Matiyo 8
8
Yesu gee nui ɠɛdɛ fai
(Maleke 1:40-45; Luke 5:12-16)
1Yesu zeɠeai ma gizei ma, é yei, bɛbɛ wolai ʋilɛni polu. 2Gee nui ta maaɓuɠani ba, é nɔkɔ kɔɠɔwu, é ɠɛ ma: «Màliɠii, ni ɗa vaana bu, ɗa zoo è ɲàde.»
3Yesu yeemaaleni, é vɔɔɠu ba, é ɠɛ ma: «Gè vaa bu, ɲade!» Gaamago nɔ, zunui naa ɲadeni, é ɠula ná-gee zeeɓɛi zu. 4Yesu ɠɛni ma: «Dama, nii kɛai ga ɗe ʋɛ, è mina bo nu nɔpɛ ma. Kɛlɛ li, è ɓɔɠɔ lɛ ga zalaɠa ɠula nui, é è ɠɛʋele ʋɛtɛ, naa ʋoluma è zalaɠai ɠula, eɠɛʋelei Moize ma levei veeni la. Naa ɠa ɠɛ ga zeele woo, nuiti bɛ.»
Yesu salaʋusu ɠundiɠii ná-botiɠɛ nui ɠɛdɛ fai
(Luke 7:1-10)
5Yesu lɛɛzuʋɛ Kapɛɛlɛnawume taazuʋɛ, Wɔlɔme zalaʋusu ɠundiɠi gila ge daaɠomini, é maanɛɛnɛ, 6é ɠɛ ma: «Màliɠii, nà-botiɠɛ nui ɠa laani nà-pɛlɛi wu, kɔlɔgi zaai ma, toɠa zoolɛzu ga ʋe gola.» 7Yesu ɠɛni ma: «Nà liizu, gè kɛdɛ.» 8Salaʋusu ɠundiɠii ɠɛ ma: «Màliɠii, gè la kula ɠɛɛni su ga è ʋa lɛ nà-pɛlɛi wu. Kɛlɛ woo ɲɛ gila bo nɔ, nà-botiɠɛ nui ɠa ɠɛdɛ. 9Tɔɔzei nà ɓɔɠɔi nà nà-kundiɠiiti ta-zobogi wu, salaʋusuiti ɓalaa ta nà-devei wu. Nà ɠɛɛna gila ma: ‹Li!›, toɠa liizu. Nà ɠɛɛna taɠili ma: ‹Ʋa!›, toɠa ʋaazu. Nà ɠɛɛna ɓalaa nà-duɔi ma: ‹Nii ɠɛ!›, naa ɠa é kɛɛzu.»
10Yesu naama wooi mɛnigai ma, gola laavɔɔni. É ɓɔɛni nuiti pɔ, ti ɠɛni polu, é ɠɛ ti ma: «Gè bo wo ma ga gaamai, gè la dɛ nii ɠɛɠala ɠidaaleʋei ta ɠaani, anɛɛ Izilayɛle nuɓusɛiti saama. 11Gè bo wo ma, nu mɔinmɔin ka zeɠe folo ɠulazu ʋelei ta folo liizu ʋelei, ti ʋa, ti zei fɛti laamii wo taɓalii ɠakala ta Abalaame, ta Izaake, naa ʋɛɛ Zakɔɓe ʋa, geeɠɔlɔgi ma masadai zu. 12Kɛlɛ zɔiti mu maanɛɛni ga ti geeɠɔlɔgi ma masadai zɔlɔɔ ga tɔnɔ, naati ta ʋili ya etea ʋelei kpidii zu. Miná ɠa gɔlɔi ta ɲiiga ziɛgai ɠa ɠɛ ná.»
13Naa ʋoluma, Yesu ɠɛni salaʋusu ɠundiɠii ma: «Li ɗa-ɠoizu, é ɠɛ è ʋɛ, eɠɛʋelei soloogai la ɗa-ɠidaaleʋei ma.» Naama yeeɠɛɠalai nɔ, ná-botiɠɛ nui ɠɛdɛni.
Yesu seeɓɛ nu mɔinmɔin kɛdɛ fai
(Maleke 1:29-34; Luke 4:38-41)
14Naa ʋoluma, Yesu liini Piyɛlɛ ná-pɛlɛi wu. É naa mɔɛin ɠaani laani ga kɔlɔkpadimai. 15É naa zoni zeei ʋa, kɔlɔkpadimai ɠaayei. Anzanui wuzeɠeni, é tɔɔzei ga é ɗa maaleʋebo.
16Kpɔkɔi zeeliai ma, ti ʋaani pɔ ga inɛ su nu mɔinmɔin. É zɛnvu ɲɔi naati kpɛɛni ga daawooi nɔ. É seeɓɛ nuiti pɛ kɛdɛni ɓalaa. 17Ʋele ɠana GALA goo wo nui Ezayi laawooi ʋilɛni la su, nii é boni ga:
«Ada-maalɛɠɛfɛgiti ka é ti zeɠeni ga ɠasɔ,
é ada-zeeɓɛ ɠasɔiti daani ɓɔɠɔ unma.»#8:17 Eza 53:4.
Nu fai pɛ zɛ ná, è ʋilɛ Yesu ʋolu
(Luke 9:57-62)
18Siɛgi zu Yesu kaani la ga bɛbɛi ɠakugɛ ma, é devei veeni ná-kaladopoiti zea ga ti leʋe ziɛ ʋoluʋelei. 19Tɔ kalamɔin ɠila ge maaɓuɠani ba, é ɠɛ ma: «Kalamɔn, ʋɛ nɔpɛ è liizu ná, nà ʋilɛsu è ʋolu.» 20Yesu gooɠaaʋoteni, é ɠɛ ma: «Zeɠei ɠa zazagoiti bɛ, daɠagi ɠɛ wɔniiti bɛ, kɛlɛ ada la Nu ná-Doun Zunui ʋɛ, ʋɛ a ungi la ná.»
21Kaladopoi taɠili ge ɠɛni ma: «Màliɠii, va bu, gè li dɛ, gè kɛ̀ɛ maaɠulu.» 22Kɛlɛ Yesu gooɠaaʋoteni, é ɠɛ ma: «Ɗɔun, ʋilɛ nɔ pòlu, gɔvɛiti zɛ ná, ti ta-ʋoomaiti maaɠulu.»
Yesu fiilɛ wolai ɠaayei vai
(Maleke 4:35-41; Luke 8:22-25)
23É lɛɛni keingi zu ta ná-kaladopoiti. 24Gaamago fiilɛ wolai lokoleʋeni ziɛi ɠa, ziɛ lakpatakpagiti ti keingi maaɓɔle, ti ɗa ɓudɛ maazu. Naama ziɛgi zu Yesu ɠɛni laani, é ɗa ɲi. 25Kaladopoiti ti maaɓuɠani ba, ti maaloɠa, ti ɗa ɠɛ ma: «Màliɠii, gi ɠizo, gi undaa ɠana ʋili!» 26É ɠɛni ti ma: «Lee vaa zu wo luazu? Ee, wa-ɠidaaleʋei lɔiʋɛ gola!» É wuzeɠeni, é devei ve fiilɛi ta ziɛi ya ga sɛbɛi, woza ɠaalɛi tɔɔntɔɔn. 27Ti pɛ ti laavɔɔni, ti ɗa ɠɛ ma: «Nui ma zii ɓɛgele ɠa ga zunui tɛi, nii fiilɛi ta ziɛi ti ɠolozu gooi ʋɛ?»
Yesu inɛ su nu felegɔiti balo vai
(Maleke 5:1-20; Luke 8:26-39)
28Seeliai ma ziɛi ʋoluʋelei, Gadala nuiti ta-yooi zu, inɛ su zunu felegɔ ɠulani kabama ʋelei, ti ʋa, ti daaɠomi. Ti ɲɔu ʋelei ma, nu nɔpɛ ge la ɓena zoo, é ʋa leʋe ga naama ʋelei. 29Ti tɔɔzeini ga ɓainga, ti ɗa ɠɛ ma: «GALA Doun Zunui, lee ɠa è pɔ ga è sei gi ma? È ʋaaʋɛ gi ɓɔlɔzu ma yeeluɠɔ ɓaa?»
30Ná ɠobaʋɛ, boi kpulu gola ɠɛni ná, ti ɗa daamii wo. 31Inɛgiti ti Yesu maanɛɛnɛni ga gola, ti ɠɛ ma: «Ni ɗa ʋaazu gi ɓɛɛzu, gi leʋe, gi lɔ boi kpulugi nuu zu.» 32É ɠɛni ti ma: «À li!» Inɛgiti ti ɠulani zunu felegɔi naati su, ti lɔ boigiti su. Gaamago, boi kpulugi pɛ ge yeini ga kpizɛ gize ɠakazuʋɛ, ti ʋu ziɛi wu, ti pɛ ti undaaʋili ziɛi wu. 33Boi makɛ nuiti ti ʋelani, ti li taazuʋɛ, ti naa pɛ suɠula, nii é ɠɛɛni ga inɛ su zunu felegɔiti. 34Naazu, taazuʋɛ nuiti pɛ ti ɠulani, ti Yesu laaɠomi. Ti kaai ma, ti maanɛɛnɛni ga é zeɠe ta-yooi ɠa.
Terpilih Sekarang Ini:
Matiyo 8: GDZ
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
