Ukufuma 11
11
Nizya bufwe ubwa bana abakatote
1Po u Mwene akamubuzya u Mozesi akati, “Nkwiza pakumufunda u Falabo poka na bantu bache ni chiwaya ichabumalilo. Pisinda pache akwiza pakubitikizya ukuti mubukaye. Naloli akwiza pakubachimbizyamo mwebosi muchisu chache. 2Losi ulu nena naba Izilayeli nukubabuzya abanavuli pamo abakolo pakubalaba abapalamani babo ivyakwibonesekezya akiza ivya golide nu siliva.” 3U Mwene akabapela aba Ijiputi pakubapelela ichisa aba Izilayeli. U Mozesi akaba muntu umuchindikiwa nkani mu Ijiputi, na pamaso pa makambala agha Falabo, sona na pamaso pabantu bosi.
4Po u Mozesi akamubuzya u Falabo akati, “U Mwene ati, ‘Pakasi pabusiku nkwiza pakudumusannya mu Ijiputi. 5Po ukatote wesi umulumendo mu Ijiputi akwiza pakughoghiwa, ukwandila ukatote umulumendo uwa Falabo, yuyo akwiza pakupyana ubumwene mupaka nu katote wesi umulumendo uwa mukolo umuzya uwakusya ingano, sona ni ngwata yosi iya ng'ombe iyakwanda pakupapiwa yikwiza pakufwa. 6Mu Ijiputi mukwiza pakuba inkuta inkulu nkani, yiyo nayumo umuntu atayivuyepo nalumolumo, pamo yikwiza pakwivwikapo sona. 7Loli nayimoyimo imbwa yiyo yikwiza pakumubwatila umu Izilayeli, pamo ichitekwa, awe. Po mukwiza pakumanya ukuti ane ne Mwene nene nkubika ukulekana pakasi paba Ijiputi naba Izilayeli. 8Amakambala ghinyu ghosi ghakwiza pakunfughamilila nukuti, “Epamo muno, awe poka na bantu bako bosi babo bakukukonka.” Po pisinda pache nkwiza pakubuka.’ ” U Mozesi akaghalabuka nukwepapo pa Falabo, bo akalaye nkani.
9Po u Mwene akamubuzya u Mozesi akati, “U Falabo atakwiza pakukuteghelezya umwakuti impele iviswigho ivyinji mu Ijiputi.” 10U Mozesi nu Aloni bakapela iviswigho vyosi vinivi pamaso pa Falabo, loli u Mwene akaghupela umoyo uwa Falabo pakuba mukafu nkani, umwakuti atakabitikizya aba Izilayeli pakwepamo muchisu chache.
നിലവിൽ തിരഞ്ഞെടുത്തിരിക്കുന്നു:
Ukufuma 11: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
