Yohana 14
14
Yesu Engira Yokhuchia khu Papa
1“Emioyo kienywe kichaveyaveya tawe, suvire mu Nyasaye, suvire nundi mwise. 2Munju mwa Papa wange khuli nevikoro evingi, kava nikachali kachio, mba vawoleye mbo njia okhuvalombera awunju? 3Ninakhachia ne navalombera awunju, ndikhukoola nundi evawukule, mbo aandi ata mwesi muveo. 4Ne mumanyire engira yeyinjia.” 5Tomasi kamuwolera, “Omwami, sikhumanyire eyi ochia ta, khwakhamanya khuchie engira?” 6Yesu Kamuwolera, “Nise engira, nowung'ali, nowulamu, awumao owicha khu Papa, nachavichiye mwise ta. 7Muva mwamanya, muva mumanyire Papa yesi. Okhuchula evise vino mumanyire khulwako mumumanyire ne mumuwene.”
8Filipo kamuwolera, “Omwami, chwekese Papa ne khuli khunyalikha.” 9Yesu kamuwolera, “Nakhava nanywe evise vino viosi, ne simumanyire tawe, Filipo? Oyo owumbwene awene Papa, wakhawola ochie ochi ‘Chwekese Papa’? 10Simusuvira mbo ndi mu Papa ne Papa mwise ta? Amakhuwa aka vawolera simbola khulwowunyali wange ta, nausa Papa omenyire mwise njokhola emilimo kino. 11Suvire mbo ndi mu Papa ne Papa Mwise, namwe suvire khulwemilimo kikhola kiene.
12“Ng'aling'ali vawolera, oyo owusuvira yesi alikhukhola emilimo ekikhola. Naye emilimo emikali okhukhira kino alikhukhola, sikira njia ewa Papa. 13Ne siosisiosi esimucheva mulicha liange, endikhukhola, mbo Papa anyole oluyali mu Omwana; 14nimusava siosisiosi mulicha liange, endikhukhola.
Okhulaka khwa Roho Muchwenufu
15“Nimusima, mulikhulonda amalako kange. 16Nendi khusava Papa, nalikhuvaweresa Omukeraki wundi, okhuva ninanywe wuli lwosi, 17ata Roho wowung'ali, oyusialo sisinyala okhunyola ta, sikira sisimuwona namwe sisimumanyire ta, Enywe mumumanyire sikira amenyire mwinywe, nalikhuva mwinywe.
18“Sindi khuvalekha avafusi ta, ndikhwicha khwinywe. 19Nausa evise vititi, nesialo sisiri okhumbona tawe, sikira emenyire, mulikhumenya mwesi. 20Olutalo olwo mulikhumanya mbo ndi mu Papa, nenywe mwise, nase mwinywe. 21Oyo oli nende amalako kange nakalonda, oyo njowasima, noyo owasima, Papa alikhumusima, nese ndikhumusima nendikhweyekesa khuniye.” 22Yudasi (ochali Iskarioti) kamuwolera, “Omwami, kava kachie mbo olikhweyekesa khwifwe, ne khusialo ta?” 23Yesu kamuchipa, “Niyiva omunju kasima, alikhulonda ekhuwa liange, ne Papa wange alikhumusima, ne khuli khwicha khuniye khulombe emenya liefwe ninaye. 24Oyo ochasima sialonda amakhuwa kange tawe; ne ekhuwa eli muwulira siliange ta, nausa lia Papa wanjuma. 25Evinju vino evawoleye nisiri ninanywe. 26Nausa Omukeraki, Roho Muchwenufu, oyundi okhuchuma mulicha liange, alikhuvekesa evinju viosi, ne avechulise viosi vinakhavawolera.
27“Omulembe evalekhera, omulembe kwange evaweresa, sikuli ngokusialo sivaweresa ta. Muchava neenda mwoyo, nundi mucharia ta. 28Mumbuliye nimbola, ‘Enjia, nendi okhwicha khwinywe.’ Muva nimwasima, mwakhasangaye, sikira njia ewa Papa, sikira Papa mukhongo kakhira. 29Khanu evawoleye nivisiri okwekholekha, kho niviekholekha, musuvire. 30Sindi okhulomaloma amangi ninanywe ta, sikira omuchuki wesialo sino kacha. Awuma owunyali khwise, 31nausa ekholanga nga Papa kamboleye, kho esialo siole okhumanya mbo nasima Papa. Yinyokhe, kende khuchie.
നിലവിൽ തിരഞ്ഞെടുത്തിരിക്കുന്നു:
Yohana 14: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
