Yokaana 10
10
Omuliisya nʼentaama zaamwe
1Awo oYesu nʼakoba ati, “Kambakobere amananu, omuntu aingira omu kizangi natayakaara mu mulyango baitu nʼatemba era nʼayakaara aiguru wa mwomo#10:1 Ebizangi omu nsi eyo byabbanga bya mwomo. gwakyo, abba munyagi. 2Omuntu ayakaara omu mulyango niye abba omuliisya wa ntaama. 3Era omulindi amukinguurawo omulyango, nʼentaama ziwura eiraka ryamwe. Entaama zaamwe azeeta amabara gaazo nʼaziwulukya enzai. 4Ezaamwe naziwulukya enzai, azeebembera zoona ni zimusengeerya kubba zimaite eiraka ryamwe. 5Entaama ezo ogwezitamaite tizimusengeerya baitu zimwirukakumbe kubba tizimaite iraka ryamwe. 6OYesu yabazire nabo ebigambo ebyo baitu kyeyaali akubakoba tibaakyetejerye.”
7Olwʼekyo oYesu nʼairamu nʼakoba ati, “Kambakobere amananu, ninje mulyango entaama mwezaakala. 8Abanyeekereire okwiza baali baibbi era banyagi, baitu entaama tizaabawuliriirye. 9Ninje mulyango; buli ntaama ayakaara omu nje alijunwa. Ontaama oyo yaakwingiranga era nʼawuluka leke abone ekisiko. 10Omwibbi ndoowo kindi kyaiziira okutoolaku okwibba, okwita nʼokuwereekeerya baitu nje naizire leke entaama zibbe nʼobwomi era zibbe nabwo omu bwizuli. 11Ninje muliisya wa ntaama omusai. Omuliisya wa ntaama omusai aweeryayo obwomi oku lwa ntaama. 12Omuntu omupangisyengano takola nkʼomukama wa ntaama. Omuntu nkʼoyo nabona ekibbwene nikikwiza aleka entaama nʼairuka, ekibbwene ni kirumba entaama ni kizirarangya. 13Omuntu oni airuka kubba mupangisyengano atalumiirwa ntaama. 14Ninje muliisya wa ntaama omusai; entaama zange nzimaite era zoona zimmaite. 15NkʼoIte wange nammaite njeena nimwo mmumaite, era mpeeryayo obwomi bwange oku lwazo. 16Ndina entaama ezitali za mu kizangi kini, baitu nteekerwe zoona okuzireeta leke ziwurenge eiraka ryange. Obwo wakwiza okubbaawo ekisibo kimwei nʼomuliisya omwei. 17OIte wange anyendya kubba mpeeryayo obwomi bwange ale leke mbweiriiryete. 18Ndoowo gonze omwei eyaakubunyiyaku, baitu mbuweeryayo mu kweyenderya kwange. Ndina obuyinza okubuweeryayo era nʼobuyinza obwa kubweiriiryate. Ekiragiro kini nakiwairwe Ite wange.”
19Niyabazire ebigambo bini, aBayudaaya ni bairamu okwetemamu. 20Baingi oku bo ni bakoba bati, “Omuntu oni aliku omuzumu era agwire eiralu, tutamuwuliirya” 21Baitu abandi ni bakoba bati, “Omuntu aliku omuzumu tabaza atyo. Ye omuzumu gusobola okwigula amaiso agaigali?”
Obutaikiriza bwʼabeebemberi bʼaBayudaaya
22Awo okwa mutitiiro, Obugenyi bwa Kuwonga Eiramyo omu Yerusaalemu ni bwika. 23OYesu niyaali akutambulatambula omu kisaki kya Solomooni omu mbuga za iramyo, 24abantu ni bakumbaanira waali ni bamubuulya bati, “Olikanga di okutuleka tutamaite? Niwaabba niiwe Kurisito kitwatuure.”
25OYesu nʼairamu ati, “Nakibaatuliire, baitu ni mutaikiriza. Ebyamaano byenkoora omwibara rya Ite wange nikwo kwatula kwange, 26baitu timwikiriza kubba timuli ntaama zange. 27Entaama zange ziwura eiraka ryange; nzimaite era zinsengeerya. 28Nziweerya obwomi obutawaawo, tiziriwereekeera era ndoowo gonze omwei aliziinyagaku. 29OIte wange eyazimpaire niye akira abantu boona boona amaani, olwʼekyo ndoowo gonze omwei asobola okubamunyagaku. 30Nje nʼoite wange tuli muntu omwei.”
31Bwonate abeebemberi bʼaBayudaaya ni bakwata amabbaale okugamukubba, 32baitu oYesu nʼabakoba ati, “Mbalangire ebyamaano ebikooto bingi okuliga ewa Ite wange. Oku byo kyemukunkubbira amabbaale kiri ayi?” 33Abeebemberi bʼaBayudaaya ni bamwiramu bati, “Tukukubba amabbaale ti lwa kyamaano kyona kyona okwebyo, baitu lwa kuzuma Kanca, kubba oli muntu buntu baitute niweeyeta oKanca.”
34OYesu nʼabairamu ati, “Omu mateeka gaanywe ekyawandiikiibwe nti, ‘Nkobere muli bakanca?’#Zab 82:6 35Oba ngʼabantu abaawairwe ekigambo kyamwe yabeetere bakanca nga nʼebyawandiikiibwe tibiyinduka, 36obwote oyo eyayawiirwe oIte waamwe nkʼomwana waamwe omwenyenere era nʼamutuma omu nsi yayetwa atyai? Muyinza mutyai okukoba nambu nzumire oKanca nimbazire nti ‘Ndi Mwana wa Kanca?’ 37Ninaabba ntakoore Ite wange byakola, mutanyikiriza. 38Baitu ninaaba nga nibyo nkoore, gonze nimwabba mutanyikiriize, akiri mwikirize ebyamaano leke mumanye era mweteje nti oIte wange ali munje njeena omu ye.”
39Awo ni bairamu okugezaku okumukwata baitu nʼababulaku. 40Awo oYesu nʼairayo enseeri wa Yoludaani omu kifo oYokaana gyeyabatiriize, nʼabba eyo, 41abantu baingi ni baizanga egyali, ni bakobanga bati, “Gonze ngʼoYokaana tiyakoore kabonero koona koona akeewuunyisya, baitu byeyabazire oku musaiza oni byona byona biikire.” 42Era omu kifo ekyo abantu baingi ni baikiriza oYesu.
നിലവിൽ തിരഞ്ഞെടുത്തിരിക്കുന്നു:
Yokaana 10: RUULI-NYALA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
