Aki 15
15
Ukpe-ale he Ujeruselem
1Bendi besuso abe be bo le he Ujudia be he Antiyọk be hwọ bendi abọng-ale le be ha ndu kwa le likpan kunyọng faale afa-ale be ten na Iten Umosis i kọng ye. 2Upọl befe le Ubanabas be fung fe be kaang gbe le shi. Be shi ugim le Upọl befe le Ubanabas le bendi besuso le ha Antiyọk be gye he Ujeruselem le kọng ha bebwaa-kisọm Ujeso le bekandi gbe le likọng limen i. 3Liwu bendi abọng-ale li sọm abe gbe. Nya ana be ma le gbe he Ufonishia le Usameria be maa bun da bendi na bendi abe be yi Ijuus a ye be bel atyam hwaa le Unim. Kisọm ashin ki shi bendi abọng-ale puu be fel le igọ kaang. 4Be le wu he Ujeruselem. Bebwaa-kisọm Ujeso le bendi abọng-ale le bekandi bebel be kpe be le igọ. Upọl befe le Ubanabas be de be biwọm puu abi Unim a ma shi gbe ha abe.
5Bendi abọng-ale besuso abe be yi he likwu bendi abe be yi Iferesis be bo kinaa kung kọng le, “Ki yi kpe-kpe le be ten bendi abe be yi Ijuus a ye, be de be le be ndọ Iten Umosis.”
6Bebwaa-kisọm Ujeso le bekandi bendi abọng-ale be le kpee he be shi ugim gbe le likọng anyin. 7Be kọng gbe kigbe. Ipita a ha bo kinaa kọng le, “Bebuye, ma ngye le le-iti Unim a ma waa mi le he liwu limen le mi bun kisọm kinunung de bendi abe be yi Ijuus a ye he be gyo, be mbee bọng ha Ujeso. 8Unim umen angwu a ngye atyam bendi puu i, a tyung le a kpe be gbe he akele ubel Ukatia Kunyọng uma nya ana a ma ke li. 9A gie li bikwu ye, a to taa atyam abel gbe he abọng-ale 10Kibang a, ma ha gil Unim gbe he akung-ale ukpung so bendi abọng-ale? Ukpung umen i, betie-tyan ọ be ma so-i mbee, nyọng bel ọ li so-i mbee ye. 11Dia! Bel li bọng le li fel le likpan kunyọng gbe he beshi Ada Ujeso, nya ana befe ọ be yi le ngi.”
12Liwu puu li ma kwun atyung shang, nya ana be ma dang kutyung gyo na Upọl befe le Ubanabas be de be gbe le bitaa le bikwole-kuhwo abi Unim a shi he liwu bendi abe be yi Ijuus a ye gbe ha abe. 13Nyọng be ma mbee, Ujems a kung kọng le, “Bebuye, ma gyo mi. 14Usaimọn a kọng na ki shi nyọng Unim abe hwaa le bendi abe be yi Ijuus a ye he u waa kung bendi le ha abe le be kwu bema. 15Ashin ki kee ha igie angi bitye-ugie kisọm Unim be fee he kushia Unim le-iti le,
16“ ‘Mi ba tem le kikwu-lihwan Udebid ashi ki paa, gbọng ukem,
mi be tem le bishii bima tye nya ana bi ma yi.
17Mi ba sha biwọm abin he bendi abe be yi Ijuus a ye,
abe mi ko le be kwu begi be-gyang,
be be kee mi Atyabel Unim,#15:17 Emọs 9:11, 12
18angwu a shi biwọm bimen abi be ngye gbe le bi le-iti.’ ”
19“Ugi ugim u yi le bendi abe be ngye Unim ye abe be be hwaa le Ujeso li shi ke be kingie ye. 20Li fee kushia hwan hwaa le be de be le, be zi biwọm ukem ye likọye bi yi biwọm abel a, be ndọ kuhwobel betaa-betaa le he akpla atan-ale, be zi inyia angi be ngib gwu he abwo ye, be zi anung inyia ye. 21Li de be biwọm abin, likọye kung le ha item na li keb li bo gbe le bi le he ashia Iten Umosis he ishọm Unim ityan angi be kwu awu he liti-uwel liyang-yang. Li bun igie ima mbee biteng puu.”
Be fee kushia hwaa le bendi abọng-ale abe be yi Ijuus a ye
22Bebwaa-kisọm Ujeso le bendi abọng-ale puu le bekandi bebel be tim waa bendi le he liwu libel sọm le be te utung ha Upọl befe le Ubanabas gye he Antiyọk. Be waa Ujudas angwu be ma mbee ko le Ubasabas befe le Usailas. Bendi bemen befee i be ma yi bendi abe bendi abọng-ale be fe lityam ha abe a. 23Be sọm abe le kushia ahwu be fee le be le ke. Be fee le,
Bel bebwaa-ndamen abe li yi bebwaa-kisọm Ujeso le bendi abọng-ale le bekandi,
Bendi abọng-ale abe ma yi Ijuus a ye abe he Antiyọk, Usiria le abe he Usilisia:
Li kọng le men.
24Li gyo le bendi besuso le he liwu lityan be be hwaa le men ha, be teb le men, be kọng biwọm abi bi waa amen ufung. Bel na li sọm abe ye. 25Bel puu li kwu liwu tim le li waa bendi sọm hwaa le men. Be ba utung ha Ubanabas befe le Upọl a be ki nyin li le be, 26abe be kung likpan libel ndọ he be-gyọng he be shi aki he lizen Ada Ujeso Kristi. 27Li sọm Ujudas befe le Usailas hwaa le men he be be de men biwọm abi li fee le ungwu ọ titi. 28Ki ngbeb Ukatia Kunyọng le bel ọ titi le li so amen be ngbeb besuso fem Iten angi i yi kpe-kpe nyin tyang ye. 29Ma zi biwọm ukem ye, ma zi anung inyia ye, ma zi inyia angi be ngib gwu he abwo ye, ma ndọ kuhwo-men betaa-betaa le he akpla atan-ale. Gbe ma ndọ kuhwo-men le he biwọm abin puu, ha ma shi kinunung.
Ki fel mbee ati.
30Bebwaa-kisọm bemen i be bo ndo he Antiyọk. Be le gbọng bendi abọng-ale sho he kiteng ken kung kushia ana ke be. 31Bendi abena be bo kushia kumen i. Be fel le igọ he kisọm ashi ki fe be ingie nyin. 32Ujudas befe le Usailas abe be ma yi bitye-ugie kisọm Unim a, be kọng ha abe, fe bendi abọng-ale ingie gbe kigbe kaang. 33Be kwu ha abe ha gbe kigbe. Ki ma fel le be ndu gya, bendi abọng-ale be de be le be gye le kukwun le hwaa le bendi abe be sọm abe. [34Ukpọ Usailas a shi ugim le u ngyọ kwa ha.] 35Upọl befe le Ubanabas be ngyọ kwu he Antiyọk, befe le bendi besuso gbam be bun kisọm gbe le Ada Ujeso de bendi, be mbee hwọ abe.
Upọl befe le Ubanabas be swan fe bende
36Ati a gbe, Upọl a de Ubanabas le, “Li tem le kọng le bebuye bendi abọng-ale he kiteng kiyang-yang he kipi li bun kisọm gbe le Ada Ujeso he li nde na be yi ha.” 37Ubanabas a bọng, ukpọ a kee le be te le Ujọn Mak ha. 38Upọl a gim le be te le he ye, likọye a ma ngyọ kwu utung ha a be le wu he umbee-likel aki abel ye. A ma gbe tyang abe le he Upamfilia. 39Be swan fe bende kaang. Be ha tang he abwo le ha bende. Ubanabas a kpe Umak gbe le he le ngwee kinọng lishọ gye he Usaiprus. 40Ukpọ Upọl u waa kung Usailas gbe, bebuye bendi abọng-ale be kung abe fe Ada he kubwo le beshi bema be kwu utung ha abe. 41Upọl a gbe he Usiria le Usilisia le fe awu bendi abọng-ale ingie.
നിലവിൽ തിരഞ്ഞെടുത്തിരിക്കുന്നു:
Aki 15: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
