Aki 13
13
1Bitye-ugie kisọm Unim le bendi abe be hwọ bendi be ma yi he liwu bendi abọng-ale he Antiyọk. Azen abel na a yi i nyin, Ubanabas le Usimeọn (angwu be maa ko le Undi-ushi) le Ulucius (angwu u be le he Usairen) le Usọl, Umanayen (angwu be ma kwob utung ha Usu Uherọd). 2Nya ana be maa fe Ada Unim le itung ando-ale, Ukatia Kunyọng a de be le, “Ma waa Ubanabas befe le Usọl ndọ tata ke-m he be shi aki angi mi ko abe le be shi.” 3Nyọng be ndo itung le ushang akele mbee, be pwọm abe abwo he lishi ha ndu sọm abe gye he igye.
Be gye he Usaiprus
4Ubanabas le Usọl, be bo ndo he Uselusia le ngwee kinọng lishọ le ha gye he kubọng Usaiprus ahwu ku yi he kudyan umbwo. Ukatia Kunyọng na a ma sọm abe. 5Nyọng be wu he Usalamis, be bun igie Unim he ishọm Unim angi Ijuus i kwu awu. Ujọn angwu be mbee ko le Umak a ma yi utung ha abe he u kpel abe.
6Be gbe mbee ashi kubọng ahwuna puu, be ha gye wu he lishi Upafọs. Be nde undi-anọng ususo ha angwu be ko le Ubaa Jeso. A ma yi utye-ugie iman a. 7A ma yi udim ukandi angwu be maa ko le Usegius Pọlus angwu u nde gbe le kubọng kumen ana a, ukandi umen i a bilishi kaang. A ko Ubanabas befe le Usọl le hwaa le he le a kee le u gyo igie Unim. 8Ukpọ undi-anọng umen i (angwu be maa ko he igie Igrik le Elimas) a ma fung fe be, u kaa he u shi ukandi ana u bọng ha Ujeso ye. 9Usọl umen angwu be maa fel ko le Upọl, angwu a ma yi le ikeb Ukatia Kunyọng kaang, a bel ashi nde-e kpọ. 10A de-e le, “Wo unwaa usu bibibi, wo yi linaa ha kiwọm kiyang-yang ashi ki yi kinunung. Wo sho le bitaa beshu bebibi puu ha awo lityam. Mbee kunyọng kpam wo kaa he wo shi biwọm Ada Unim abi bi yi kigyang le bi fel iman. 11Kanaa-anaa i kubwo Ada Unim ku ndu ndo he awo. Wo ba hwọ ashi he inwaa ati zang, wo tem ba nda libwee ọ mbe ye.”
Nya kukwo-kukwo kifufeb ki kung gye Elimas he atọng-shi kpen, u fel wuọ mbee bipi kee undi angwu u kwu-e abwo teng he. 12Nyọng ukandi umen ana a ma nde ashi ki shi, a bọng ha Ujeso. Ashi be ma hwọ bendi gbe le Ada Ujeso ki kwu-e he kuhwo.
He Upisidia angwu Antiyọk
13Upọl befe le bendi-utung bema be ngwee kinọng lishọ le he Upafọs le shul he Upega he kubọng Upamfilia. Ujọn a tyang abe he ana tem gye he Ujeruselem. 14Be bo le he Upega gye he lishi Upisidia angi be ko le Antiyọk. He liti-uwel Ijuus be le kwu he ushọm Unim angwu Ijuus i kwu liwu. 15Bekandi ushọm Unim umen ana be bo le he ashia Iten Umosis, le ashia bitye-ugie kisọm Unim puu, be sọm undi de baa Upọl le, “Bebuye, gbe ma yi le igie angi i fe bendi ingie, ma bun.”
16Upọl a kung bo kinaa yọ abe abwo le be tyang le kihwee, u keb akọng-ale le, “Bebuye bendi Izwel, le begaa-ndi puu abe be fe Unim, ma dang kutyung gyo mi. 17Unim angwu bendi Izwel be fe a ma waa kung betie-tyan, u shi abe be gboo he kunyọng ahwu be ma yi ifee he kubọng Igypt. Unim a fem abe le ha gbe he ikeb ima angi i dyam. 18Be shi tọ he nya ana u nde gbe le be he ugbaa-libeb aze asi afee. 19A ndo kukye hwo abọng adyọng-ifee he Ukenan kung itang ibel ke bendi Izwel.
20“He kunyọng ahwu be ma kwu ha aze asi lisi le aze asi afee le ngi lihwo, Unim a ma ke be bekandi abe be maa abe ushe kpam be kwọm he kunyọng Usamuwel utye-ugie kisọm Unim. 21He kunyọng ken be ma de le Unim u ke be usu. He ashina Unim a kung Usọl, unwaa Ukish, angwu a ma yi he kikwu-lihwan Ubenjamen le u kwu usu ubel. Usọl a kam abe aze asi afee. 22He kunyọng ahwu Unim a shul he, a kwu Udebid kusu le u kpe kidem kusu Usọl. Unim a naa ushada gbe le he le, ‘Mi nde le Udebid, unwaa Ujesi, na u yi kitaa undi angwu u shi nyin mi he lityam. U yi undi angwu u be shi biwọm puu abi mi kee he le u shi a.’#13:22 1 Usamuwel 13:14
23“Udebid umen i na Unim a shi igia ima, Ujeso, le u kwu Undi-likpan bendi Izwel nya ana a ma ke ukyeb. 24Ma ukpọng Ujeso a ha be, Ujọn a ma bun de bendi Izwel puu le be bel atyam le he biban bibel, be be he u wu abe umbwo. 25Nya ana Ujọn a maa ndu mbee aki ama, a maa da bendi le, ‘Ma gim le mi yi undi angwu ma baa lishi a? Mi yi ufe a ye. Ufe u pwọm mi le ha. Mi kpe angwu mi pel he indii ikwob abee ọ ye.’ ”
26Upọl a mbee gye kushu kọng le, “Bebuye bebwaa Ebraham, le men bendi abe be yi Ijuus a ye abe ma shel Unim, kisọm kimen ashi gbe le likpan kunyọng i ki yi ke li bel a. 27Bendi Ujeruselem le bekandi bebel be ma nde shob Ujeso ye, ma na ọ, he akọng-ale bia he, be ma fe sho igie bitye-ugie kisọm Unim angi be maa bo kunyọng kuyang-ayang he liti-uwel Ijuus. 28Ma na be ma nde kiwọm ashi a shi ki kpe le be gwu-e ye ọ, be de Upalet le u ke ikeb he be gwu-e. 29He kunyọng ahwu be ma shi-e biwọm abi be fee gbe le he he kushia Unim le-iti puu, be shul he le he kikpakpa le ngi. 30Ukpọ Unim a wum he le he lihwu. 31Bendi abe be ma be utung he ahe le he Ugalili be he Ujeruselem be nde-e ati gbam. Kanaa-anaa i be fel naa ushada gba le he da bendi betyan.
32“Li be he li de men kisọm kinunung gbe le Ujeso Kristi le kiwọm ashi Unim a ma ke betie-tyan ukyeb le u ba sha, 33a shi ashi ke li bel igia ibel, gbe he awum-ale Ujeso le he lihwu. Nya ana ki yi fee he kushia Agyam lishi angi lefee,
“ ‘Wo yi unwa-agi a.
Kunyin mi fel Atia a.’#13:33 Agyam 2:7
34Unim a ma wum he le he lihwu, le likwọm lima li tem hwee ye, nya ana Unim a de le,
“ ‘Mi ba ka-a bekwun abe mi ma kyeb ndọ Udebid.’#13:34 Azaya 55:3
35Ki ma mbee yi fee fe he kiteng kisuso le,
“ ‘Wo ba tyang imi,
unwaa-gang angwu wo waa, le likwọm ligi li hwee ye!’#13:35 Agyam 16:8-11
36“He kunyọng ahwu Udebid a ma so uwum, a ma shi ashi Unim a kee. A hwo, be ngi-e gwaa ha betie-ma, likwọm lima li hwee. 37Ukpọ likwọm undi angwu Unim a ma wum le he lihwu ufe lima hwee ye.
38“He ashin, bedimgi, mi kee amen le ma ngye le, atyang-ale ke le he biban gbe ha Ujeso na be maa kọng de men i. 39Gbe he ahe undi uyang-yang angwu a bọng u fel pọ le he kiban kiyang-yang, akwole pọ angwu ma ma yi le he he kunyọng Iten Umosis ye. 40Ma baa he kiwọm ashi bitye-ugie kisọm Unim be ma kọng, ki shi fe men ye.
41“ ‘Men bendi-inyan, ma nde,
ma ngyọ he atyang-ale kpam gba nim.
Mi ba sha kiwọm he kunyọng kumen
ashi gbe undi a be de men ọ ma be bọng ye.’ ”#13:41 Uhabakọk 1:5
42Nya ana Upọl befe le Ubanabas be maa ndu gbe le ha he ushọm angwu Ijuus i kwu liwu, bendi abena be be hwaa le be mbee tem be he liti-uwel angi li pwọm le ngi, he be mbee be kọng gbe le biwọm abin. 43He kunyọng ahwu bendi be maa ndu gye, bendi Ijuus gbam le bendi abe be bọng nya ana Ijuus i bọng be gbe pwọm Upọl befe le Ubanabas, abe be fe be ingie le be gye kushu fe Unim angwu a tyung inung ha abe.
44He liti utyọng liti-uwel, ki ma teng zang hang bendi puu ha he lishi limen ana be be he be gyo igie Ada. 45Nyọng bendi Ijuus be nde kugi bendi gbam, be ma fel le ashi abung-ale, be kọng ban ashi Upọl a kọng, be kọng bia he.
46Upọl befe le Ubanabas be fan abe faale kushel le, “Ki ma yi kpe-kpe le li bun igie Unim de men a kushu. Ukpọ bel li tyang amen le hwaa le bendi abe be yi Ijuus a ye, likọye ma swan angi, ma mbee gim le ma kpe le ma kwa le likpan angi li ngyọ igye ye. 47Uten angwu Ada Unim a ke li u yi le,
“ ‘Mi kung amen ndọ na kikung-gboo ashi ki taa tyung bendi abe be yi Ijuus a ye
kukwo ahwu bendi-gye puu be gbe kwu le likpan kunyọng.’#13:47 Azaya 42:6; 49:6 ”
48Nyọng bendi abe be yi Ijuus a ye be gyo ashin, be ma yi le igọ, be mbee pee Ada he kisọm kimen i. Bendi puu abe Unim a ma waa le be kwu le likpan angi li ngyọ igye be bọng ha Ujeso.
49Igie Ada i ma gyam abwo mbee ugegem kumen ana puu. 50Ukpọ bekandi abe be nde gbe le kubọng be tim ititim fe bengingye abe be shel Unim, be mbee shi le kasu le bengikye abe be teng he kubọng, be fe igbuhu le be teb le Upọl be fe le Ubanabas, be de le be ndo abe le he abe kubọng. 51Upọl befe le Ubanabas be kem kumbul-mbul le he abee wu ha, he ki kwu kitaa tyung bendi ha le be shi kiban, gbe gye he Ikonium. 52Bendi-utung Ujeso be ma sho le igọ le Ukatia Kunyọng.
നിലവിൽ തിരഞ്ഞെടുത്തിരിക്കുന്നു:
Aki 13: KUIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
