Yokaana 12
12
OYesu akusenswaku amafuta e Bbesaniya
(Mat 26:6-13; Mak 14:3-9; Luk 7:36-50)
1Niwakubulayo ebiro mukaaga oBugenyi bwa Kwakalibwaku okwika, oYesu nʼayaba e Bbesaniya ewa Lazaalo oYesu gweyaali nayimboire okuliga omu bafu. 2Ni bamuteekaniriza eyo ekiibulo oMaliza kyeyajunireku okugabula; oLazaalo yaali omwei okwabo abaaliriire oku meeza nʼoYesu. 3Awo oMalyamu nʼarola ecupa yʼamafuta aga muwendo ogwingi ageetebwa naradi nʼagasensa oku magulu ga Yesu, nʼagasusuulisya eisoke ryamwe. Obucuunyi bwʼamafuta ni bwizula enyumba yoona yoona. 4Omwei oku beegesebwa ba Yesu, eyayetebwanga Yuda Isikariyooti eyaali nakwaba okumuliirana nʼakoba ati, 5“Lwaki amafuta gani gataatundirwemu empiiya ezikwika empeera eya mwaka ogumwei,#12:5 Empeera eya mwaka ogumwei Ebbaibbuli ezimwei zirina “edinaari ebikumi bisatu.” ni ziweebwa abaseege?” 6Kini yakibazire ti lwakubba nti yaafanga oku baseege baitu kubba yaali mwibbi. Niye yakwatanga ensawu ya mpiiya baitu empiiya nʼaziibbanga. 7OYesu nʼakoba ati, “Omukali mumuleke! Yateekaniize amafuta gani okugabiikira ekiro kya kuziikwa kwange. 8Abaseege mwakubbanga nabo ebiro byona baitu muzira kubba nanje.”
Abakabona bakusala amagezi okwita oLazaalo
9Abantu abaingi nibaawuliire nti oYesu ali mu Bbesaniya, ni baabayo, tikumwitirana kyonkai baitu nʼokubona oLazaalo gweyaali nayimboire. 10Olwʼekyo abakabona abakulu ni basala amagezi okwita nʼoLazaalo, 11kubba olwakuyimboolwa kwamwe baingi oku Bayudaaya baali babanagirewo nibatandikire okwikiriza oYesu.
OYesu akwingira omu Yerusaalemu omu kitiinisya
(Mat 21:1-11; Mak 11:1-11; Luk 19:28-40)
12Ekiro ekyaireku abantu abaingi abaali baizire oku Bugenyi bwa Kwakalibwaku ni bawura nti oYesu yaali nakwiza e Yerusaalemu. 13Olwʼekyo nibakwata ebikoola bya nkindu ni baaba okumutangiira nibakubaza omwiraka erikooto bati,
“OKanca awaisanisibwe!
OKanca aweerye omukisa oyo akwizira omwibara rya Mukama!#Zab 118:25; 26
OKanca aweerye omukisa oMukama wa Isirairi!”
14OYesu nʼafuna ondogoyi nʼamwebagala nkʼekyawandiikiibwe nikikoba kiti,
15“Mutatiina, nywe abantu ba mu Sayuuni!
Mubone omukama waanywe akwiza
niyeebagaire omwana wa ndogoyi.”#Zek 9:9
16Abeegesebwa baamwe kini tibaakyetejerye omu kaseera ako. Baitu oYesu niyamaare okuyimboolwa, ale nibeeteja nti ebyo byali biwandiikiibwe ku niye era ni baizukira nti baabimukooreku.
17Abantu abaingi abaali nʼoYesu niyayetere oLazaalo okuliga omu mbi era nʼamuyimboola, ni beeyongera okurarangya Amawuro ago. 18Abantu baingi abaayabire okumwitirana kubba baali bawuliire nti yaali akoore ekyamaano ekyo. 19ABafarisaayo nikwo okukobangana bati, “Mubone, ndoowo kyetwakakoore oku kukangya omusaiza oni. Era abantu boona boona bafookere basengeerya baamwe!”
OYesu akulanga okufa kwamwe
20Omu bantu abaali baabire e Yerusaalemu omu kuramya okwa Bugenyi bwa Kwakalibwaku mwalimu aBayonaani abamwei. 21ABayonaani abo ni baaba egiri oFiripo eyaali azwire e Bbesusaida omu Galiraaya ni bamusaba bati, “Tukwendya okubona oYesu.” 22OFiripo nʼayaba nʼakobera Andereya. Awo bakali babiri ni bakobera oYesu. 23OYesu nʼabairamu ati, “Ati ekiseera kiikire oMwana wa Muntu okufuna ekitiinisya ekikooto. 24Kambakobere amananu, ensigo ya ngaano netegwa mwitakali ni yeekeera okufa, esigala neri emwei yonkai. Baitu niyeekeera okufa, ebyala ensigo zingi. 25Omuntu alumiirwa obwomi alibufeerwa, baitu oyo atabulumiirwa omu nsi gini, alibusigalya leke aike okwobwo obutawaawo. 26Buli ayendya okumpeereza ateekwa okubba omusengeerya wange, awenaakubbanga nʼomuweereza wange niwo yaakubbanga era oyo oIte wange yaakumuweeryanga ekitiinisya. 27Ati omu omwoyo gwange nsobeirwe muno, timmaite kyakusaba. Nsabe nti, ‘Taata, otandeka kwikwaku kubonaabona kuni’? Baitute ekyo nikyo naiziriire; naiziriire kwakala mu kubonaabona. 28Taata weesya eibara ryamu ekitiinisya.”
Awo eiraka ni rizwa omwiguru ni rikoba riti, “Naliweeserye irai era nkwiza okwiramu okuliweesya.” 29Abantu abaingi abaaliwo nibaawuliire eiraka, ni balowooza nti yaali nkuba nʼabandi ni bakoba bati, “Omalaika niye abazire naye!”
30Baitu oYesu nʼabakoba ati, “Eiraka rini rikugendeera kugasa niinywe, ti ninje. 31Ati ekiseera kiikire oKanca okusaara ensi eni omusango, omufugi waayo oSetaani akwiza okugipekwamu. 32Baitu nindiwanikibwa aiguru oku musaalaba, ndyeiriirya abantu boona boona.”
33Kini yakibazire okulanga enfa gyeyaali akwaba okufa. 34Abantu ni bairamu bati, “Twasomere omu mateeka nti oKurisito wa kubbaawo ebiro byona, atite osobola otyai okukoba nambu, ‘OMwana wa Muntu akwiza okuwanikibwa aiguru oku musaalaba’? OMwana wa Muntu gwokubazaku niye ali ayi?” 35OYesu nʼairamu ati, “Nje ekyengeezi omu nywe nkwiza okubba naanywe akaseera kadooli. Olwʼekyo munyikirize nincaali naanywe, ekiiruma nikicaali kubabbiitikira. Omuntu atambuura omu kiiruma tamanya gyakwaba. 36Muneesige nje ekyengeezi nincaali naanywe leke mufooke abaana ba kyengeezi.” OYesu niyamaare okubaza bini, nʼaligawo nʼayaba nʼabeebbisaku.
Obutaikiriza bwʼabeebemberi bʼaBayudaaya
37Gonze nga yakoore obubonero obwewuunyisya obwo bwona bwona nibakubona, aBayudaaya tibaamwikiriize. 38Ekyo kyali kityo leke ebigambo bya mulangi oIsaaya byeyawandiikire biikiire, ebikoba biti,
“Mukama, naani yaikiriize obukwenda bwetwabatwaliire?
Era naani oKanca gweyalangire amaani gaamwe?”#Isa 53:1
39Olwa nsonga eyo baali batakusobola kwikiriza, kubba nʼoIsaaya akoba ati,
40“OKanca aigaire amaiso gaabwe,
Abbanirye emitima gyabwe,
baleke okubona nʼamaiso gaabwe
nʼokweteja nʼemitima gyabwe,
obwo batanyindukira okubatamba.”#Isa 6:10
41OIsaaya bini yabibazire ku Yesu kubba yaboine ekitiinisya kyamwe atakaizire.
42Abantu baingi, nʼabamwei oku beebemberi bʼaBayudaaya, ni baikiriza oYesu. Baitu olwa kubba baali bakutiina aBafarisaayo, okwikiriza kwabwe tikwali kwa lwatu batapekwa mwikumbaaniro; 43kubba baayendyanga ekitiinisya ekibaweebwa abantu okukira ekyo ekibaweebwa oKanca.
Okulamuurwa oku bigambo bya Yesu
44Awo oYesu nʼabazira omwiraka erikooto ati, “Omuntu nanyikiriza, abba taikiriize nje njenkai abba aikiriize nʼoyo eyantumire. 45Kubba nobona nje obba oboine oyo eyantumire. 46Naizire omu nsi okubba nkʼekyengeezi waleke kubbaawo muntu yeena yeena anyikiriza akusigala omu kiiruma.”
47OYesu ni yeeyongera nʼakoba ati, “Omuntu awura ebigambo byange baitu nʼatabyabiraku, timmusaara musango. Kubba tinaizire kusaara nsi musango, naizire kugijuna. 48Baitu buli angaana era nʼagaana nʼokwabira oku bukwenda bwange waliwo alimusaara omusango. Buli kigambo kyembaza nikyo kiribasaara omusango. 49Kubba ebigambo ebyo timbibaza mu buyinza bwange, baitu oTaata eyantumire niye yandagiire byembaza nʼengeri ya kubibaza, 50era mmaite nti ekiragiro kyamwe kireetera omuntu okwika omu bwomi obutawaawo. Olwʼekyo buli kyembaza kibbambe nikyo ekyo oIte wange kyankobere mbaze.”
നിലവിൽ തിരഞ്ഞെടുത്തിരിക്കുന്നു:
Yokaana 12: RUULI-NYALA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
