Evikholwa 26
26
Paulo Keteteya Emberi wa Agripa
1Agripa kawolera Paulo, “Oli noweyangu wokhulomaloma wamwene.” Paulo kakinga omukhono keteteya:
2“Mbara mbo ndi nekhavi nyingayino okhweteteya emberi wuwo omuchuki Agripa, khumakoso kosi aka Avayahudi vanjayekho, 3esikira mbo ewe omanyire wulayi wene emima nende amayingano kosi aka Avayahudi, kho khusava wefwire wunjekerese.
4“Avayahudi vosi vamanyire owulamu wange okhuchula wana, nga nakhamenya muvanju vange nende mu Yerusalemu. 5Vamanyire khulwoluwono mbo, ata nivenya vanyala okhuchusa owuloli, mbo okhuchula mukhwanja nakhamenya nga mulala khuvanju vatira muno emima kiedini yefwe, Avafarisayo. 6Khanu esa yino nemire musiina khulwokhuva nasuvira mundakaano eyi Nyasaye kalaka avakuka vefwe, 7eyi embia chiefwe, ekhumi nachiviri chiekomba okhunyola nikhusikamira Nyasaye esiro nesiteche. Kho okhulondana nesuvira lino omuchuki, njesikira Avayahudi nivasitaka! 8Mbo sina ni viwonekhana evisicho sana khwinywe okhusuvira mbo Nyasaye asisimusanga avafu?
9“Ese samwene nali nesuvira mbo nenyekha ekhole evinju evingi okhukania elicha lia Yesu Omunasareti. 10Mana nakhola akenako nindi Yerusalemu, nanyola owunyali okhuchula khuvakuhani vakhongo natiranga avasuvirwa nivayira musiwoo, nolu vechwanga, nasangangakho omukhono vaveche. 11Amakhavi amangi navakhupanga eviwoko nivali mumasinagogi nindema okhuvayinga vekane esuvira liawe. Nali nechima ekali navo ata nachianga mumatookho kaaleyi nivanyasira eweneyo.
Paulo Awola khu Khuwoniwa khukhwe
(Evikh. 9.1-19; 22.6-16)
12“Nali ndachianga Damasko khumilimo kieneki nindi nowunyali okhuchula khuvakuhani vakhongo. 13Akachi wesiteche omuchuki, nali khungira nawona owulafu owukali okhuvicha owenyanga, niwuchula mwikulu, wakhosa aanali okhwola khuvanali navo vosi. 14Fwesi khwesindukha khwakwa aasi, mana nawulira omwoyo nikumbolera mu Oluebrania, ‘Saulo, Saulo, sikira sina niwunyasa? Onewumisanga wusa wamwene ngeng'ombe yilasa embasi khusimbo ya omwayi.’ 15Nacheva, ‘Niwe anu Omwami?’ Omwami kawola, ‘Nise Yesu oyunanyasanga. 16Yinyokha weme khumakulu kako, nakha khuwonekhanira khulwesifune sino, mbo khuchoole wukhalavanire mana ove omuveri khumakhuwa akawakhawona nende khwako akandikhukhufunulira, 17ndikhukhunanula okhuchula muvanju va Israeli nende mu Avachali Avayahudi avandikhukhuchumamo. 18Olikhuchia okhuvekula emoni mbo vachule musirima vache muwulafu, nundi vachule muwami wa Setani vakoolere Nyasaye. Volane okhuverwa owoni wawe mana vanyole oweyangu mwavo avachwenulwa khulwesuvira liri mwise.’
Paulo Alomaloma Khu Owukhalavani wuwe
19“Khulwako omuchuki Agripa, sinalekeresa amalola aka nawona okhuchula mwikulu ta. 20Nawolera avali Damasko, nakerao nachia Yerusalemu nende musialo sia Yudea siosi, nende Avachali Avayahudi mbo vekanire vakoolere Nyasaye mana vakhole akalondana neliekanira liawe. 21Okhuchulana nesifune sino, Avayahudi vandira mu Etemperi mana vatakha okhunjicha. 22Okhwolera nyingayino nakhanyola owuyeti okhuchula khu Nyasaye, khanu nemano ninjusa owuloli khuvatiti navakhongo mbo ako kosi akavanabii nende Musa vawola kachia okhuvicha: 23mbo Kristo anakhanyasiwe, nundi, okhuva mbo njowamberi okhusisimukha okhuchula muvafu, anakherwache owulafu khu Avayahudi nende Avachali Avayahudi.”
24Olu kamala okhweteteya, Festo kamualavira nomwoyo kwamukulu, “Paulo, oli mulalu, amasomo kako mangi kanakhulalusanga.” 25Paulo kawola, “Sindi mulalu tawe, owoluyali Festo, ndawolanga owang'ali wene. 26Omuchuki amanyire kano kosi, ne khanu vawolera kosi nindi mulekhule. Ndi nowang'ali mbo khuvinju vino viosi sisirikhoo esi omuchuki achamanyire ta, sikira kano sikekholekha muwekisi ta. 27Omuchuki Agripa, osuvira avanabii? Manyire mbo osuvira,” 28Agripa kawolera Paulo, “Kho evise vititi vino opara mbo onyala okhunomba okhuva Omukristo!” 29Paulo kawola, “Lekha mbo oweyangu wukutu namwe wuleyi, nekomba emberi wa Nyasaye mbo kachava mboniwe weng'ene ta, nausa vosi avambulira nyingayino vave ngese ndi, okhuchusakho wusa eminyololo kino.” 30Awenao omuchuki Agripa kenyokha, nende gavana Festo, nende Banike, nende vosi avali nivekhaye navo. 31Olu vali ni vakhachulao, wulimunju kawolera owasie, “Omunju ono siakholirekho siosisiosi esienyekha afwe namwe awoywe ta.” 32Agripa kawolera Festo, “Omunju ono ava mbo sikenyire Kaisari amuchekerese ta khwakhamulekhuye.”
നിലവിൽ തിരഞ്ഞെടുത്തിരിക്കുന്നു:
Evikholwa 26: LNTPP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©The Bible Society of Kenya, 2024
