Yokaana 9
9
OYesu akutamba omusaiza omwigali wʼamaiso
1OYesu niyaali akutambula, nʼabona omusaiza eyaali omwigali wʼamaiso okuligira kimwei oku kubyalwa kwamwe. 2Abeegesebwa baamwe ni bamubuulya bati, “Mwegesya, oku musaiza oni nʼababyaire baamwe naani yasiisire, omusaiza okubyalwa nali mwigali wʼamaiso?”
3OYesu nʼakoba ati, “Oku musaiza oni nʼababyaire baamwe ndooku yasiisire baitu yaigaire amaiso leke amaani ga Kanca gabonekere oku ye. 4Nibubba bucaali misana, tuteekwa okukola emirumo gyʼoyo eyantumire. Obwire bukwiza okusweka, omuntu abbe nga tacaasobola kukola. 5Nka nincaali omu nsi, ninje kyengeezi kyayo.”
6Niyamaare okubaza bini nʼacwa ekicwantai okwitakali, nʼasumantya eitakali nʼekicwantai nʼalipuuya oku maiso ga musaiza. 7Nʼamukoba ati, “Yaba onaabe omu kitunga kya Sirowaamu.” (Sirowaamu kimanyisya “Eyatumirwe”). Omusaiza nʼayaba nʼanaaba nʼairayo ewaamwe nakubona. 8Abeereerwa baamwe nʼabo abaamubonanga nakusabiirya ni babuulya bati, “Omusaiza oni tiniye eyaikalanga nakusabiirya?” 9Abamwei ni bakoba, “Niye.” Abandite ni bakoba, “Bbe ti niye; akumwisanambe.”
Baitu ye omusaiza omwenyenere nʼakoba ati, “Niye nje.”
10Ni bamubuulya bati, “Ati amaiso gaamu gaigwirwe gatyai?”
11Ye nʼabairamu ati, “Omusaiza ayetebwa oYesu yasumantirye eitakali nʼalipuuya oku maiso gange nʼankoba okwaba nnaabe omu kitunga Sirowaamu. Ninayabire, ni nnaaba ni nsobola okubona.”
12Ni bamubuulya bati, “Ati omusaiza oyo ali ayi?” Omusaiza nʼabairamu ati, “Timmaite”
ABafarisaayo bakubuuliirya oku kwiguka amaiso
13Omusaiza eyaali aigukire amaiso ni bamutwala egiri aBafarisaayo. 14Ekiro oYesu kweyasumantiirye eitakali era nʼaigula amaiso ga musaiza kyali kya Sabbiiti. 15Olwʼekyo aBafarisaayo boona ni bamubuulya engeri gyeyaigukire amaiso. Ye nʼabairamu ati, “Omusaiza ayetebwa oYesu niye yampuuyire eitakali oku maiso ni nganaabya era ati nkubona.”
16ABafarisaayo abamwei ni bakoba bati, “Omusaiza tayinza kubba nti yazwire wa Kanca kubba tayorobera iteeka rya Sabbiiti.” Baitu abandi ni bakoba bati, “Omusiisi asobola atyai okukola obubonero obwewuunyisya nka buni?” Olwʼekyo ni wabbaawo obutaikirizangana omu bo.
17Ni bairamu okumubuulya eyaali omwigali wʼamaiso bati, “Omusaiza oyo nka niyakwigwire amaiso we ati okumubazaku ki?” Eyaali omwigali wʼamaiso nʼairamu ati, “Omusaiza oyo mulangi.”
18Abeebemberi bʼaBayudaaya ni bataikiriza nti omuntu oni, ati eyaali akubona, nti omu kwekeera yaali mwigali wʼamaiso era okwica nibaatumisirye ababyaire baamwe. 19Ni bababuulya bati, “Oni mutaani waanywe ogwemukoba nambu yabyairwe nali mwigali wʼamaiso? Atite kaakubona?” 20Ababyaire baamwe ni bairamu bati, “Tumaite nka nali mutaani waiswe era tumaite nka niyabyairwe nali mwigali wʼamaiso. 21Baitu engeri gyeyaigukiremu amaiso nʼeyagamwigwire titubimaite. Ngoyo muntu mukulu yeebazire yenkai.” 22Ababyaire baamwe okubaza batyo baali bakutiina abeebemberi bʼaBayudaaya, kubba baali bamaare okukituuka nti buli eyaakwatulanga nti oYesu niye oKurisito yaakupekwanga omwikumbaaniro. 23Eyo niyo yaali nsonga lwaki baabazire bati nti, “Muntu mukulu, mumubuulye.”
24Ni bairamu omulundi ogwakabiri okwetesya omusaiza eyaali omwigali wʼamaiso ni bamukoba bati, “Baza amananu omu maiso ga Kanca, kubba tumaite omusaiza oyo musiisi.” 25Eyaali omwigali wʼamaiso nʼairamu ati, “Oba musiisi oba bbe ekyo tinkimaite. Ekyemmaite kiri kimwei, naali mwigali wʼamaiso baitu ati nkubona!”
26Ni baira ni bamubuulya bati, “Yaakukooreku ki? Amaiso gaamu yagaigwire atyai?”
27Ye nʼabairamu ati, “Nabakobeire irai baitu nimutaikiriza, mukwenderya ki okwiramu okukiwura? Nywena mukwendya okufooka abeegesebwa baamwe?”
28Awo ni batandika okumuzuma era ni bakoba bati, “Niiwe mwegesebwa waamwe, iswe tuli ba Musa! 29Tumaite oKanca nka niyabazanga nʼoMusa, baitu omusaiza oyo nʼegyazwa titumaiteyo.”
30Eyaali omwigali wʼamaiso nʼairamu ati, “Nywe obutamanya musaiza gyazwa kikwewuunyisya, baitu nje yanyigwire amaiso. 31Tumaite oKanca nka nataanukula basiisi baitu ayanukula muntu amutaamu ekitiinisya era akola ye oKanca byakwendya. 32Okuzwa eirai nʼeirai ndoowo eyaali nawuliireku okwigula amaiso ga muntu eyabyairwe nigali gaigali. 33Omusaiza oni niyaakuli atazwire wa Kanca ndoowo kyeyaakuli nakusola okukola.” 34Eyaali omwigali wʼamaiso niyabazire kini, ni bamwiramu bati, “We eyabyaliirwe era nʼoyoroorwa omu kibbi oyinza otyai okutwegesya!” Ni bamupekera enzai wa ikumbaaniro.
Obwigali bwʼamaiso ga mwoyo
35Awo oYesu nʼawura nti omusaiza eyaali omwigali wʼamaiso baali bamupekeire enzai wa ikumbaaniro. Niyamwitiraine nʼamubuulya ati, “Okwikiririza omu Mwana wa Muntu?” 36Omusaiza nʼamwiramu ati, “Mukama wange niye naani oyo? Nkobera leke mmwikirize.”
37OYesu nʼamukoba ati, “Wamuboine irai era niye oyo akubaza naawe.” 38Omusaiza nʼakoba ati, “Mukama nkwikiriza era nʼamuramya.”
39OYesu nʼakoba ati, “Naizire omu nsi muni kusala musango, abaigali bʼamaiso leke babone nʼabakubona leke baigale amaiso.”
40Abamwei oku Bafarisaayo abaali naye nibaawuliire nakubaza kini ni bamubuulya bati, “Okobere ki? Naiswe tuli baigali bʼamaiso?”
41OYesu nʼakoba ati, “Nimwakuli abaigali bʼamaiso, timwakubbaire na musango gwa kibbi, baitu ati nka nimukoba nambu timuli baigali bʼamaiso, mucaalina omusango gwa kibbi.”
നിലവിൽ തിരഞ്ഞെടുത്തിരിക്കുന്നു:
Yokaana 9: RUULI-NYALA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
