Ukufuma 34
34
Amabwe amapapate mabili amapya
(Ukk. 10.1-5)
1U Mwene akamubuzya sona u Mozesi akati, “Biza amabwe amapapate mabili aghakuyana naghakwanda ghala, ukuti insimbepo amazyu ghagho ghakaba pamabwe aghakwanda ghala ghagho ukamenyula. 2Pandabindabi wiyannye, po ukwele pighamba ilya Sinayi pakukomana nane palapala. 3Utakize poka nu muntu nayumoyumo, sona nayumo umuntu atakaboneke napamopamo pighamba. Ing'ozi pamo ing'ombe zitakalyanje muntende mwighamba linili.”
4Po u Mozesi akabiza amabwe amapapate mabili ngati aghakwanda ghala, pandabindabi nkani akanyamula amabwe amapapate mabili ghala munyobe zyache nukukwela pighamba ukuyana namumo u Mwene akamulamulila. 5U Mwene#34.5 Mwene: Ennya 3.14. akikila mwibingu nukwimilila nawe palapala, po akatambula itabwa lyache ilyakuti Mwene. 6#Ukf. 20.5-6; Ukb. 14.18; Ukk. 5.9-10, 7.9-10Po u Mwene akadumusannya kuntazi kwa Mozesi nukunena nizyu ilyapamwanya ukuti, “Mwene, Mwene u Chala uwachisa nu wachililizi, yuyo atakukalala lubilolubilo, walughano lulo lutakumala nu busubiliwa bwache. 7Nkubalanjizya ulughano lwane abantu amasabuzani pakubahobokela imbibi zyabo nukunanga kwabo. Loli ntakwiza pakubaleka bulo abana na bizukulu babo mupaka ninkulilo iyabutatu ni yafolo pachifukwa icha mbibi izya bapapi babo.”
8Panapo na panapo u Mozesi akafughama nukumwiputa. 9Po akati, “Wee Mwene nanti naloli wahoboka nane, nkukulaba ukuti ubuke naswe. Napapo abantu banaba amoyo ghabo makafu nkani, loli utuhobokele imbibi zyitu nukunanga kwitu kosi nukutupokela pakuba bantu bako na bako.”
Ukufinga ichipyachipya
(Ukf. 23.14-19; Ukk. 7.1-5; Ukk. 16.1-7)
10U Mwene akati, “Losi ulu nkufinga ichipyachipya naba Izilayeli. Pantazi pabantu bako bosi, nkwiza pakupela iviswigho vivyo vitabombiwepo nalumo pakasi pabantu bosi muchisu ichapasi, sona na pakasi pa inko zyosi. Abantu bosi bakwiza pakwennya ichintu ichakoghofya nkani chicho ane ne Mwene nkwiza pakubabombela.
11“Mukonkaye amalamulo ghagho nkubapa ilelo. Nkwiza pakubachimbizya pantazi papinyu aba Amoli naba Kenani naba Hiti naba Pelezi naba Hivi sona naba Yebusi. 12Muchebaye nkani ukuti mutakafinge ulufingo na bantu aba muchisu chicho mukubukako pakuti bangaba chipingo pakasi papinyu. 13#Ukk. 16.21 Muvinangannye ivighemo vyabo, nukumongolannya amabwe ghabo amapaghuliwa, sona nukughadumulannya amakwi ghabo aghakwiputilapo u Ashela. 14Mutakabiputaye abachala abanji, pakuti ane ne Mwene yuyo itabwa lyane ne Buzuba, naloli ne Chala uwa buzuba.
15“Muchebaye nkani ukuti mutakafinge ulufingo na bantu aba muchisu chilachila, pakuti bo bakubiputa abachala babo nukubika ivyakwiyipa, bakwiza pakubitizya, po mukwiza pakulya ivyakwiyipa vyabo. 16Lumo abana binyu abalumendo bangasenda abana babo abalindu nukubapela pakuba basita basubiliwa kukwane, po bope bakwiza pakubiputa abachala abanji.
17 #
Ukf. 20.4; Lev. 19.4; Ukk. 5.8, 27.15 “Mutakipangilaye mwebene ivifwani nukuvyiputa.
18 #
Ukf. 12.14-20; Lev. 23.6-8; Ukb. 28.16-25 “Mubanje nu Lusekelo ulwa Chibama chicho chite ni chilungo ukuyana namumo nkubalamulila. Mulyanje ichibama chinichi amasiku seveni mumwezi uwa Abibu, pachifukwa ichakuti ghukaba mwezi ghunughu ghugho mukepelamo muchisu icha Ijiputi.
19 #
Ukf. 13.2
“Umwana wesi umulumendo ukatote, sona nu mwana wesi uwakwanda pakupapiwa uwa chitekwa, wane. 20Loli mumutabulaye umwana uwa mpunda uwakwanda pakupapiwa pakupyanizyapo ni ng'ozi. Nanti mutakumutabula, mupyole bulo isingo yache. Mumutabulaye umwana winyu wesi ukatote.
“Atakabepo nayumoyumo umuntu uwakwiza pamaso papane nyobe zyene.
21 #
Ukf. 20.9-10, 23.12, 31.15, 35.2; Lev. 23.3; Ukk. 5.13-14 “Mubombaye imbombo amasiku sikisi, loli isiku ilyaseveni mutakabombaye imbombo nayimoyimo, napapo kangaba kabalilo akakulimila pamo akakwinulila.
22 #
Lev. 23.15-21;
Ukb. 28.26-31
“Mubanje nu Lusekelo ulwa Nyinulo pakubika vikomwa ivyiza ivyakwanda pakutona, sona mubanje nu Lusekelo ulwa Visakasa, bo mwinula inyinulo zyinyu kubumalilo ubwa mwaka. 23Abanavuli bosi bizaye katatu pamwaka pamaso papane ne Mwene Uwamaka Ghosi, u Chala uwa ba Izilayeli. 24Nkwiza pakubachimbizya abantu aba inko izyakulekanalekana pantazi papinyu nukukuzya impaka iya chisu chinyu, sona atalipo nayumo umuntu uwakubapota, bo mukwiza katatu pamwaka pakunyiputa ane ne Mwene u Chala winyu.
25 #
Ukf. 12.10
“Mutakabikaye ichibama icha chilungo bo mukubika ichinyamana pakuba chakwiyipa kukwane. Mutakasungaye nayimoyimo inyama iya pa Lusekelo ulwa Pasa mupaka indabi yache.
26 #
Ukk. 24.21, 26.2 “Mwizaye ku Nyumba iya Mwene u Chala winyu ni vikomwa ivyiza ivyakwanda pakutona ivya maghunda ghinyu. Mutakapiyaghe inyama iya mwana uwa ng'ozi pamo umwana uwa mbuzi mu lukama ulwa nyina.”
27Po u Mwene akamubuzya sona u Mozesi akati, “Simba amazyu ghanagha, pachifukwa ichakuti na mazyu ghanagha nkufingana nawe, poka naba Izilayeli.” 28U Mozesi akikala kulakula poka nu Mwene amasiku 40 ukusita ukulya pamo ukung'wela. Akasimba pamabwe amapapate amazyu agha lufingo, ghagho ghakaba Malamulo Teni.
U Mozesi akwika pighamba ilya Sinayi
29 #
2 Kol. 3.7-16
U Mozesi akika pighamba ilya Sinayi bo anyamuye munyobe zyache amabwe amapapate mabili agha Malamulo Teni ghala. Icheni chache chikalamagha pachifukwa ichakuti akanenagha nu Mwene, loli atakazyaghannya. 30Bo u Aloni poka naba Izilayeli bosi bamwennya u Mozesi ukuti icheni chache chikulama nkani, bakanyilagha pakupalamila. 31Loli u Mozesi akamwitizya u Aloni poka na balongozi ukuti bize pamaso papache, po akanena nabo. 32Pisinda pache aba Izilayeli bosi bakapalamila papipi. Po u Mozesi akabapa amalamulo ghosi ghagho u Mwene akamupa pighamba ilya Sinayi.
33Bo u Mozesi amala pakunena nabo, akavwinka icheni chache nu mwenda. 34Loli akabalilo kosi bo u Mozesi akwinjila mu Chisakasa pakunenezannya nu Mwene, akavulagha umwenda ghula. Bo epamo mu Chisakasa mula akababuzya abantu amazyu ghosi ghagho u Mwene akamulamula. 35Abene bakachennya icheni chache ukuti chikulama, loli u Mozesi akavwinka sona icheni chache nu mwenda ghula mupaka pakabalilo akanji akakubukila sona pakunenezannya nu Mwene.
നിലവിൽ തിരഞ്ഞെടുത്തിരിക്കുന്നു:
Ukufuma 34: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
