Ukufuma 13
13
Ukupaghuliwa ukwa bana abakatote
1U Mwene akamubuzya Mozesi akati, 2#Ukb. 3.13; Luk. 2.23“Umpaghulile umwana wesi ukatote umulumendo pachifukwa ichakuti ukatote wesi umulumendo uwa ba Izilayeli wane, sona wepe nu mwana wesi uwakwanda pakupapiwa uwa chitekwa wane.”
Ulusekelo ulwa Chibama chicho chite ni chilungo
3Po u Mozesi akababuzya abantu akati, “Mulikumbukilaye isiku linili, lilyo mukepelamo muchisu ichabuzya icha Ijiputi. Pisiku linili u Mwene akababefya na maka ghache amakulu. Mutakalyanje nachimochimo ichibama icha chilungo. 4Pisiku linili, mumwezi uwa Abibu, lyo lisiku lilyo mukepelamo muchisu icha Ijiputi. 5U Mwene akalapa ku banyenya binyu ukuti akwiza pakubapa ichisu icha ba Kenani nicha ba Hiti nicha ba Amoli nicha ba Hivi nicha ba Yebusi. Ichisu chinichi cho chisu icha mboto. Bo abinjizya muchisu chinichi, mubanje nulusekelo mumwezi uwakwanda umwaka nu mwaka. 6Mulyanje ichibama chicho chite ni chilungo amasiku seveni, sona pisiku ilyaseveni mubanje nu lusekelo ulwa Mwene. 7Mulyanje ichibama chicho chite ni chilungo amasiku seveni. Muchisu chinyu mutakaghiwemo nachimo ichilungo pamo ichibama icha chilungo. 8Pisiku linilyo mubabuzye abana binyu ukuti, ‘Tukuba nu lusekelo ulu pachifukwa icha zizyo u Mwene akatubombela, bo tukwepamo muchisu icha Ijiputi.’ 9Ulusekelo ulu lukwiza pakuba chimanyilo ichakupinyiwa panyobe zyinyu, sona na pacheni chinyu. Chikwiza pakubakumbusya ukuti indaghilo izya Mwene zibaghiye pakuba pamilomo yinyu. Pakuti u Mwene akabefyamo muchisu icha Ijiputi na maka ghache amakulu nkani. 10Mubanje nu lusekelo lunulu umwaka nu mwaka pakabalilo kache kako kasaliwe.
Nizya kubatabula abana abakatote
11“Bo u Mwene abinjizya muchisu icha ba Kenani, ichisu chicho akalapa ku banyenya binyu, 12#Ukf. 34.19-20; Luk. 2.23mumupaghulilaye u Mwene ukatote wesi umulumendo. Ichitekwa chosi ichanavuli ichakwanda pakupapiwa chibanje cha Mwene. 13Loli umwana wesi umwanavuli uwakwanda pakupapiwa uwa mpunda mumutabulaye nu mwana uwa ng'ozi ukuti chibanje chakwiyipa kwa Mwene. Nanti mutakulonda pakumutabula umwana uwa mpunda yula, pyola bulo isingo yache. Mubatabulaye abakatote binyu bosi abalumendo.
14“Muntazi, nanti abana binyu bakubalalusya ukuti, ‘Nkimba ichi chikung'anamula ichoni?’ Mubamulaye ukuti, ‘U Mwene akatwefyamo mu Ijiputi, ichisu icha buzya na maka ghache amakulu. 15Bo umoyo uwa Falabo waba mukafu nkani nukukana pakutwitikizya ukuti tubukaye, u Mwene akabaghogha abakatote bosi abalumendo muchisu icha Ijiputi. Akabaghogha sona na bana abakwanda pakupapiwa aba vitekwa bulo. Ichi cho chifukwa tukubika ichakwiyipa kwa Mwene umwana wesi umwanavuli uwakwanda pakupapiwa uwa chinyamana. Loli tubaghiye pakubatabula abakatote bitu bosi abalumendo.’ 16Chinichi chikwiza pakuba chimanyilo ichakupinyiwa panyobe zyitu, sona na pacheni chitu ichakutukumbusya ukuti u Mwene akatwefyamo muchisu icha Ijiputi na maka ghache amakulu nkani.”
Impanda iya libingu niya moto
17Bo u Falabo abitikizya aba Izilayeli ukuti babukaye, u Chala atakabalongozezya mumusebo uwakubukila kuchisu icha ba Filisiti, napapo ghukaba mupimpa. U Chala akati, “Nanti abantu banaba bangakomana nubwite, bangandula inyinong'ono zyabo nukunyokela kuchisu icha Ijiputi.” 18Loli u Chala akabalongozezya mumusebo ghugho ghuzyelite munkolongo uwakubukila ku Nyanja Inchesamu.#13.18 Nyanja Inchesamu: Ennya 10.19. Aba Izilayeli bakiyanizya zila pakulwa ubwite.
19 #
Ubw. 50.25; Yos. 24.32 U Mozesi akasenda amafupa agha Yosefu pachifukwa ichakuti u Yosefu akabalapizya aba Izilayeli. U Yosefu akati, “Naloliloli u Chala akwiza pakubapoka, loli musende amafupa ghane, bo mukwepako kuno.”
20Aba Izilayeli bakepamo mukaya aka Sukoti nukuzenga ivisakasa pa Etamu mulubazu ulwa nkolongo. 21Pamusanya u Mwene akabalongozezya ni mpanda iya libingu, sona pabusiku akabalongozezya ni mpanda iya moto pakubapa lukozyo, umwakuti bende pamusanya na pabusiku. 22Impanda iya libingu yitakepapo pamaso pabantu pamusanya, yope ni mpanda iya moto yitakepapo pantazi pabantu pabusiku pakubalongolela.
നിലവിൽ തിരഞ്ഞെടുത്തിരിക്കുന്നു:
Ukufuma 13: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
