Evikholwa 28
28
Nali Malta
1Nikhwakhaonokokha khwola khulukuku, khwanyola mbo ekinga elio lilangwa mbo Malta. 2Avanju vawenao vava valayi muno khwifwe, vawana omuliro mana vachulanga, esikira efula yali yakhanja okhukwa mana embeo yalikho. 3Paulo kali kakhatoveresa ochukhwi nacha mumuliro, olu enjukha yachulamo sikira yowuvalire mana yamwekhamacha khumukhono. 4Olu avanju vawenao vawona enjukha ni yerera khumukhono, vawolerana, “Siwuveyi ta, omunju ono mwichi. Nolu ava nawonokokhire mumachi, owang'ali siwumulekha amenye ta.” 5Paulo kasisimula enjukha mumuliro ne sikawumiyakho awunju ta. 6Valinda mbo vawonekho nasimba omukhono namwe akwe wusa aasi esa eyo afwe. Olu valinda oluwono nivachawonakho amavi nikamwekholekhakho ta, vakalusania enganakani chiawe vawola vachi kali nyasaye.
7Alukongo lwawunju wenao emikunda kialiwo ekia omukhongo wekinga, olangwa mbo Publio, owachwingisa mana kachulinda owulayi khunyinga chitachu. 8Kanyolekha mbo papa wa Publio mulwaye womuyaka nende okhunyalala. Paulo kamukenderera mana kasala, nolu kamuchakho amakhono, kamuwonia. 9Kano ni kakhekholekha, avanju vandi avali nowulwaye khwikinga elio vacha mana vawonisiwa. 10Vachuweresa evianwa evingi, nolu khwanja olukendo, vachuwa viosiviosi evi khwenya khwekhonyere.
Olukendo lwokhuchula Malta Okhuchia Roma
11Emiesi nikiakhawa kitachu, khwanja olukendo nundi mumeri ya Aleksandria, eyali ni yikhaye mwikinga elio enyinga chiomunyichi, niyilangwa, “Nyasaye Avakhwana”. 12Khwola mwitookho lia Sirakusa mana khwekhalayo enyinga chitachu. 13Okhuchula ao khwawotokhana khwola mwitookho lia Regio. Olutalo lwalondakho ekhungu esicho yanja okhuwucha niyichulira emulambo, ne olutalo lwa khaviri khwola mwitookho lia Potioli. 14Eweneyo khwanyolayo avasiefwe mana vachwingisa mbo khwikhalekho navo enyinga saba. Ni khwakhachulayo khwachia Roma 15Olu avasiefwe veweneyi vawulira okhulondana nafwe, vacha vola mumatookho ka Esoko ya Apio nende Ehoteri Chitachu okhuchwakanira. Olu Paulo kavawona kakhupira Nyasaye ochio mana kanyola amaani.
Paulo Nali Roma
16Nolu khwengira Roma, vasiwula Paulo mbo amenye yeng'ene nomusikari wali namulindire. 17Nikakhamala enyinga chitachu, kalanga avemirisi va Avayahudi. Olu vali nivakhacha kavawolera, “Vasiange, nolumba sinakhola siosisiosi esivi khuvanju namwe khumima kiavakuka vefwe ta, natirwa nga omuwoywe okhuchula Yerusalemu vanja mumakhono Kavaroma. 18Olu vanjeva wulayi wene, vekomba mbo vandekhule, sikira sisialikhoo esiakhakirire vakhalakire efwa tawe. 19Nolu Avayahudi valova, nawona mbo okhwola njie khu Kaisari. 20Sino njesifune sikirire nasava mbo vawonekho nundi nomalomekho nanywe, esikira mboyirwe eminyololo kino Khulwesuvira lia Avaisraeli.” 21Vamuwolera, “Sikhunyoyekho ebarua okhuchula Yudea okhulondana nawe ta, nundi awumakhoo khuvasiefwe owichire ano kasitaka namwe kalomalomakho owuvi khwiwe ta. 22Nausa khwekomba okhuwulirakho okhuchula khwiwe, owona ochie! Sikira okhulondana nomukanda kuno khumanyire mbo wuli awunju avanju vakulova.”
23Nivakhamuchoolera olutalo, avanju avangi vacha aakali namenyire. Kavawolera amakhuwa ako muwuvalayi okhuchula ni wanukha okhwola niwira, nachusa owuloli khuwami wa Nyasaye nundi katema okhuvalomba veyame akalondana nende Yesu okhuchula mumalako ka Musa nende muvanabii. 24Valala veyama nende aka kawola, navandi sivasuvira ta. 25Khanu, olu vachianaka okhuyingana avene khuvene, vachekukha, Paulo nikakhawola ekhuwa elala: “Roho Muchwenufu kali ng'ali olu kawolera avakuka venywe okhuvichira mu Isaya omunabii:
26‘Chia khuvanju vano, owole,
Muliwulira ne ng'ali simunakhamanye ta,
nundi ng'ali muliwona ne simulimanyirisa ta,
27sikira emioyo kiavanju vano ming'ang'afu,
namachwi kawe masicho, sikawulira ta,
nemoni chiawe chikaye,
mbo valove khuwona nemoni chiawe,
ne vawulire namachwi kawe,
ne vamanyirise nemioyo kiawe,
mana vakalukhane khovawonie ta.’
28Khanu lekhe kamanyikhe khwinywe mbo owuwonia wa Nyasaye wuno wuchumirwe khuvamaanga, vali khuchekeresa.” [29Olu kali nikakhawola kano, Avayahudi vachekukha, nivali namayingano amangi akachi wawe.] 30Kamenya eweneyo emiaka kiviri emikhwiye, nikechungira evinju omwene, mana kengisa avovosi avamwichakho. 31Kerwachanga owami wa Nyasaye nokhwekesa okhulondana nende Omwami Yesu Kristo nowunyindafu nundi nivachamukayira ta.
നിലവിൽ തിരഞ്ഞെടുത്തിരിക്കുന്നു:
Evikholwa 28: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
