Evikholwa 27
27
Paulo achia mwitookho lia Roma
1Olu vavisia mbo khuchie musialo sia Italia, vaana Paulo nende avawoe vandi khu Yulio, owali omukali wavamahe avomukanda kulangwa mbo Augusto. 2Khwanina mumeri ya Adiramito eyali niyenya khuchekukha yivichire mumbeka chia Asia, khwachia alala nende Aristariko, omumenywa wa Makedonia ya Thesalonike. 3Olutalo lwalondakho khwachia khwola Sidoni. Yulio kawonera Paulo esisa kamulekhula mbo achie muvasale vave vamuwekho esi anyala khutumikhira. 4Khwachianakana nolukendo okhuchula ao, ne esikira mbo ekhungu yalikho engali niyiwucha okhuchula emberi wefwe, khwalonda enakinga lia Kupro. 5Khwachiakana khwambukha enyanja ya Kilikia nende Pamfulia mana khwola Mura mwitookho lia Lukia. 6Awenao, omukali wavamahe kanyolao emeri ndala eya Aleksandria niyichia Italia, kachuniniamo. 7Khwachia kalaa mana muwutinyu, khwawukula enyinga enyingi mana khwola aambi nende etookho lia Nido. Ekhungu siyakhachusiwuye okhuchianakana ta, khanu khwachia khwavichira embeka yekinga lia Krete aambi nende awunju mbo Salmone. 8Khwachianakana okhulonda enalukuku muwutinyu khwola awunju alangwa mbo Efuukho Elayi, aambi nende etookho lia Lasea.
9Vali vakhawukula evise evileyi, ata olutalo lwokhweyima okhulia lwali lwakhavicha, khanu okhukenda nemeli khwali khwowutinyu. Paulo kavakerakira, 10nawola, “Avakali, ndawonanga ngolukendo luno lunava lutinyu, ne khulikhukosia evinju evingi. Khunyala khwakosia emisiko nende emeri yene, ata nowulamu wefwe.” 11Omukali wavamahe naye kachekeresa olukali akawolwa nende otimia emeri nende mwenemeli, ne kalekeresa aka Paulo kawola. 12Awunju aameri yali yemire siali alayi wokhwikhala munyinga chiomunyichi ta, avangi vawona mbo wulayi okhuchianakana nolukendo niva vakhanyalire okhwola Foinike vekhale eweneyo munyinga chiomunyichi. Foinike njefuukho liri Krete, eyalengera akachi weukwe nemasava, nende akachi weukwe nemulambo.
Ekhungu Munyanja
13Olu embeo enyerere eyemulambo yanja okhuwucha nivapara vachi vanyoye esivenyanga, vanja olukendo nivayirira emeri yawe aambi nende olukuku lwa Krete. 14Nivachachia esinao, ekhungu esicho, eyilangwa mbo “Ekhungu Yemasava” yanja okhuwucha okhuchula mwikinga. 15Olu emeri yakhupwa nekhungu esicho, yachukhaya mana khwalekha yichuyire eyene. 16Khwekhingakirakho atiti mwikinga lilangwa Kauda, khwavichira embeka yemulambo wekinga elio mana khwanyala okhunyola eliacho muwutinyu. 17Nivakhaliemesa, vakhwesa eliacho mukachi wamachi, vawotosiania omukoye khumeri vayiwoa vomisa. Vali variye mbo vanyala khuanda munyanja, khanu valekhula emeri mbo yisindikhwe nekhungu esicho. 18Yachianakana okhuva esicho, olutalo lwalondakho vanja okhutupa erwanyi emisiko kiali mumeri. 19Olutalo lwa khatachu vanja okhutupa erwanyi evinju viali mumeri namakhono kawe. 20Khulwenyinga enyingi sikhwaonakho enyanga namwe eng'eniesi ta, ekhungu esicho yachianakana okhuwucha olukali. Fwesi khwachusakho omwoyo kwokhuwona.
21Olu vali nivakhekhala oluwono nivachaliakho ta, Paulo kacha emberi kawola, “Avakali, kava mbo mwakhanjekeresise sikhwakhachulire Krete khwacha khwawumiya nokhukosia evinju khuchi ta. 22Khanu ndavasavanga mbo mutire emioyo. Sialikhoo ata mulala khwinywe olikhukosia owulamu wuwe tawe, kene khukosiekho emeri yong'ene. 23Esiro sia nyingayino engelosi ya Nyasaye oyu ese ndi wuwe nundi oyu sikamiranga yinjichiye, 24yawola, ‘Ocharia ta Paulo, okhwola weme emberi wa Kaisari. Wona, Nyasaye akhuwaye vosi avali khulukendo luno nawe.’ 25Khanu tinye emioyo vanju enywe, esikira ndi nesuvira mu Nyasaye mbo kalikhuva wusa nga kamboleye. 26Nichasi okhwola khulikhuchiakho khukinga.”
27Esiro siolutalo lwekhumi nachine, khwali khunayuywayuywanga nekhungu esicho munyanja ya Adria. Aambi musiro akachi avali mumeri vanja okhuwona nga vali aambi okhwola khusialo sivalakafu. 28Vapima vanyola mbo owuleyi wamachi wuli emita amakhumi kane; vasutakho nundi vapima vanyola emita amakhumi katachu. 29Vali variye mbo vanyala okhwekhupa mumakina, valekhula esiiro chine chiachia aasi wenyanja (okhwemesa emeri), mana vasala mbo wanukhe lwangu. 30Avolukendo vatema okhwirukha okhuchula mumeri, vesa eliacho munyanja niveomberesia mbo vesa esiiro echio okhwemesa emeri. 31Paulo kawolera omukali wavamahe nende avamahe, “avanju vano valova okhutong'a mumeri muno simunawonisiwa ta.” 32Avamahe vakhalaka emikoye kieliacho valekhula liachia.
33Olu wali ni wenya okhwanukha, Paulo kavacheva mbo vosi valiekho esiokhulia, kawola, “Luno njolutalo lwekhumi nakhane nimuli muwuchi nokhuonga nimuwuma esiokhulia, muchalia khusinju ta. 34Khanu evasava mbo muliekho esiokhulia, sirikhuvawa amaani, esikira ata efwiri elala silirikhukochakho khumuchwe kwa yesiyesi ta.” 35Olu kali nikakhawola kano, kawukula omukati, kakhupira Nyasaye ochio mana kakumekula emberi wavanju vosi ne kanja okhulia. 36Vosi vetinyirisiwa mana valiakho esiokhulia. 37(Fwesi alala khwali avanju emia chiviri nende amakhumi saba nasita mumeri omwo.) 38Olu vali nivakhekucha, vatupa engaano eyi vali nivakingire munyanja okhwanguya emeri.
Emeli Yikhalikhamo
39Olu wanukha, sivanyala okhuwona olukuku ta, nichasi vawona elova nende omuyekhe omungi ni kutirana namachi, vatema mbo nikanyalikha vemese emeri awenao. 40Kho vakhalaka esiiro chiali nichitiye emeri vachilekha munyanja, evise evio nundi vakangulula emikoye kiali ni kiwoyire emeri, ne vamala vaninia okutambaya kwemboo, khanu omuyaka kwavayira okhwola khulukuku. 41Vola awunju aamachi kawukananira, emeri yaanda. Emberi yali yiandire mumuyekhe niyichachenjekha ta. Enyuma nayo yanja okhukhalikhamo evitonye okhuchulana nende amaani kekhungu. 42Avalindi vechekekha okhwicha avawoe vosi kho valekhe khusoka verukhe. 43Omukali wamahe kenya okhuwonia Paulo, kho kavalovera okhukhola akenako. Kawolera avanyala okhusoka vachangirire vasune mumachi vachie khulukuku, 44avandi vetire khumbau chikhalikhire navandi khuvitonye vichulire khumeri. Vakhola vachio mana vosi vola khulukuku.
നിലവിൽ തിരഞ്ഞെടുത്തിരിക്കുന്നു:
Evikholwa 27: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
