Ukufuma 35
35
Indaghilo izya Isiku Ilyakutuzya
1U Mozesi akababungannya poka aba Izilayeli bosi nukubabuzya ukuti, “U Mwene akubalamula ukuti: 2#Ukf. 20.8-11, 23.12, 31.15, 34.21; Lev. 23.3; Ukk. 5.12-14Mubombaye imbombo amasiku sikisi, loli isiku ilyaseveni libanje lisiku lipaghuliwa. Lisiku Ilyakutuzya lilyo lipaghuliliwe kukwane ane ne Mwene. Umuntu wesi yuyo akubomba imbombo pisiku linili, aghoghiwanje. 3Pisiku Ilyakutuzya mutakachele pakupemba umoto munyumba zyinyu.”
Ivyakwiyipa ivya mu Buzilo Ubuzelu ubwa Mwene
(Ukf. 25.1-9)
4U Mozesi akababuzya aba Izilayeli bosi bala akati, “U Mwene akubalamula ukuti: 5Pavintu vivyo mulinavyo, mubikaye ichakwiyipa kwa Mwene. Umuntu wesi yuyo akulonda pakubika ivyakwiyipa, abikaye ugolide nu siliva nu mukuba 6na amenda agha buluu na machesamile sona na machesamu na menda amatonte sona na menda agha meya agha mbuzi. 7Amakwela agha dubi amadwibike mu inki inchesamu, amakwela amatonte sona na matabwa agha mungwina 8na amafuta agha nyale na mafuta aghakupakazya aghakununkila sona nu twakufukizya utwakununkila 9na mabwe agha onikisi sona na mabwe agha pa chakuvwala ichabuputi icha efodi sona ni chakuvwala ichapachifuba.
Ivibombelo ivya Chisakasa icha Mwene
(Ukf. 39.32-43)
10“Abafundi bosi pakasi papinyu bize pakubomba vyosi vivyo u Mwene akalamula. 11Bapange Ichisakasa na menda aghakuvwinka nu tulemelo na mafulemu ni ntatikilo ni mpanda sona nubwikalilo bwache 12ni Bokosi ilya Lufingo, poka na makwi aghakunyamulila ni chikupikizyo chache nu mwenda uwakuzighila 13ni tebulo na makwi aghakunyamulila ni vibombelo vyache vyosi sona ni chibama ichakupeghiwa kwa Chala 14ni chakubikapo inyale ni vibombelo vyache ni nyale sona na mafuta agha nyale 15ni chighemo ichakufukizizyapo utwakununkila na makwi ghache aghakunyamulila na mafuta aghakupakazya nu twakufukizya utwakununkila sona nu mwenda uwakuzighila pamulyango uwa chisakasa 16ni chighemo ichakochelapo ivyakwiyipa ivyakocha poka ni chakupembapo umoto icha mukuba na makwi ghache aghakunyamulila poka ni vibombelo vyache vyosi ni beseni ilyakusukusulila poka nu bwikalilo bwache 17na menda aghakuzighila pabalaza ni mpanda zyache nu bwikalilo bwache sona nu mwenda uwakuzighila pamulyango uwa pabalaza 18nu tukwi poka ninkusa izya Chisakasa poka nu lupaso, 19na menda aghakulukiwa akiza nkani ghagho abaputi bavwalaye, bo bakubomba mu Buzilo Ubuzelu. Ghanagha gho menda agha muputi u Aloni na bana bache.”
Abantu bakwiza ni vyabupi
20Aba Izilayeli bosi bakepapo pamaso pa Mozesi, 21po umuntu wesi yuyo akaba nu moyo uwakwiyipa akizagha ni vyabupi kwa Mwene ukuti vibanje vyakuzengela Ichisakasa icha Mwene. Bakiza na vyosi vivyo vikalondiwanga pachiputo, sona na pakusona amenda agha muputi. 22Abanavuli na bakolo bosi babo bakaba nu moyo uwakwiyipa, bakizagha kwa Mwene ni nyapini ni ndelebele ni mpete sona ni vyakwibonesekezya akiza ivya golide ivyakulekanalekana ukuti chibanje chakwiyipa ichakuzyunguzya mumwanya pamaso pa Mwene. 23Umuntu wesi yuyo akaba na menda amatonte agha buluu na machesamile sona na machesamu na menda aghakupangiwa na meya agha mbuzi, na makwela agha dubi, na makwela amatonte, bakiza navyo. 24Umuntu wesi yuyo akaba nu siliva pamo umukuba akizagha navyo ukuti chibanje chakwiyipa kwa Mwene, sona umuntu wesi yuyo akaba na matabwa agha mungwina akizagha nagho ukuti ghabombe imbombo. 25Abakolo bosi abafundi bakaluka amenda amatonte agha buluu, na machesamile, sona na machesamu nukwiza nagho. 26Abakolo bosi bakaluka sona amenda agha meya agha mbuzi. 27Abalongozi bakiza na mabwe agha onikisi na mabwe aghakubika mu efodi ni chakuvwala icha pachifuba 28nu twakununkila na mafuta agha nyale na mafuta aghakununkila aghakupakazya nu twakufukizya utwakununkila. 29Aba Izilayeli bosi, abanavuli na bakolo, bakizagha nivyakwiyipa mubwighane bwabo ukuti vibombaye imbombo yiyo u Mwene akabalamula ukwendela mwa Mozesi.
Abafundi abakuzenga Ichisakasa icha Mwene
(Ukf. 31.1-11)
30Po u Mozesi akababuzya aba Izilayeli akati, “Ivwa kuno, u Mwene amusala u Bezaleli umwana uwa Uli, umwizukulu uwa Huli uwaluko ulwa Yuda. 31U Mwene amwizuzya nu muzimu wache, sona amupa ubumanyi na mahala nu bwafundi ubwa mbombo izya nyobe 32umwakuti abombaye imbombo iyakubatika ivintu ivya golide nu siliva sona nu mukuba 33nukubiza amabwe na makwi sona nukubomba imbombo zyosi izya nyobe.” 34U Mwene amupa yunuyu amahala, sona nu Oholiyabu umwana uwa Ahisamaki, uwaluko ulwa Dani ukuti abamanyisye abanji ubwafundi. 35Abizuzya nu bwafundi ubwa mbombo izyakulekanalekana, ubwafundi ubwakubiza nu bwakubatika nu bwakuluka amenda amatonte agha buluu na machesamile na machesamu. Banaba bo bafundi abambombo zyosi izya nyobe izyakulekanalekana.
നിലവിൽ തിരഞ്ഞെടുത്തിരിക്കുന്നു:
Ukufuma 35: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
