Enzimäine Moisein kirju 7
7
Viennouzu
1Ižändy [Jumal] sanoi Noile: «Mene umbilauttah da ota keräle pereh. Minä näin, vai sinä täs rovus olet oigei Minun ies. 2Ota keräle seiččemin puaroin, ižäččy da emäččy, kaikis puhtahis elättilöis, da yksin puaroin, ižäččy da emäččy, kaikis ei-puhtahis elättilöis, 3da seiččemin puaroin kaikis [puhtahis] taivahan lindulois, ižäččy da emäččy [, da yksin puaroin, ižäččy da emäččy, kaikis ei-puhtahis lindulois]. Anna jatkuu mual niilöin rodu. 4Seiččemen päivän peräs Minä rubien kuadamah vihmua muale nellikymmen päiviä da nellikymmen yödy, i Minä hävitän muan piäl kai, midä on, kai midä Minä luajiin.» 5Noi luadii kai, kui käski Ižändy [Jumal].
6Konzu Noile oli kuuzisadua vuottu, algoi viennouzendu. 7Noi meni umbilauttah yhtes poigienke, akanke da poigien akoinke viennouzus pagoh. 8A [kaikis lindulois, puhtahis da ei-puhtahis,] kodielättilöis, puhtahis dai ei-puhtahis, [meččyelättilöis] dai kaikis mual vilizijöis 9umbilauttah Noin luo tuli puaroin, ižäččy da emäččy – kui käski [Ižändy] Jumal Noile. 10Meni seiččie päiviä, i viennouzendu tuli muale.
11Vuvvennu, konzu Noile täydyi kuuzisadua vuottu, vuvven toizel kuul, kuun seiččemendeltostu päiväl puhkettih kai syvyön kaivot, taivahan ikkunat avavuttih. 12Vihmui muale nellikymmen päiviä da nellikymmen yödy. 13Sinny samazennu päivänny Noi meni umbilauttah, Sim, Ham da Jafet, Noin poijat, Noin akku, kolme poigien akkua yhtes heijänke. 14Hyö i kai [muan] meččyelätit heijän rovun mugah, i kai kodielätit heijän rovun mugah, i kai vilizijät, kuduat vilistäh muadu myö, heijän rovun mugah, i kai lendelijät heijän rovun mugah, kai linnut, kai siivekkähät, 15mendih Noin luo umbilauttah puaroin [ižäččy dai emäččy] kaikis, kes on elävy hengi, 16joga luavus ižäččy da emäččy, kui käski Noile [Ižändy] Jumal. Ižändy [Jumal] salbai Noile peräh umbilautan veriän.
17Viennouzendu kesti nellikymmen päiviä [da nellikymmen yödy]. Vezi nouzi da nosti umbilautan, se nouzi korgiele da lähti uidamah. 18Vezi piäzi valdoih, se ylen äijäl liženi muan piäl, i umbilauttu uideli vien pinnal. 19Vien valdu oli moine suuri, ga sen alle peityttih kaikis korgevimat mäit, kuduat oldih taivahan al. 20Viijeletostu käzivarrele nouzi vezi niilöin piäle, i [kai korgiet] mäit peityttih. 21Sit kuoltih kaikin, kedä oli muan piäl: linnut, kodielätit dai meččyelätit, i kai vilizijät, kuduat vilistäh muadu myö, i kai rahvas. 22Kai, mi hengitti kuival mual, kuoltih. 23Kai, mi oli eläviä [kaiken] muan piäl – rahvas, kodielätit, kai vilizijät dai taivahan linnut – kai oli pyhkitty iäre muan piäl. Hengih jäi vai Noi da net, ket oldih hänenke umbilautas.
24Mua oli vien vallas sada viizikymmen päiviä.
നിലവിൽ തിരഞ്ഞെടുത്തിരിക്കുന്നു:
Enzimäine Moisein kirju 7: LIVVI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
(c) Biblienkiännändyinstituuttu, Helsinki 2003
