Aki 17
17
He Utesalonika
1Nyọng Upọl le bendi-utung bema be gbe he Amfipolis le Apolonia be be he Utesalonika he kipi ushọm Unim angwu Ijuus i kwu liwu u yi. 2Na Upọl u sha shi, a gbe gye ha he ushọm angwu Ijuus i sha kwu liwu, a ma kung ati uwel akie u bun ikọli he abe le he igie Unim. 3A maa bun da abe, u tyung abe le ki ma yi kpe-kpe le Ujeso Kristi u kpe kingie hwo, u wum le he lihwu. Upọl a de be le: “Ujeso umen angwu mi de men i u yi Ukristi, Undi-likpan angwu Unim a sọm be he igye anyin a.” 4Bendi Ijuus besuso le bendi Igrik gbam abe be fe Unim le bekandi bengingye ọ be bọng ashi Upọl a kọng, be fel utyang ha Upọl befe le Usailas.
5Bendi Ijuus abe be bọng ye be ma fel he ashi abung-ale. Be le gbọng kugam bendi bebibi le he ushokwo kate, be keb linaa ashele he afee kubọng kumen ana. Be gye he afee ushọm Ujason le ikeb he be le kee kwu Upọl befe le Usailas ke bendi. 6Be be, be nde be ye. Be suu le Ujason le bendi abọng-ale besuso le hwaa le bekandi kubọng, be gaa le, “Upọl befe le Usailas be tan le linaa mbee igye puu. Kanaa-anaa i be fel hen ha abel kubọng. 7Ungikye umen angwu be ko le Ujason i, a kpe be ndọ he ahe ushọm. Puu ubel be ban Iten Usiza, Usu ukandi Urom a, nyọng be de le usu ususo u yi nyin, be ko he le Ujeso.” 8Nyọng be gyo ashin, liwu le bekandi kubọng li ma fel kuyaya. 9Bekandi be de Ujason le abe be teng le be ke unde, be ha tyang abe abwo.
He Uberia
10Kusu ku gye-gye, bendi abọng-ale be sọm Upọl befe le Usailas gye he Uberia. Be le wu ha, be gbe gye he ushọm Unim angwu Ijuus i kwu liwu. 11Bendi abe he Uberia be ma yi le ishi hwo abe he Utesalonika. Be dang kutyung gyo igie Unim le kigyọ. Be maa bo ashia Unim angi be fee le-iti mbee ati kpam he be be nde le biwọm abi Upọl u kọng bi yi kigyang a? 12He ashin, bengikye le bengingye Igrik gbam abe be yi he lishi likọng nya ana Ijuus ọ titi be ma bọng.
13Bendi Ijuus abe be yi he Utesalonika be gyo le Upọl u bun igie Unim da bendi he Uberia ọ. Be be ha, be shi bendi abena be fel le Upọl he linaa. 14Bendi abọng-ale be gbe le Upọl nya kukwo-kukwo gye he ungwu umbwo ukandi. Ukpọ Usailas befe le Utimoti be ngyọ kwu ha he Uberia. 15Bendi abe be teng Upọl gye he Atens, be le wu ha tem le kisọm le ha ahe le ke Usailas le Utimoti le be pwọm he gye ha faale kunyọng aban-ale.
He Atens
16Nya ana Upọl a ma yi kwu he Atens, u nyọng Usailas befe le Utimoti, ki ban he he lityam na a nde kubọng kumen ana ku sho le ikem. 17A maa kwa likọng utung ha Ijuus le bendi Igrik abe be shel Unim he ushọm Unim angwu Ijuus i kwu liwu, mbee le he ushokwo kate liti liyang-yang. 18Liwu bendi Epikurian le Istoik be keb afung-ale fe-e, besuso be bii le, “Kibang ashi undi kihwee umen i u kọng?” Besuso be de le, “Pisoye u kọng dyam inim kubọng kususo a.” Be maa kọng na likọye Upọl a maa bun kisọm kinunung gba le Ujeso le awum-ale le he lihwu. 19Be kung Upọl gye le he he Areopagus he kipi bekandi kubọng be kpee. Be de-e le, “Li kee le li ngya uhwọ-ale ufufe angwu wo kọng gbe le he i. 20Bikaa biwọm bisuso abi li gyo-a wo kọng bi yi li bifufe. Li kee le li ngya ashi bi ze.” 21(Bendi Atens puu le begaa-ndi abe be yi nde ha be kee le be kung kunyọng kubel gyo gba le biwọm bifufe biyang-yang, be mbee kọng gbe le bi.)
22Upọl a bo naa ha liwu Areopagus kọng le, “Men bendi Atens, mi nde le ma kaa le ma fa inim imen gba he biwọm puu abi ma shi. 23Nya ana mi tan kel-kel ha amen i, mi nde biwọm abi ma fe, mi mbee nde kimbe ashang-ale, ma fee fe ha le,
ke Unim angwu li ngye-e ye.
Nyọng ki yi nyin ma ngye ashi ma fe ye, umen angwuna na mi be mi bun de men gbe le he nyin.
24“Unim umen angwu a mbe igye le biwọm puu abi bi yi hen i na u yi le lifung-atabe le itang. U nda he ishọm angi be tye ngi le abwo a ye. 25Ki fọng he le kiwọm kiyang-yang ashi undi-gye u shi gbe he aki ashele ke-e ye. Ufe-gyang na u ke bendi-gye likpan le kunyọng ahwu u dim le biwọm puu abi bi teng. 26A shi bendi-gye puu le ha undi a ken a. A shi abe be nde mbee igye puu. Ufe-gyang na a ma ndọ kunyọng le biteng abi be be nde. 27A ma shi bendi puu le be kee he, he be nde le be nda he, he kunyọng ahwu be shun he. Unim u yi kigbe-kigbe le ha abel ye likọye, 28‘Ufe na u ke li likpan le kiken le kunyọng.’ Ki yi nya ana bendi bemen abe be bilishi be ma kọng a. Be ma de le, ‘Bel ọ titi li yi bebwaa-ma a.’
29“Gbe li yi bebwaa Unim a, li shi gim le Unim u yi katelakpa ake undi-gye a kung igold le isiliva le akọ shi gbe he lingye le ugim uma a ye. 30Le-iti Unim a maa gwa ashi wa biban bendi he kunyọng ahwu be ma wa ngye-e ye, ukpọ kanaa-anaa i a de le bendi puu he kiteng kiyang-yang be bel le he bibibi bibel. 31A ndọ liti angi u be tang ushe bendi-gye puu kpa-kpa gbe ha undi angwu a waa ndọ tata. A tyung le ashin ki yi kigyang a gbe he awum-ale undi umen i le he lihwu.”
32Nyọng be gyo gbe le awum-ale le he lihwu, besuso be fel nyan he, ukpọ abel be de-e le, “Li kee le wo mbee bun likọng anyin de li kunyọng kususo.” 33Upọl a kung gbe le ha he liwu akpee-ale bekandi kubọng. 34Bendi besuso be fel bendi-utung Upọl, be bọng ha Ujeso. Udiyonisus angwu a ma yi he liwu bekandi abe be kwu liwu kubọng angi be ko le Areopagus le ungingye angwu be maa ko le Udamaris le bendi besuso be ma yi he liwu bendi abọng-ale limen i.
നിലവിൽ തിരഞ്ഞെടുത്തിരിക്കുന്നു:
Aki 17: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
