Matiyo 15
15
Yesu ta kalagi nii Zuifuiti ti-mɛmɛwolaiti ti zɛgai
(Maleke 7:1-13)
1Naama ziɛgi zu, Faliziɛin tanigaa ti zeɠeni Zeluzalɛme ta tɔ kalamɔin tanigaa, ti maaɓuɠa Yesu ʋa, ti gaazaɠa, ti ɠɛ ma: 2«Lee vaa zu ɗa-ɠaladopoiti ti la ɠolozu kɛwolaiti kɛɛ vaa wɔlɔmaiti bɛ? Tɔɔzei ta ɠɛna daami woga, ti la ɗa ga yeagba, eɠɛʋelei maanɛai é ɠɛ la.» 3Yesu ti wooɠaaʋoteni, é ɠɛ ti ma: «Wɔun, lee vaa zu wo kololalai ɠɛɛzu ga GALA ná-devei, nii a kɛ wo ɗa ʋilɛ wa-vaa wɔlɔmaiti nɔ ʋolu? 4Mazɔlɔɔ GALA ge ɠɛni ma: ‹È-ɠɛɛ lɛbi ta è-lee,›#15:4 Ɛgz 20:12; TSV 5:16. é ɠɛ mɔnɔ: ‹Zɔi nɔpɛ é kɛɛɠɛ ɓaa dee ɠotozu, ta naama nui ʋaa.›#15:4 Ɛgz 21:17. 5Kɛlɛ wɔun, wa ɠɛɛzu ma: ‹Ni nui ta a ɠɛɛna kɛɛɠɛ ɓaa dee ma: Nii nà la kɛ ga ɗa-ɓɔbai, naa ɠɛa ga vebɛani GALA bɛ,› 6kuye la mɔ naama nui ma ga é kɛɛɠɛ ɓaa dee lɛbi. Ʋele ɠana wo GALA daawooi zeɠezu la ma, wo ɗa ʋilɛ wa-vaa wɔlɔmaiti nɔ ʋolu. 7Wɔi wo ga woovele nuiti! Wa ɠa GALA goo wo nui Ezayi ɠɛni vaazu wo ma, siɛgi zu é ɠɛni ɠɛɛzu la ma:
8‹Niima nuɓusɛiti ta dɛ̀bizu ga ti-lakɔlɔgiti nɔ,
kɛlɛ ti-yiimaʋɛ wola maaɠoozaʋɛ bà.
9Wafuun lɛbiya nɔ ɠa ti feezu bɛ̀,
tɔɔzei kalagi niiti ti bosu,
naa pɛ ka nɔ ga nuiti ta-leveiti.›#15:8-9 Eza 29:13 bogɛ é zoloo Gɛlɛke woo zɛʋɛ wɔlɔmai ma.»
Anii niiti ti nu ɠɔzɔzu
(Maleke 7:14-23)
10Naa ʋoluma Yesu bɛbɛi lolini, é ɠɛ ma: «À woilo gòoi ma, wo gaaɠa ga pagɔ. 11Nii é lɔɔzu nui laaʋɛ, naa lɛi a ɗa kɔzɔ, kɛlɛ nii mu é ɠulazu, naa ɠa a ɗa kɔzɔ.»
12Kaladopoiti ti maaɓuɠani ba, ti ɠɛ ma: «È kwɛni nɛi ga è ɓaaɠogɛ Faliziɛinti ma ga è ɓɔɛ wooi?» 13É ti wooɠaaʋoteni, é ɠɛ ma: «Gulu nɔpɛ, nii Kɛ̀ɛ é geeɠɔlɔgi zu, é la siinni, naama wului lɔɔ ɠa ɠula. 14À ti yɛ ná. Gaazuɠole nuiti be, ti losu gaazuɠole nu ɠiligiti tuɠɔ! Tama ni gaazuɠole nui a lona bɔɔla gaazuɠole nui luɠɔ, ti felegɔ pɛ ta loo zeɠei zu.»
15Piyɛlɛ ɠɛ ma: «Faalaalii nii é bogai feya, poluʋɛ lɛ ga giye.» 16Yesu ɠɛni ti ma: «Koo, wɔun, wa ɓalaa wo la faa ɠaaɠaazu ɓaa? 17Wo la gaaɠaazu ga nii kpein é lɔɔzu nui laaʋɛ, naa ɠa liizu kogi zu, naa ʋoluma é ʋili ya dɔɔɠuzuʋɛ? 18Kɛlɛ nii é ɠulazu nui laaʋɛ, naa ɠa zeɠezu ziimaʋɛ, naa ma ka a ɗa nui ɠɔzɔ. 19Tɔɔzei nui yiimaʋɛ ɠa kisiɛ ɲɔiti ta ɗa zeɠe ná, ti nui liizu nu ʋaa vai ta wɛɛnziɛgi ma, naa ʋɛɛ koloɠologi ta unmai ʋa, ta zɛɛ zeele wooiti, naa ʋɛɛ tɔɠɔ ɠoloɠolo faiti ba. 20Naama vaiti ka ta ɗa nui ɠɔzɔ. Kɛlɛ nu laamii ʋa, é la yeagbani, naa la zooga nui ɠɔzɔzu.»
Kidaaleʋei é ɠɛni anzanui ya, é la ga Zuifui ta
(Maleke 7:24-30)
21Yesu zeɠeni miná, é li Tiil ta Sidɔn yooi zu. 22Kanaan anzanui ta ɠɛni miná seii zu, é ʋaani, é tɔɔzei ga ɓainga, é ɗa ɠɛ ma: «Màliɠii, Davide ná-Doun Zunui, gàazumaawɔinɠa! Inɛgi ɠa dòun anzanui zu, é ɗa kpɔlɔ ga gola.» 23Kɛlɛ Yesu la ɠɛni gooɠaaʋote gila kpalaa feeni zea. Ná-kaladopoiti ti maaɓuɠani ba, ti ɠɛ ma: «Kpɛ, é li, tɔɔzei é la zeɠezu ade ʋolu ga kpeei.» 24Yesu ɠɛ ma: «Tèʋegɛ Izilayɛle ʋɛlɛyeɠei ma ʋaalagiti nɔ ma, niiti ti loai ya.»
25Kɛlɛ anzanui ʋaani, é nɔkɔ bu, é ɠɛ ma: «Màliɠii, ɓɔ bà kae!» 26É naa wooɠaaʋoteni, é ɠɛ ma: «Maa la nɛɛni ga nu doungoiti kɔnɔgi ɠula ti ya, é pili gilɛ goiti bu.» 27Anzanui ɠɛni ma: «Gaama ʋe, Màliɠii, kɛlɛ gilɛ goiti ta ɗa daamiani kpulukpulu koiti mi, niiti ti ɠulazu ti-maliɠiiti zeewu, ti loo zooi ma.» 28Yesu zɛba é gooɠaaʋote, é ɠɛ ma: «Ee, anzanu, ɗa-ɠidaaleʋe ɓaɠoʋɛ ɗɛ! É ɠɛ è ʋɛ eɠɛʋelei è pɔ la.» Tama naama yeeɠɛɠalai nɔ, ná-doun anzanui ɠɛdɛni.
Yesu seeɓɛ nu mɔinmɔin kɛdɛ fai
29Yesu zeɠeni naama yooi zu, é leʋe Galilé ɗɛ wolai laaʋɛ. É lɛɛni gizei ta ma, é zei ná. 30Bɛbɛ mɔinmɔin golai ʋaani pɔ. Ti ʋaani ga dɛkpu nuiti, gaazuɠole nuiti, ɓoɓoiti, maalɛɠɛfɛ nuiti, ta seeɓɛ nu mɔinmɔin kiligaa. Ti ʋaani ga tiye Yesu ɠɔɠɔwu. É ti pɛ kɛdɛni. 31Bɛbɛi wola laavɔɔni ga ti ɗa ɓoɓoiti ka, ti ɗa ɓɔɛ, maalɛɠɛfɛ nuiti ti ɗa ɠɛdɛ, dɛkpu nuiti ti ɗa ziɛ, gaazuɠole nuiti ti ɗa wozaɠa. Ti pɛ ti tɔɔzeini ga ti ɗa lɛbiyai ve Izilayɛle ná-GALAGI ʋɛ.
Yesu nu waanaanigɔi (4.000) ɠɔnɔkula vai
(Maleke 8:1-10)
32Yesu ná-kaladopoiti tolini, é ɠɛ ti ma: «Bɛbɛi nii maawɔin sòga, mazɔlɔɔ folo saʋagɔ ɠa ti kòba, daamiani nɔpɛ ge la ti ya. Gè la pɔ ga pului yɛ ti ma, gè ʋa ti ɠaaɠale ma, zɛbɛi mina ʋa ɠulazu ti ya pelei zu.» 33Kaladopoiti ti ɠɛni ma: «Mini ɠa gá ɓulu zɔlɔɔ ná, teʋebai nii zu, é ʋa kula ɠɛ bɛbɛi nii ʋa?» 34Yesu ɠɛni ti ma: «Ɓulu lielegɔ ɠa é wo ya?» Ti ɠɛ ma: «Ɓulu lɔfela, naa ʋɛɛ kale goi tago ʋa.» 35É zɛba é bɛbɛi leve ga ti zei zooi ma. 36Naa ʋoluma, é ɓulu lɔfelai ta kaleiti seɠeni. Kpegai ma ga mamagi ve GALA bɛ, é ti ɠaleɠaleni, é ti ve kaladopoiti zea. Naati ti gaaɠwɛɛni bɛbɛi ʋa. 37Ti pɛ ti daamii woni, ti yiɠo. Kaladopoiti ti ma ɓulukpulugi mɔtai ɠaalɛɛni ba, é ɠɛ ga kpɔlɔ dɔfela. 38Zɔiti ti daamii naa woni, ti ɠɛni ga zunu waanaanigɔ (4.000), anzanuiti ta doungoiti ti ɠaa la vɔlɔ luni. 39Yesu bɛbɛi ɠaaɠalegai ma ma, é lɛɛni keingi zu, é li Magadan yooi zu.
Terpilih Sekarang Ini:
Matiyo 15: GDZ
Highlight
Kongsi
Bandingkan
Salin
Ingin menyimpan sorotan merentas semua peranti anda? Mendaftar atau log masuk
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
