Ukufuma 36
36
1“Po u Bezaleli nu Oholiyabu, poka na bafundi abanji bo babo u Mwene akabapa amahala agha bwafundi ubwa mumo bangazengela Ubuzilo Ubuzelu, bapangaye vyosi ngati mumo u Mwene alamulila.”
Abantu bakwiza ni vyabupi ivyinji nkani
2U Mozesi akamwitizya u Bezaleli nu Oholiyabu, poka na bafundi bosi babo u Mwene akabapa amahala agha bwafundi, sona na babo bakaba nu moyo uwakwavwa pambombo, po u Mozesi akababuzya ukuti bande imbombo. 3Bakapokela ivyabupi vyosi kwa Mozesi vivyo aba Izilayeli bababika ukuti vibombaye imbombo iyakuzenga Ubuzilo Ubuzelu. Loli aba Izilayeli bakendelela pakwiza nivyakwiyipa mubwighane bwabo indabindabi yosi. 4Po abafundi bosi babo bakabombagha imbombo yosi iyakuzenga Ubuzilo Ubuzelu bakazileka imbombo zyabo 5nukumubuzya u Mozesi ukuti, “Abantu bakwiza ni vyabupi ivyinji nkani ukuchila namumo u Mwene akalamulila.” 6Po u Mozesi akabalamula abantu muvisakasa vyosi vila ukuti, “Patakabepo nayumo umuntu uwakwendelela pakwiza ni vyakwiyipa ivyakuzengela Ubuzilo Ubuzelu.” Po abantu bakaleka pakwiza navyo ivyakwiyipa. 7Pakuti ivyabupi vivyo abantu bakiza navyo vikaba vyinji nkani ukuchilapo pakumalizya imbombo yosi yila.
Ukuzenga Ichisakasa icha Mwene
(Ukf. 26.1-37)
8Abanavuli abafundi bosi pakasi pabantu babo bakabombagha imbombo iya buzengi bakachizenga Ichisakasa ichizelu icha menda 10 amatonte agha buluu na machesamile na machesamu sona aghakulukiwa ni chifwani icha bakelubi. 9Amenda ghosi aghakuzighila ghakayana bulo, mubutali ghakaba amamita 12 sona mububaba ghakaba amamita mabili.
10Bakaghasonannya poka amenda fayivi pakuba mwenda ghoka umukulu, sona bakabomba bunubu na menda aghanji fayivi ghala. 11Muntende mulubazu ulwa mwenda uwakwanda umukulu bakapanga ingulusu izya mwenda uwa buluu, sona bakabomba bunubu nu mwenda uwabumalilo umukulu ghula. 12Bakabika ingulusu 50 ku mwenda uwakwanda, sona bakabomba bunubu nu mwenda uwabumalilo umwakuti zyenannye. 13Po bakapanga utulemelo 50 utwa golide utwakulemenkannya amenda mabili amakulu ghala, umwakuti ghukaba Chisakasa choka.
14Bakapanga amenda 11 aghakupangiwa na meya agha mbuzi, ukuti ghabanje ghakuvwinka Ichisakasa pamwanya. 15Amenda ghosi 11 ghakayana bulo, mubutali ghakaba amamita 13, sona mububaba ghakaba amamita mabili. 16Bakaghasonannya poka amenda fayivi ukuti ghubanje mwenda ghoka umukulu, sona bakabomba bunubu na menda aghanji sikisi ghala pakuba mwenda ghoka umukulu. 17Po bakapanga sona ingulusu 50 mulubazu ulwa mwenda ghoka umukulu uwabumalilo, nukubika sona ingulusu 50 mulubazu ulwa mwenda ughunji uwabumalilo. 18Bakapanga utulemelo 50 utwa mukuba nukwinjizyamo ingulusu pakughalemenkannya poka amenda mabili amakulu ghala pakuba chisakasa choka. 19Bakachipangila Ichisakasa ivikupikizyo ivinji vibili, choka chikaba cha makwela agha dubi amadwibike mu inki inchesamu ichinji chikaba cha mwenda umutonte ukuti vibanje vyakuvwinka pamwanya. 20Bakachipangila Ichisakasa amafulemu aghakwima agha matabwa agha mungwina. 21Ifulemu lyosi mubutali likaba amamita folo, sona mububaba likaba amasemita 66. 22Ifulemu lyosi likaba nu tulemelo tubili, umwakuti amafulemu ghalemenkane akiza. Amafulemu ghosi mabili ghakaba nu tulemelo. 23Bakapanga amafulemu 20 agha kulubazu ulwakuntende ukwa Chisakasa chila 24nu bwikalilo 40 ubwa siliva, ifulemu lyoka libanje pabwikalilo bubili, umwakuti ghaleme utulemelo tula. 25Bakapanga amafulemu 20 agha kulubazu ulwa kumitu ukwa Chisakasa chila. 26Sona ni vyakwimapo vyache 40 ivya siliva, vibili kuntende kufulemu yoka. 27Bakapanga amafulemu sikisi ukuti ghabanje kwisinda kubwinjililo bwizuba ubwa Chisakasa. 28Munkuto izya Chisakasa bakapangilamo amafulemu mabili. 29Amafulemu mabili ghanagha munkuto ghakamamatiziwa poka ukwandila pasi mupaka pamwanya. Amafulemu mabili ghanagha, ghagho ghakapanga inkuto zibili, ghosi ghanagha ghakapangiwa umwakuyana bulo. 30Po pakabapo amafulemu eyiti nu bwikalilo 16 ubwa siliva, ifulemu lyoka likaba nubwikalilo bubili.
31Bakapanga sona intatikilo 15 izya matabwa agha mungwina: Intatikilo fayivi zikaba kulubazu loka ulwa chisakasa chila, 32intatikilo izyamwabo fayivi zikaba kulubazu ulwamwabo ulwa chisakasa, sona intatikilo izyamwabo fayivi zikaba kwisinda ukwa chisakasa. 33Ululatikilo ulwa pakasi lukadumusannya pakasi pa mafulemu ukwandila kubumalilo mupaka kubumalilo. 34Bakaghapaka amafulemu nu golide nukughinjizya mumpete izya golide ukuti zileme. Zyope intatikilo bakazipaka nu golide.
35Bakasona umwenda umutonte uwakuzighila uwa buluu nu muchesamile, sona nu muchesamu, ghugho ghulabiwe akiza nkani ni chifwani icha bakelubi. 36Bakachipangila impanda folo izya matabwa agha mungwina, ghagho ghakapakiwa nu golide, sona ghagho ghakaba nu tulemelo nu bwikalilo folo ubwa siliva. 37Bakabikapo umwenda umutonte uwa buluu nu muchesamile, sona nu muchesamu uwakuzighila pamulyango uwa Chisakasa, ghugho ghulabiwe akiza nkani. 38Bakachipangila Ichisakasa umwenda uwakuzighila impanda fayivi izya matabwa agha mungwina, izyakupakiwa nu golide, zizyo zikaba nu tulemelo utwa golide. Bakazipangila impanda zinizi ubwikalilo fayivi ubwa mukuba.
നിലവിൽ തിരഞ്ഞെടുത്തിരിക്കുന്നു:
Ukufuma 36: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
