Yohana 15
15
Yesu Omusabibu kwa Ng'ali
1“Nise omusabibu kwa ng'ali, ne Papa wange njomulimi. 2Wuli lusaka lwange oluchama amatunda, aluchemanga, ne wuli lusaka lwama amatunda atetangakho evisaka, kho viame amatunda mangi. 3Mulikhale avalafu khulwekhuwa elivawoleye enywe. 4Tong'e mwise nese mwinywe. Nga olusaka silunyala okhwama amatunda niluli lwong'ene, nausa lutong'e khumusabibu ta, ata mwesi, okhwola mwevikhe mwise. 5Nise omusabibu, nanywe ninywe amasaka. Oyo otong'a mwise, nese muniye, njoyo owamanga amatunda mangi, nichasi ese, simunyala okhukhola siosisiosi ta. 6Omunju yesiyesi ochatong'a mwise, alikhutupwa ngesaka ne kome, namasaka ako kawuswa, katupwa mumuliro ne kasambwa. 7Niva mutong'a mwise, namakhuwa kange kave mwinywe, cheve Papa siosisiosi esimwenya, ne muli khukholerwa. 8Khulwa kano Papa wange anyola oluyali, mbo mwame amatunda amangi, kho mwekese mbo muli avalondi vange. 9Nga Papa kasima, kho nga sesi navasima. Tong'e muwusimi wange. 10Nimulonda amalako kange, mulikhutong'a muwusimi wange, nga nalonda amalako ka Papa ne natong'a muwusimi wuwe. 11Evinju vino evawoleye, mbo owusangafu wange wuve mwinywe, ne mbo owusangafu wenywe wichule.
12“Lino njelako liange, mbo musimane nga navasima. 13Wuwumawo owusimi okhuvicha wuno, mbo omunju aane owulamu wuwe khulwa avecha vave. 14Muli vecha vange niva mukhola aka vawolera. 15Sindivalanga avakhalavani ta, sikira omukhalavani siamanyire esimukhongo wuwe anakholanga ta, nausa evalanga avecha, sikira kosi kanakhawulira okhuchula khu Papa nakhavekesa enywe. 16Simwanjoola tawe, nise owavachoola ne navawula mbo muchie mwame amatunda ne amatunda kenywe kaindire; kho siosisiosi simucheva Papa mulicha liange, alikhuvaweresa. 17Khanu elako liange khwinywe, musimane avene khuvene.
Okhuviyirwa khwesialo
18“Niva esialo sivaviyira, mumanye mbo siambiyira khale nisisiri okhuvaviyira. 19Muva vesialo, esialo siakhavasimire ngavasio, nausa simuli vesialo ta, nausa navachoola okhuchula musialo, njesikira esialo nisivaviyira. 20Yichulire ekhuwa linavawolera, ‘Omukhalavani siakhira omukhongo wuwe ta.’ Nivakhupia esivi, vachia okhuvakhupia mwesi esivi, nivalonda ekhuwa liange, valikhulonda elienywe liosi. 21Nausa kano kosi valikhuvakholera okhuvera ese, sikira sivamanyire owanjuma ta. 22Mba mbo sinacha ne navalomaloma kho ta, sivava vali nowoni ta, nausa khanu vawuma esiveyere siowoni wawe. 23Oyo owumbiyira, aviyira Papa wange yesi. 24Mba mbo sinakhola munivo, evikholwa eviawumao owundi owakhola, sivava vali nowoni ta; nausa khanu vakhawona ne vambiyira ni Papa wange. 25Yiri okhwosa ekhuwa liaandikwa mumalako, ‘Vambiyira nichali nesifune.’ 26Nausa olu Omukeraki kacha, oyundi khuvachumira okhuchula khu Papa, ata Roho wowung'ali, ochula khu Papa, alikhunjusira owuloli. 27Ne mwesi mulivaloli, sikira mwakhava ninange okhuchula mukhwanja.
നിലവിൽ തിരഞ്ഞെടുത്തിരിക്കുന്നു:
Yohana 15: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
