋɔ tuma ni o vihi viɛnyɛliŋga, ka chɛ ka o mini niriba tɔɣisi di yɛtɔɣa luɣ’ shɛlikam, ka zaŋ o dahima niŋ di yɛlimaŋli ni. 31Amaa ŋunkam bɔri ni o sabi yɛtɔɣa maa jiajia, bɛn’ tim’ o soli ka o kpaŋ omaŋ’ yɛl’ li jiajia, ka chɛ di yɛlimaŋli. 32Dinzuɣu pumpɔŋɔ chɛliya ka ti piligi ti lahibali maa, ka di lan pahi shɛli ti ni pun yɛli shɛm maa zuɣu, dama ti yi chɛ ka ti piligu ni yɛtɔɣa ŋɔ wɔɣa, ka ti ŋmaai ti kurimbuni ha yɛtɔɣa maa jia, ti tum jɛrilim.
Dagbani Bible with Deuterocanonical Books © Bible Society of Ghana, 2011.