Aki 14
14
He Ikonium
1Ki shi kitaa a ken he Ikonium. Upọl befe le Ubanabas be gye he ushọm Unim angwu Ijuus i kwu liwu le bun igie Unim le ikeb kaang le bendi Ijuus le Igrik gbam be ma bọng ha Ujeso. 2Ukpọ Ijuus angi i bọng ha Ujeso ye i ma tim ititim fe bendi abe be yi Ijuus a ye le be bel fel linaa ha bendi abọng-ale. 3Upọl befe le Ubanabas be kwu ha gbe kigbe kaang. Be maa kọng gboo gba le Ada Unim angwu a tyung le kisọm ashi be bun gbe le inung ima ki yi kigyang a, gbe he akele ubel ikeb le be shi bikwole-kuhwo. 4Liwu limen he kubọng ana li tang he abwo. Besuso be ma yi ke Ijuus, besuso be shi ke bebwaa-kisọm Unim. 5Bendi Ijuus le bekandi bebel le bendi abe be yi Ijuus a ye be tim le be shi abe lifee, be maa abe akọ. 6Bebwaa-kisọm Ujeso bemen i be gyo gbe le shi, be buu gye he ashi Ulaikonia angi be ko le Ulistra le Udebe le abọng angi a nde kel-kel fe Ikonium. 7Be ma gye kushu bun kisọm kinunung mbee abọng amen ana puu.
He Ulistra le Uderbe
8Ungikye ususo a ma yi he Ulistra angwu a maa tan mbee ye. A ma hwo abee le ha lifung anam a. 9A ma dang kutyung gyo igie angi Upọl u bun. Upọl a nde-e kpọ, u ngye le ungikye angwun u yi le abọng-ale le Unim u mbee he. 10Upọl a kung kọng le ikeb de-e le, “Bo naa kinaa kpa-kpa.” Ungikye ana a tie bo kinaa keb litan atan-ale.
11Liwu bendi be nde ashi Upọl a shi, be fel gaa he igie ibel angi Ulaikonia le, “Inim i bel fel bendi-gye be hwaa le bel.” 12Be kung abe kwu inim ibel. Be kwu Ubanabas lizen le Uzeus, be kwu Upọl le Uhemis, likọye ufe na a maa kọng he abe kpa-kpa. 13Undi angwu u shang Uzeus angwu kiteng ashang-ale kima ki yi he item ugying, a be le ikyeb bigundu le bibubọ ikwan be naa he ungwu-likọng. Ufe ọ, liwu bendi ọ, be ma kee le be shang bebwaa-kisọm Ujeso.
14He kunyọng ahwu Ubanabas befe le Upọl, bebwaa-kisọm Ujeso, be gyo ashi be kam le be sha, be shwa gie inditen ibel he ki tyung le ki ngbeb abe ye. Be buu gye ha he liwu bendi keb aga-ale le, 15“Bebuye, kibang a ma shi ashin? Li yi bendi-gye nya ana men ma yi a. Li be nyin he li be de men kisọm kinunung he men ma bel le he biwọm ilaa ma nde ashi hwaa le Unim angwu u yi uwum a. Unim umen i na a shi lifung-atabe, le itang, le umbwo ukandi le abi bi yi ha puu. 16Le-iti a ma tyang bendi abe he abọng puu le be shi ashi be kee. 17Ukpọ a tyung kuhwo-ma gbe he binunung abi u shi. U sha umbwo u ndọ le he lifung-atabe. U sha itia imen i mbwa he kunyọng ahwu ku yi kpa-kpa, he men ma kwu le lizi angi ma zi gwul. U shi atyam amen a sho le igọ.” 18Ma na bebwaa-kisọm Ujeso be kọng ashin de be ọ, bendi abena be maa la tyang abe ashang-ale ye.
19Bendi Ijuus besuso be ma be le he lishi Upisidia angi be ko le Antiyọk, besuso be be le he Ikonium. Be shi bendi abena be tem fel linaa ha Upọl. Befe puu be maa Upọl akọ, be su le he le ha lifung-ushu le tyang he igye. Be maa kọng le a hwo. 20Bendi-utung Ujeso be be kaa kel-kel fe-e. A bo kinaa tem gye ha he lifung-ushu. Ashi a taa, befe le Ubanabas be tem gye he Udebe.
Be tem gye he Antiyọk Usyria
21Upọl befe le Ubanabas be le wu ha he Uderbe, be ha bun kisọm kinunung de bendi, bendi gbam be bọng ha Ujeso. Be ha tem gye he Ulistra, be bo le he Ulistra gye he Ikonium. Be ha gye he lishi Upisidia angi be ko le Antiyọk. 22Be maa fa bendi-utung Ujeso ingie le be tyang abọng-ale ha Unim ye, be naa gen. Be hwọ bendi le, “Ki yi kpe-kpe le li kpe bingie gbam ma ukpọng li ha ngwee he kiteng kusu Unim.” 23Be gye he liwu bendi abọng-ale liyang-yang le waa bekandi abe be nde gbe le be ke be. Be kung abe be bọng ha Ada Ujeso fe-e he kubwo gbe he akọng-ale ha Unim le itung ando-ale. 24Be tan mbee Upisidia puu be ha gye he kubọng Upamfilia. 25Be bun igie Unim de bendi he lishi Upega, be ha gye he Atalia.
26Be ngwee kinọng lishọ le ha gye he lishi Usiria angi be ko le Antiyọk, he kipi bendi abọng-ale be ma kung abe fe Unim he kubwo le be shi aki angi be le shi mbee nyin. 27Be le wu he Antiyọk, be gbọng bendi abọng-ale be he kiteng ken. Be de be biwọm puu abi Unim a shi gbe ha abe, be mbee de be gbe le libwo angi Unim a shi ke bendi abe be yi Ijuus a ye le befe ọ be bọng ha Ujeso. 28Be kwu ha liwu bendi abọng-ale he Antiyọk gbe kigbe kaang.
നിലവിൽ തിരഞ്ഞെടുത്തിരിക്കുന്നു:
Aki 14: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
