انجیلِ مَتّی 11
11
عیسی لاوَعون درباره یحیای تعمیددهنده
1وختی عیسی اِشتن اَ دونزه شاگردش سفارش بِکَه که چه بکرنده، راه دکَت تا چون شهرونَ دَ تعلیم بِدی و چون را لاوه بکره.
2وختی یحیی تعمید دهنده زندان دِلَ مسیح کارون درباره بشنَوِسشه، اِشتن شاگردونش بِخِرسا عیسی وَر 3تا عیسی کودَ آپَرسنده: « تَه اَ کسی اِسیش که گَوَن با، یا علایدَه نفری را منتظر ببوم؟» 4عیسی چون جواوش هِمنَه بدا: «بِشا و هر چه که وینا و اَشنوا یحیی را بوایو که 5کورَه آدمه ویننده، لنگه آدمه مِجنده، جذامیه شفا گیرنده، کَرِه اَشنونده، مردَه عه زنده آبینده و فقیرون شاده خبر آرسه. 6خُش به حال اَ کسی که چمن درباره شک مکره.»
7وختی یحیی شاگرده بِشِنده، عیسی درباره یحیی لاوش بِکَه و جماعتش بوات: «چیه وینتَنِه را بِشَییو بیابان؟ ای نِیی ویتنه خونین که بادییَم لرزه؟ 8چی وینتَنِه را بِر بِشَیو؟ مردکی که گِرونَ خلاون و لطیفه خلاون دِکَره؟ اَوِه که گِرون و لطیف خلاون دکرنده پاتشاهان قصرِ دِلَ زندگی کرنده. 9پس چیه وینتَنِه را بِر بِشَیو؟ ای پیغمبری ویتنه خونین؟ آها، اَز شما را وام که یحیی ای پیغمبرَ دَ نی چاکتره. 10اَو هَه کسیه که چو درباره پیغمبرِ کتابَ نیویشته بیاسه:
«”اَم چِمن قاصده که اِشته پیش خرسم،
که اِشته راه اِشرا حاضر بِکَره.“
11حقیقتا، شَما را وام که کسی یحیای تعمید دهنده دَ پیله ترِ، دنیا نومییاسَه امّا وِلِگ ترین شخص آسمون پاتشاهیه چو کودَ پیله تره. 12یحیای تعمید دهنده زمون تا هننه، آسمان پاتشاهی را پِر ظلم بیاسَه؛ و ظالم آدمه گَوِنده زورییَم اَجو بگیرنده. 13چون که تموم تورات وپیغمبرون نیویشته هونَ دَ تا یحیی تعمید دهنده ظهورِ زَمُون درباره خدا پاتشاهی پیشگوییشون کردِه. 14و اگم بتونو قبول بکرا، یحیی هَه ایلیا پیغمبر اِسه که قراره با. 15هر که گوش اَشنوسن داره، بشنوه.
16«امّا ام نسله مردم چی شارین اِسِنده؟ خوردِگونی شارین که بازارون دَ نشنده و اِشتن هم بازیون بِلندَ صصییَم واندِه:
17«شَما را نی بِزَیوم، وَشتَنِرون نِکه،
مرثیه مون بخونت، سینه رون نِزِه.“
18چون که یحیی بومه که نه خوردشه و نه آخَردشه اَجو وانده: ”دیو داره.“ 19انسان زا بومه که هم خورهه و هم آخَره اَجو وانده: ”دِدِسا اَو ای شیکَموعه آدم و عرق آخره آدمِ، و باجگیرون و گناهکارون رِفقه.“ اَ چه که شَما وایو هیچ عقل و حکمتتییَم جور نی.»
وای بر شهرانی که توبه نکرنده
20اُخُری عیسی شهرونیش سَرَزنش بِکَه که خیلی از اِشتن معجزونِش بِر انجام دایه به، ولی اَوه توبه نکردَه بِنده 21عیسی بوات: «وای بر شَما! ای خورَزین اهالی! وای برشَما، اِی بِیت‌صِیْدا اهالی! چون اگم معجزونی که شَما را انجام بِبِه، شهر صور و شهر صیدون دَ انجام بییَه به، چو مردم چِمه پیش تر خاکستر سر نشتَینده و پلاس دکردنییَم توبشون کردَی. 22امّا حقیقتا، شَمارا وام که داوریه روزَ دَ مجازات تاو آیردَن، شهر صور و صیدون را آسان تر بی، تا شَما را. 23و ته، ای شهر کَفَرناحوم، تونی بِشی اروازَه که اِشته سر آسمانه آرسِه؟ هرگز را نیبی. جهندمَ دَ سرنگون بی. چون اگم معجزونی که اِشرا انجام بِبه شهر سُدوم را انجام بییَه به، اَ شهر تا هاروئین روز باقی مَنتَی. 24امّا شَمارا وام که داوریه روزَ دَ مجازات تاو آیردَن شهره سُدوم را آسون تر بی تا اِشرا.»
بایا چِمِن وَر
25اَ موقع، عیسی بِوات که: «ای پِه، ای آسمان و زمین خداوند، اَتَه ستایش کرم که اَم چییون دانا آدمون و عقلمند آدمونِ را مخفیر کَردِه و خوردگون را آشکار کرده. 26هُن، ای چِمِن پِه، اِشته لطفَ و خواستَه اَم بِه. 27چِمِن آسمانیه پِه همه چیش اَمِن اوس برده. هیچ که زا نزونه جُز پِه، و هیچ که پِه نزونه جز زا، و اَ کسانی که زا بگوه، چون را، په آشکار کره.
28«بایا چِمِن وَر، ای همه‌ی کسانی که پِر زحمترون کشِسِه و شَما بار سنگینه، که از شَماهون آسایش دیم. 29چِمِن یوُغ شَما دوشِ بِگیرا و چِمِنَ دَ یاد بگیرُو چون از آرام و فروتن اِسیم و شَما جان آسایش گیره. 30چون یوغی ای که از شَما دوشه سر اُنیم آسونه و باری که از شَما دوشه سر اُنَیم سِبکِه.»
നിലവിൽ തിരഞ്ഞെടുത്തിരിക്കുന്നു:
انجیلِ مَتّی 11: KTT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company
