Ukufuma 12
12
Ulusekelo ulwa Pasa
1 #
Lev. 23.5; Ukb. 9.1-5, 28.16; Ukk. 16.1-2 U Mwene akamubuzya u Mozesi nu Aloni muchisu icha Ijiputi akati, 2“Umwezi ughu ghubaghiye pakuba mwezi winyu uwakwanda uwa mwaka. 3Mubabuzye aba Izilayeli bosi ukuti pisiku ilya 10 ilya mwezi ughu, umwanavuli wesi ayisalile inyumba yache umwana uwa ng'ozi weka, pamo umwana uwa mbuzi weka ukuyana namumo inyumba yache yibeleye. 4Nanti inyumba yila nandi nkani umwakuti batangayimala inyama yosi yila, bagabane na bapalamani babo, ukuyana nu bwinji ubwa bantu, sona namumo umuntu wesi angalyela. 5Umwana uwa ng'ozi pamo uwa mbuzi yuyo mukumusala atakabanje ni chilema nachimochimo, uwa mwaka ghoka sona inyanavuli. 6Mumusungaye akiza mupaka pisiku ilya 14 ilya mwezi ghunughu. Pisiku linili aba Izilayeli bosi bakwiza pakuvibola ivinyamana vyabo vila pachamabwila nkani. 7Po abantu basende ibanda limo ilya vinyamana vila nukupaka mulubazu na pamwanya pamulyango uwa nyumba mumo bakulyelamo inyama yila. 8Inyama yila yibaghiye pakochiwa ubusiku bulabula, po balyanje inyama inyoche ni nyanyi iyamani iyakubaba, sona ni chibama chicho chite ni chilungo. 9Mutakalyanje nayimoyimo inyama imbisi pamo impiye. Loli mulyanje inyama yosi inyoche bulo. Mulyanje umutu ni vinama sona ni vyamukasi. 10Mutakayileke nayimoyimo inyama ukuti yifike pandabindabi. Nanti yimo yasyalako mubaghiye pakuyilungulizya bulo. 11Umu momumo mubaghiye pakulyela: Muvwale amenda agha pabulendo, umuntu wesi apinye ulamba mumusana wache, avwale inkwato zyache, sona aleme indisa munyobe yache. Mubaghiye pakulya umwalubilolubilo pakuti ulu lo Lusekelo ulwa Pasa ulwa Mwene.
12“Ubusiku bunubu nkwiza pakudumusannya muchisu chosi icha Ijiputi, po nkwiza pakumughogha ukatote wesi umulumendo nu mwana wesi uwakwanda pakupapiwa uwa chinyamana. Nkwiza pakubafunda abachala abanji bosi aba muchisu icha Ijiputi. Ane ne Mwene. 13Ibanda pamilyango yinyu likwiza pakuba chimanyilo icha nyumba zyinyu zizyo mukwikalamo. Bo nennya bulo ibanda, nkwiza pakudumusannya, sona ichiwaya ichakughogha chitakwiza pakubapalamasya, bo nkubafunda aba Ijiputi.
14“Isiku linili mubaghiye pakulisunga pakuba lisiku lizelu ilya lusekelo ulwa Mwene. Inkulilo zyosi izya muntazi zikwiza pakulisunga isiku linili pakuba lisiku izelu ilya lusekelo ulwa Mwene. Mubaghiye pakulikumbuka pakuba lulaghilo ulwa bwila na bwila.”#Ukf. 23.15, 34.18; Lev. 23.6-8; Ukb. 28.17-25; Ukk. 16.3-8
Ulusekelo ulwa Chibama chicho chite ni chilungo
15U Mwene akati, “Mulyanje ichibama chicho chite ni chilungo amasiku seveni. Mwefyanjemo ichilungo chosi munyumba zyinyu pisiku ilyakwanda. Pakuti nanti umuntu wesi yuyo akulya ichibama icha chilungo mumasiku seveni ghanagha, akwiza pakwepusiwapo pakasi paba Izilayeli. 16Pisiku ilyakwanda nilyaseveni mubanje nulukomano ulupaghuliwa. Mutakabombaye nayimoyimo imbombo pa masiku ghanagha, loli kwene ukupiya ichakulya ichakuti umuntu wesi alyanje.
17“Ulusekelo lunulu ulwa Chibama chicho chite ni chilungo, mulusekelaye pachifukwa ichakuti pisiku linili lyo lilyo nkatwefya utubukatila utwa inko izya bantu binyu muchisu icha Ijiputi. Po inkulilo zyosi izya muntazi zikwiza pakulisunga isiku linili pakuba lulaghilo ulwa bwila na bwila. 18Mulyanje ichibama chicho chite ni chilungo ukwandila pachamabwila pisiku ilya 14 ilya mwezi uwakwanda mupaka pachamabwila pisiku ilya 21 ilya mwezi ghulaghula. 19Pakuti amasiku seveni ghanagha ichilungo chitakaghiwe munyumba zyinyu. Pakuti nanti umuntu wesi, umuyeni pamo umwenekaya, yuyo akulya ichibama icha chilungo, akwiza pakwepusiwapo pakasi paba Izilayeli. 20Mutakalyanje nachimochimo icha chilungo. Mulyanje bulo ichibama chicho chite ni chilungo munyumba zyinyu.”
U Pasa uwakwanda
21U Mozesi akabitizya abalongozi bosi aba Izilayeli nukubabuzya ukuti, “Bukagha, muzisalile inyumba zyinyu umwana uwa ng'ozi nukumubola pakuba nyama yapa Lusekelo ulwa Pasa. 22Musende ichisilo nukuchidwibika mwibanda lilyo lili mubeseni nukupaka mulubazu na pamwanya pamulyango. Nayumoyumo umuntu atakafumaye kuzi ukwa nyumba mupaka pandabindabi. 23#Heb. 11.28Bo u Mwene akudumusannya muchisu pakughogha aba Ijiputi, akwiza pakulyennya ibanda mulubazu na pamwanya pamulyango. Po akwiza pakudumusannyapo bulo, sona atakwiza pakumwitikizya uwantumi uwa bufwe pakwinjila munyumba zinyu nukubaghogha.
24“Amwe poka na bana binyu mwivwilaye amalamulo ghanagha pakuba gha bwila na bwila. 25Bo mukwinjila muchisu chicho u Mwene akalayizya pakubapa, mulubombaye ulwiho lunulu. 26Nanti abana binyu bakubalalusya ukuti, ‘Nkimba ulwiho lunulu lukung'anamula choni kukwinyu?’ 27Mubamule ukuti, ‘Ichi cho chakwiyipa icha Pasa uwa Mwene, pachifukwa ichakuti akadumusannya inyumba izya ba Izilayeli muchisu icha Ijiputi. Akabaghogha aba Ijiputi, loli akatuleka aswe bumi.’ ” Aba Izilayeli bakafughama nukumwiputa.
28Aba Izilayeli bakabomba bulo vivyo u Mwene akamulamula u Mozesi nu Aloni.
Ubufwe ubwa bana abakatote
29 #
Ukf. 4.22-31
Pakasi pabusiku u Mwene akabaghogha abana bosi abalumendo abakatote aba muchisu icha Ijiputi, ukwandila ukatote uwa Falabo, yuyo akaba wampyana pabumwene bwache mupaka nu mwana ukatote uwa mukayidi, sona nu mwana wesi uwakwanda pakupapiwa uwa chitekwa. 30U Falabo na makambala ghache, poka naba Ijiputi bosi bakanyamuka pakasi pabusiku. Kukaba inkuta inkulu nkani muchisu icha Ijiputi, pachifukwa ichakuti yitakasyalapo ni nyumba nayimoyimo mumo umuntu atakafwamo.
31Ubusiku bulabula u Falabo akamwitizya u Mozesi nu Aloni nukubachemela ukuti, “Epamo! Awe poka na bantu bako aba Izilayeli! Bukagha pakumwiputa u Mwene ukuyana namumo mwalabila. 32Senda ing'ozi ni mbuzi sona ni ng'ombe zyinyu, bukagha. Munyiputile ukuti nane bulo insayiwe.”
33Aba Ijiputi bakabalambilizya aba Izilayeli ukuti bepemo lubilolubilo muchisu chabo nukuti, “Nanti mutakwepamo, kokuti twebosi tukwiza pakufwa.” 34Aba Izilayeli bakapaya ichinyenya chabo icha vibama vivyo vite ni chilungo. Bakachibaghala pavipunko vyabo, bo bachinnyembeteleye mumwenda. 35#Ukf. 3.21-22Aba Izilayeli bakabomba vivyo u Mozesi akababuzya pakubalaba aba Ijiputi ivintu ivyakwibonesekezya akiza ivya siliva nu golide, sona na menda. 36U Mwene akabapela aba Ijiputi pakubapelela ichisa aba Izilayeli, po bakabapa vivyo bakabalaba. Pakubomba bunubu aba Izilayeli bakabafyula aba Ijiputi ubukabi bwabo.
Aba Izilayeli bakwepamo mu Ijiputi
37Aba Izilayeli bakanda ubulendo bwabo ubwapasi mukaya akakulu aka Lamesesi ukubuka mukaya akakulu aka Sukoti. Ukusita ukubelengako abakolo na bana, abanavuli bene bakabapo pipipipi 600,000. 38Pakabapo sona abantu abinji nkani abaluko ulunji poka ni ng'ozi ni mbuzi sona ni ng'ombe zyabo. 39Bakapiya ichibama chicho chite ni chilungo icha chinyenya chicho bakapaya mu Ijiputi, pakuti bakepamo mu Ijiputi lubilolubilo, umwakuti batakaba na kabalilo akakuyanizizya ichakulya pamo ukupiya ichibama chicho chite ni chilungo.
40 #
Ubw. 15.13; Gal. 3.17 Aba Izilayeli bakikala mu Ijiputi amaka 430. 41Kubumalilo ubwa mwaka uwa 430, utubukatila tosi utwa bantu aba Mwene tukepamo mu Ijiputi. 42Bukaba busiku bubo u Mwene akachelezya pakubefyamo aba Izilayeli mu Ijiputi. Ichi cho chifukwa ubusiku bunubu bupaghuliwa kwa Mwene pakuba busiku bubo aba Izilayeli bachelezyanje mupaka inkulilo zyabo zyosi izya muntazi.
Indaghilo izya Pasa
43U Mwene akamupa u Mozesi nu Aloni indaghilo izya Lusekelo ulwa Pasa izyakuti:
“Atakabepo umuyeni uwakulya ichakulya icha pa Pasa. 44Abazya binyu babo mwabaghula bangalya, loli nanti mwabasilimula tasi. 45Abayeni pamo abambombo binyu batabaghiye pakulya.
46 #
Ukb. 9.12; Yoh. 19.36 “Inyama yosi mubaghiye pakuyilyela munyumba. Mutakafume kuzi ni nyama nayimoyimo, sona mutakapyolaye nifupa nalimolimo. 47Aba Izilayeli bosi babanje nu lusekelo lunulu.
48“Nanti abayeni abakwikala pakasi papinyu bakulonda pakusekela Upasa uwa Mwene, babaghiye basilimuliwe tasi, ukwandila abanavuli bosi abamunyumba yila. Po bangasendiwa ngati benekaya, sona bangasekela poka namwe. 49Ululaghilo ulu lubombeziwanje na bantu bosi, manyi benekaya manyi bayeni babo bakwikala pakasi papinyu.”
50Aba Izilayeli bosi bakivwila nukubomba vivyo u Mwene akamulamula u Mozesi nu Aloni. 51Pisiku lilalila u Mwene akabefyamo aba Izilayeli mu Ijiputi ukuyana nu tubukatila twabo.
നിലവിൽ തിരഞ്ഞെടുത്തിരിക്കുന്നു:
Ukufuma 12: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
