Yokaana 11
11
Okuyimboolwa kwa Lazaalo
1Awo omusaiza eyayetebwanga Lazaalo nʼalwala. OLazaalo yaabbanga Bbesaniya, oMalyamu nʼomugande oMaliza gyebaabbanga. 2OMalyamu oni yaali munyaanya wa Lazaalo eyaali nalwaire, era niye oyo eyasensere amafuta oku Mukama nʼasusuulisya eisoke ryamwe amagulu ga Yesu. 3Abanyaanya ba Lazaalo abo ni baweereza obukwenda ewa Yesu obukukoba buti, “Mukama, omunywani waamu mulwaire.” 4OYesu niyafunire obukwenda buni nʼakoba ati, “Obulwaire buni ti bwa kwita Lazaalo baitu bwa kuweesya Kanca kitiinisya era okwakala omu bwo nʼoMwana wa Kanca akwiza okuweebwa ekitiinisya.” 5OYesu yaali munywani Maliza nʼomugande oMalyamu nʼoLazaalo. 6Baitu oYesu niyawuliire nti oLazaalo mulwaire, nʼayosawo ebiro ebindi bibiri omu kifo weyaali. 7Ale awo nʼakoba abeegesebwa baamwe ati, “Twireyo e Buyudaaya.” 8Bo ni bamwiramu bati, “Mwegesya, ebiro bidooli ebyakaire, abeebemberi bʼaBayudaaya baagezereku okukukubba amabbaale, eyote nigyo okwendya oire?” 9OYesu nʼairamu ati, “Esaawa za kyengeezi kya isana tizibba ikumi na ibiri? Omuntu atambula emisana tiyeekona, kubba abba akubona olwa kyengeezi kya nsi eni. 10Baitu nʼatambula obwire yeekona kubba tiwabbaawo kyengeezi.” 11OYesu niyamaare okubaza bini, ale nikwo okubakoba ati, “Omunywani waiswe oLazaalo awungukire, baitu kanyabeyo mmusisumule.” 12Abeegesebwa baamwe ni bairamu bati, “Mukama, niyaabba awungukire, abba yawona.” 13OYesu niyabazire okuwunguka yaali akumanyisya kufa, baitu abeegesebwa baamwe baalowoozere nambu yaali akumanyisya kuwunguka bulo. 14Obwo nʼakyatula nti, “OLazaalo afiire 15baitu oku lwanywe nsemereirwe nje obutasangwayo ale leke mwikirize. Ati twabe egyali.” 16OTomasi ayetebwa omulongo nʼakoba abeegesebwa abaira baamwe ati, “Twabe tufeere amwei naye.”
OYesu niye kuyimbooka nʼobwomi
17OYesu niyaikire ewa Maliza nʼoMalyamu nʼasanga oLazaalo niyaakamala ebiro binai naziikirwe. 18Bbesaniya kyali emairo ampi ibiri okuliga eYerusaalemu, 19era abeebemberi bʼaBayudaaya baingi baali baizire e wa Maliza nʼoMalyamu okukungubaga nabo olwa kufeerwa omuganda waabwe. 20OMaliza niyawuliire nti oYesu aizire, nʼawuluka okumutangiira, baitu ye oMalyamu nʼasigala eka. 21OMaliza nʼakoba oYesu ati, “Mukama, niwaakuli ani omuganda wange tiyaakufiire. 22Baitu nkumanya nti oKanca yakuweerya kyewakamusaba kyona kyona.” 23OYesu nʼamukoba ati, “Omugandaawo akwiza okuyimbooka.” 24OMaliza nʼairamu ati, “Mmaite nti aliyimbooka omu kuyimbooka okwa kiro kya mpero.” 25OYesu nʼamukoba ati, “Ninje kuyimbooka era ninje bwomi. Buli muntu anyikiriza alibba mwomi gonze nafiire; 26era buli mwomi ngʼanyikiriza talifa. Kini okukiikiriza?” 27OMaliza nʼamwiramu ati, “Mukama, nkukiikiriza era nkwikiriza nti niiwe Kurisito, oMwana wa Kanca eyaali owa kwiza omu nsi.” 28Niyamaare okubaza bini, nʼairayo eka nʼairya omugande oMalyamu oku ntando nʼamukoba ati, “Omwegesya aikire era akukukweta.” 29OMalyamu niyawuliire kini, nʼaimuka mangu mangu nʼayaba egiri OYesu. 30Ani oYesu yaali nacaali kwingira mu Bbesaniya, yaali nacaali mu kifo oMaliza weyamusangire. 31Abantu abaali nʼoMalyamu omu nyumba nibakumugumya nibaaboine engeri gyeyaimukire amangu nʼawuluka enzai, ni bamusengeerya nibakulowooza nti ayabire ku mbi akungire eyo. 32OMalyamu niyaikire omu kifo oYesu weyaali niyamuboine nʼabundaala ampi nʼamagulu gaamwe nʼakoba ati, “Mukama, niwaakuli ani omuganda wange tiyaakufiire.” 33OYesu niyaboine oMalyamu nakukunga nʼaBayudaaya abaizire naye boona nibakukunga nʼakwatwa enaku era nʼawura ekibaraazi. 34Nʼabuulya ati, “Mwamutaire ayi?” Ni bamwiramu bati, “Mukama, iza obone.” 35OYesu nʼakunga. 36Olwʼekyo abeebemberi bʼaBayudaaya ni bakoba bati, “Kaabbaire akumwendya!” 37Baitu abamwei oku bo ni bakoba bati, “Omuntu eyaigwire amaiso ga musaiza odi, tiyasoboire kutangira Lazaalo okufa?”
OYesu akuyimboola oLazaalo
38OYesu ni yeeyongera okukwatwa enaku, era nʼaika oku mbi. Embi gini yaali mpuku eyaali nekingirwe eibbaale. 39Nʼalagira ati, “Mutoolewo eibbaale.” OMaliza omunyaanya wa rufa nʼakoba ati, “Mukama, baitu ati akuwunya, kubba ati ebiro binai naziikirwe.” 40Awo oYesu nʼakoba ati, “Tinakukobere nti niwaanyikiriza wabona ekitiinisya kya Kanca?” 41Awo ni baiyawo eibbaale. OYesu nʼarola aiguru nʼakoba ati, “Ite wange nkukwebalya olwa kumpura. 42Mmaite nti bulinca ompura, baitu kini nkibazire olwa kugasirwa kwʼabantu abeemereire ani; baikirize nti niiwe wantumire.” 43Niyamaare okubaza bini nʼayamiira omwiraka erikooto ati, “Lazaalo, wuluka!” 44Omusaiza eyaali nafiire nʼawuluka embi, emikono gyamwe nʼamagulu nibiziringirwe omu looti za liiri nʼobusyo bwamwe nibusemberwe nʼekitambaala. OYesu nʼabakoba ati, “Mumusandabuleku erooti ezo era mumuleke ayabe.”
Obuliirani bwa kwita oYesu
(Mat 26:3-5; Mak 14:1-2; Luk 22:1-2)
45Abantu baingi okwabo abaizire okukungubaga nʼoMalyamu nibaaboine oYesu byeyakoore, ni bamwikiriza. 46Baitu abamwei ni baaba egiri aBafarisaayo ni babakobera oYesu byeyaali nakoore. 47Olwʼekyo abakabona abakulu nʼaBafarisaayo ni baikaarya oLukiiko lwʼaBayudaaya oLukulu, ni beebuulya bati, “Ati tukole ki? Omusaiza oni kaakukola obubonero obwewuunyisya bwingi! 48Nitwamuleka okwongera okubukola, buli omwei akwiza kumwikiriza, awo abeebemberi aBarooma leke batwimuukiire bawereekeerye eiramyo ryaiswe nʼeiyanga ryaiswe!” 49Omwei oku bo eyayetebwanga Kayaafa, eyaali oSaabakabona omwaka ogwo nʼakoba ati, “Nywe! Timukweteja kigambo kini. 50Timukusobola kubona nti omuntu omwei okufa oku lwʼabantu kikukira okuwereekeerya eiyanga ryona ryona?” 51Mananu kini tiyakibazire mu magezi gaamwe baitu nkʼoSaabakabona owa mwaka ogwo yaali akulanga nti oYesu yaali akwaba okufeereera eiyanga ryʼaBayudaaya, 52tikubafeereera kyonkai baitu nʼokwirya amwei abantu ba Kanca boona boona abaali bararangire.
53Okuliga oku kiro ekyo nʼokweyongerayo abeebemberi bʼaBayudaaya ni basala amagezi okwita oYesu. 54Olwʼekyo oYesu tiyaireyo kutambula rubona omu Buyudaaya, baitu nʼaligayo nʼayaba omu kifo ekiri ampi nʼeirungu, kini nikyo akabuga akayetebwanga Efulaimu nʼabba eyo nʼabeegesebwa baamwe.
55Ekiseera kya Bugenyi bwa Kwakalibwaku nikyali kiigereire, abantu baingi ni baliga omu byalo ni baaba e Yerusaalemu okukola omurwa ogwa kweyerya obugenyi nibucaali kubbaawo. 56Ni batoolya oYesu era nibaali bakumbaine omwiramyo, ni babuulyangana bati, “Mukulowooza mutyai? Tiyaize ku bugenyi?” 57Abakabona abakulu nʼaBafarisaayo baali balagiire nti eyaabba namaite oYesu waali ateekwa okubakobera leke basobole okumukwata.
നിലവിൽ തിരഞ്ഞെടുത്തിരിക്കുന്നു:
Yokaana 11: RUULI-NYALA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
