Aki 16
16
Utimoti a gye utung ha Upọl le Usailas
1Upọl befe le Usailas be gye kushu tan gbe he Udebe le Ulistra. Undi abọng-ale ususo a ma yi ha he Ulistra, be ko he le Utimoti. Anam ọ a bọng ha Ujeso, u yi undi Ijuus, Atyam u shi Igrik. 2Bebuye bendi abọng-ale gbam he Ulistra le Ikonium be maa kọng kinunung gba le he. 3Upọl a ma kee le u kpa he he u fel tan utung he ahe. A ten he, le gbe bendi Ijuus puu abe be yi he biteng bimen ana be ngye le atyam Utimoti a ma yi undi Igrik a. 4Nya ana be maa tan mbee abọng atyetye-atyetye, be maa bun Iten da bendi abọng-ale. Iten imen i na bebwaa-kisọm Ujeso le bekandi be he Ujeruselem be ma ke. Be de be le be ndọ Iten imen i. 5Awu bendi abọng-ale a fel le ingie, kugii kubel ku fel go igo igo.
Itam ashinyọng Upọl gbe le ungikye Umasedonia
6Be le gbe he bigie abi Ufrigia le Ugalesha. Ukatia Kunyọng a bọng abe le be bun igie Unim he kubọng Eshia ye. 7Be le wu he Umisia, be kaa le be gya he Ubitinia, ukpọ Kunyọng Ujeso ku bọng abe ye. 8Be fel gbe ha he Umisia ana gye he Utrowas gwaa ha umbwo ukandi. 9Nya he kusu kumen ana Unim a tyung Upọl kiwọm. A nde undi Umasedonia a be naa, u tim he anung le, “Gyọng be le he igbindi Umasedonia wo be kpel li.” 10Nya kukwo-kukwo, mi Uluk, mi bo utung ha abe gye he Umasedonia, likọye li gim le Unim a kee le li le bun kisọm kinunung de bendi ha.
Uledia a bel fel undi Ukristi he Ufilipai
11Li ngwee kinọng lishọ le he Utrowas gbe ligbe-ligbe gye he kubọng Usamotras ahwu ku yi he kudyan umbwo. Fem taa ashi, li gye he Uniapolis. 12Li bo le ha gye he Ufilipai, angwu a ma yi lishi angi li dyam kaang he kubọng Umasedonia. Be ma yi he abwo Urom a, li kwu ha zi ati.
13He liti-uwel li gbe tang he igye le he ungwu-likọng kubọng gye he ungwu umbwo he kipi li ma gim le li nda kipi li ke ushang, li bel kwu ko keb akọng-ale ha bengingye abe be ma yi gbọng ha. 14Ungingye ken angwu be ko le Ulydia a ma yi ha. A maa ba le he Utyatira a. A maa sha ushi bihwọm abi bi yi pul-pul. A ma yi undi angwu u fe Unim a, Ada Unim a ma ha shi-e le u dang kutyung gyo ashi Upọl a maa kọng. 15Ufe-gyang ọ, bendi bema ọ, li wu abe umbwo. A kung de li le, “Gbe ma gim le mi bọng ha Ada Ujeso kigyang a, ma be kwu ha ami ushọm.” A kung tim li anung.
Upọl befe le Usailas he igaadye
16He liti ken li maa gya he kiteng ashi be kọng ha Unim, li kpee le unwaan ungingye angwu a ma yi ufee. Ikeb ibibi i shi he ahe. I maa sha he u kọng ashi ki be shi. A maa sha unde kaang ka bekandi bema gba he a de le bendi ashi ki be shi fe be. 17A maa tan pwọm li, bel baa Upọl, u yi gaa kọng le, “Bendi aben be yi bebwaa-kisọm Unim angwu a dyam a. Be da amen kitaa ma shi, he ma kwu le likpan kunyọng.” 18A ma shi na he ati gbam, ki ha nyung Upọl he lityam, a bel ashi, u de ikeb ibibi imen ana le, “Mi da-a le wo fem le he ahe he lizen Ujeso Kristi.” Ikeb imen ana i fem le he ahe nya kukwo-kukwo.
19Nyọng bendi abe be yi le he be nde le lishi andọ-ale libel le be shi unde li mbee, be kwu Upọl befe le Usailas, su le be le hwaa le bekandi he ushokwo kate. 20Be te le be le hwaa le bekandi Urom. Be de le, “Bendi aben be yi Ijuus a. Be yi tan le anaa ha abel kubọng. 21Be hwọ bendi akpe angi Iten ityan i bọng le li shi ye. Li ha ndu sha akpe amen i ye, likọye bel li yi bendi Urom a.”
22Liwu bendi li fe abwo he linaa limen ana. Bekandi be shwa gie abe aliga, be de bendi le be kpam abe le binde. 23Be kpam abe kaang, be ha te le be le fe he igaadye. Be de ukang-igaadye le u nde be kinunung. 24Nyọng a kpe ikeb anyin kpe-kpe, a te le be le ngib fe he kipo ashi le he afee-afee, a fe be afung he abee nya ana be teb he.
25He kididyan kusu, Upọl befe le Usailas be maa kọng ha Unim, be yi gyam agyam pee he. Abe igaadye abe be teng be ma yi kwu be gyo abe. 26Isun i ma kwuo nya imbul-imbul. Lishii ushọm igaadye ọ li nyung he abwo. Ashi puu a kung buu nya kukwo-kukwo, ashishi-likaa a shang waa bendi igaadye puu le ha abwo. 27Undi angwu u kang igaadye a wum le he kunde. A nde ashi a yi hwuo, u kọng le bendi igaadye be paa nim, a shwa waa usukwagya le u gwa kuhwo-ma. 28Upọl a kung gaa kaang de-e le, “Shi do kuhwo-gang ye, li yi nyin puu.”
29Undi angwu u kang igaadye a de le be be le kimọ-kinde. A buu gye ha afee le tim anung he kushu Upọl befe le Usailas, u yii tung. 30A bo kpe be gye le be he igye, le bii abe le, “Bekandi, mi shi na a, mi kwu le likpan kunyọng?”
31Be fan he le, “Bọng ha Ada Ujeso, ma wo le kikwu-lihwan kigang ma kwa le likpan kunyọng.” 32Be le bun kisọm gbe le Ada Ujeso de be befe le bendi bema abe be teng. 33Nya he kusu kumen ana undi umen angwu u maa kang igaadye ana a le to abe bibaa bibel. Ufe-gyang ọ, bendi bema ọ, be ma wu abe umbwo nya kukwo-kukwo. 34A kpe Upọl befe le Usailas gye le be he ahe ushọm le ke be lizi be zi. Ufe-gyang le kikwu-lihwan kima be ma yi le igọ likọye be bọng ha Unim.
35Ashi a taa, bekandi Urom be sọm bigam-ashi le bi le de undi angwu u kang igaadye le u le de baa Upọl be ndu gye. 36Undi umen ana a le de Upọl le, “Bekandi Urom be sọm kisọm le mi tyang amen abwo. Ma ndu gye le kukwun.”
37Upọl a kung de abe bigam-ashi le, “Kpaa ye, be kpam li ikwun he udyeshi faale ashi li shi, be te le bel le fe he igaadye, ki shi le li yi bendi Urom a. Kanaa-anaa i be kee le be nyia inyia fem li. Befe-gyang be be fem li.”
38Bigam-ashi bi te le igie anyin le de bima-uteteb Urom. He kunyọng ahwu bekandi be gyo le Upọl befe le Usailas be yi bendi Urom a, be fel he kushel. 39Be be tim abe anung le be tyang ke be. Be fem abe le he igaadye. Be de be le be gbe le ha he kubọng. 40Nyọng Upọl befe le Usailas be be le he afee igaadye, be gbe gye he ushọm Ulydia. Be nde bendi abọng-ale ha, be fe be ingie, be ha gbe le ha.
നിലവിൽ തിരഞ്ഞെടുത്തിരിക്കുന്നു:
Aki 16: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
