Yohana 16
16
1“Evawoleye kano kosi kho mulove khulekha esuvira lienywe. 2Valikhuvacha njie wamasinagogi; Ng'ali evise vicha olu yesiyesi owicha enywe alikhupara mbo anakholeranga Nyasaye emilimo. 3Ne valikhukhola kano sikira sivamanyire Papa namwe ese ta. 4Nausa evawoleye evinju vino mbo oluvise viavio viola mukhewulire mbo navakesiyisia khunivio.
Emilimo kia Roho Muchwenufu
“Sivawoleye evinju vino okhuchula mukhwanja ta esikira nali nanywe. 5Nausa khanu njia khuyo owanjuma, nawumao khwinywe owunjeva, ‘Ochia ena?’ 6Nausa sikira nakhavawolera evinju vino, esiveera sichuye mumioyo kienywe. 7Ata kachio, vawolera owung'ali, wulayi khwinywe mbo njie, sikira niva mbo sinjia tawe, Omukeraki siali okhuvachira tawe. Niva njia, ndi okhumuchuma khwinywe. 8Ne nikakhacha, alikhwekesa esialo owoni nende owulungi nende ekhalakirwa. 9Okhulondana nowoni, sikira sivasuvira ta, 10okhulondana nowulungi, sikira njia ewa Papa, ne simuli okhumbona nundi tawe. 11Okhulondana nekhalakirwa, sikira omuchuki wesialo sino akhalakiywe.
12“Esiri nende evinju evingi viokhuvawolera, nausa virikhuva evisicho khwinywe khulwevise vino. 13Olu Roho wowung'ali kacha, alikhuvemirira muwung'ali wosi. Sikira sialikhuwola mumaani kake ta, nausa siosisiosi sialikhuwulira alikhuwola, nokhuchumbula khwinywe evinju viri khwicha. 14Alikhumba oluyali, sikira alikhuwukula eviange nachumbulire enywe. 15Viosi evi Papa alinavio viange, njesikira nimboye mbo ndikhuwukula eviange ne vachumbulire.
Esivera Nomwikhoyo
16“Evise vititi ne simulikhumbona nundi ta, nundi evise vititi, ne mulikhumbona.” 17Valala khuvalondi vave vawolana, “Siosina sino sianachuwoleranga, ‘Evise vititi, ne simulikhumbona, nundi evise vititi mulikhumbona’, nundi awola, ‘Sikira njia ewa Papa’?” 18Vachevana, “Anawolanga sina, ‘Evise vititi’? Sikhumanyirisa siawola ta.” 19Yesu kamanya sivali nivenya okhumucheva, kho kavawolera, “Sino njesimunachevananga, esifune siange okhuwola mbo, ‘Evise vititi ne simulikhumbona tawe, ne nundi evise vititi ne mulikhumbona’? 20Ng'aling'ali vawolera, mulikhulira ne mwewutume, nausa esialo sirikhusangala, mulikhuverera nausa esiveera sienywe sirikhuva owusangafu. 21Olu omukhasi ava nalumwa ava nesivera, sikira evise vivie violire. Ne nikakhekhonya, kevirira owusiva sikira yowusangafu mbo omwana kewuywe musialo. 22Kho muverera evise vino, nausa endikhuvawona nundi nemioyo kienywe kisangale, nawumao olikhuwukula owusangafu wenywe okhuchula khwinywe. 23Enyinga eyo simulinjevakho siosisiosi ta. Ng'aling'ali vawolera, nimuchevakho siosisiosi khu Papa, alikhuvaweresa mulicha liange. 24Okhwola luno mucha cheva siosisiosi mulicha liange ta, cheve, ne mulikhunyola, mbo owusangafu wenywe wichule.
Ekhirire Esialo
25“Evawoleye kano mungano, evise vicha olu endikhulekha okhuwola ninanywe mungano nausa ndikhuvawolera awulafu aka Papa. 26Endalo eyo mulicheva mulicha liange, ne sivawolera mbo ndakhavasavire khu Papa ta. 27Esikira Papa mwene kavasima, sikira mwasima ne mwasuvira mbo nachula khu Papa. 28Nacha okhuchula khu Papa ne nacha musialo, nundi ndachulanga musialo nenjia ewa Papa.” 29Avalondi vave vawola, “Eee, khanu owola awulafu nuchekhonyera engano ta! 30Khanu khwakhamanya mbo omanyire evinju viosi, ne sikenyekha omunju yesiyesi akhucheve amacheva ta, khulwa kano khusuvira mbo wacha okhuchula khu Nyasaye.” 31Yesu kavachipa, “Khanu musuvira? 32Evise vicha, mana violire, evi mulikhusalana, wulimunju engo wuwe, ne mulikhundekha seng'ene. Mana sindi seng'ene ta, esikira Papa ali ninange. 33Nakhavawolera kano, mbo mwise munyole owusosi. Musialo muno mulikhuva nokhunyakhana, nausa mwetinye, nakhachisia esialo.”
നിലവിൽ തിരഞ്ഞെടുത്തിരിക്കുന്നു:
Yohana 16: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
