मत्ति 9
9
इसु गाहिलि खोअ्काहेङ एल्पाका
(मरकुस २:१-१२; लुका ५:१७-२६)
1इङकोन्हुअ्सो इसु नाउता धोल्तेङ चावान्दिको ओदोइपार हानिहि रो ताइमि हिका पुरता लोहि। 2द्याङगेलाइ खाटता जिमतेङ हिका एअ्मि गाहिलि खोअ्काहेङ वाकोता चुमाहि। एम्बालाइको खान्धुर तिङतेङ इसु गाहिलि खोअ्काहेङ दोअ्हि, “ओइ ओने, आट पा, नाङको पाप माफ जेङहोइ।” 3धरम मास्टरगेलाइता हेअ्मि ताताइमिता दोअ्हि, “या परमेस्वरको बादानामि पादोङखे।” 4इसु एम्बालाइको बिचार गितेङ दोअ्हि, “नेलाइ हाइपालि दुरजन बिचार पासुखेना? 5हाइपानु हाइ दोअ्लि रेम्का हि, ‘नाङको पाप माफ जेङहोइ’ दोअ्लि ना ‘ल्हो रो ते’ दोअ्लि? 6कालाउबुङ का द्याङको चानहेङ सुमिङता पाप माफ पाका खाबारा हि दोअ्तेङ नेलाइ गिलि दोसु।” कालाउ वा इङको गाहिलि खोअ्काहेङ दोअ्हि, “ल्हो, ताइको सिदाउ चुम रो सिता हाने।” 7कालाउ इङको ल्होहि रो ताइको साअ्भारि हानिहि। 8जेलाउ जोम्तेङ हिकालाइ तिङहि, कालाउ एम्बालाइ थिहि रो द्याङगेलाइहेङ इस्का सरबङ पिका परमेस्वरहेङ बाखिन्हि।
इसु मत्तिहेङ काइका
(मरकुस २:१३-१७; लुका ५:२७-३२)
9इसु इन्तासो हानिलाउ मत्ति दोअ्का एअ्मि द्याङहेङ तिरो ल्होपाका आफिसता योम्तेङ हिका तिङहि रो वासेहेङ दोअ्हि, “कासेहेङ पिताइ।” कालाउ इङको ल्होहि रो वासेहेङ पिताइहि।
10इसु चालि योम्का पहर, हेन्जाङ तिरो ल्होपाकालाइ रो पापिगेलाइ#९:१०पापिगेलाइ यहुदि धरम मास्टरगेलाइ, मोसाको पिका न्याम मामानिकालाइहेङ पापगेलाइ दोअ्घाखे रो जाइ इदोइ पापगेलाइ दोफा योम्तेङ चाकालाइ बुङ आपुनित जेङघाखे दोअ्तेङ एम्बालाइ फोम पाघाखे। लोतेङ इसु रो वाको चात्यागेलाइदोफा चालि योम्हि।#लुका १५:१-२ 11जेलाउ फरिसिगेलाइ इङको तिङहि, कालाउ वाको चात्यागेलाइहेङ दोअ्हि, “हाइपालि नेलाइको मास्टर तिरो ल्होपाकालाइ रो पापिगेलाइदोफा योम्तेङ चाखे?” 12इदोइ हिङतेङ इसु दोअ्हि, “मारोगाइकालाइहेङ बोइद्याको खाचो माजेङखे, कालाउबुङ रोगाइकालाइहेङ जेङखे। 13कालाउबुङ हानितेङ धरमकिताबता लेखिका इदोइ काथाको माने हाइको दोअ्तेङ नेलाइ धिरसु: ‘का भोक माको, बोमिहेङ दायासु दोअ्तेङ का इछा पाखा।’ हाइपानु का धरमातिहेङ माको, कालाउबुङ पापिगेलाइहेङ काइलि लोघा।”#मत्ति १२:७; होसे ६:६
म्हितुपाङ हिका बारेता हिअ्का
(मरकुस २:१८-२२; लुका ५:३३-३९)
14कालाउ युहन्नाको चात्यागेलाइ इसुकोता लोहि रो वासेहेङ हिअ्हि, “केलाइ रो फरिसिगेलाइ म्हितुपाङ हिन्हाखे, कालाउबुङ नाङको चात्यागेलाइ हाइपालि म्हितुपाङ माहिखे?” 15इसु एम्बालाइहेङ दोअ्हि, “जेलाउथिकापा दारुवा काल्ह्यागेलाइदोफा हिखे, हाइ एम्बालाइ बिलाप पाखे कुनु? कालाउबुङ इङको दिना बुङ ल्वावा, जेलाउ दारुवा एम्बालाइसो चुमप्वावा। कालाउ खिनिङ एम्बालाइ म्हितुपाङ ह्यावा।
16 “हासु बुङ पुरना धाबाता नावा धाबा माटालाइखे। हाइपानु नावा धाबा पुरना धाबाहेङ चुन्चालातेङ झन हेन्जा थेअ्पावा।
17 “एसाङपातेङ हासु बुङ पुरना धालेको जाबिता नोनो आङगुरको निघार माताअ्खे, माकुनु जाबि भोइतेङ आङगुरको निघार होकावा। कालाउबुङ नोनो आङगुरको निघार नावा धालेको जाबिता ताअ्लाउ हाइदोङ माज्यावा।”
याइरसको चामिन्दि रो मासाअ्धेका बेबाल एल्का
(मरकुस ५:२१-४३; लुका ८:४०-५६)
18जेलाउ इसु एम्बालाइहेङ इदोइ काथा दोअ्दोङघाखे, कालाउ कचहरिसाअ्को एअ्मि हाकिम लोहि रो वासेहेङ सेउपातेङ दोअ्हि, “काङको चामिन्दि एलाङखिनिङ सिहि, कालाउबुङ लोतेङ इङकोर्हुता नाङको खुर ताअ्पि रो वा सिन्हुतावा।” 19इसु ल्होहि रो ताइको चात्यागेलाइदोफा इङकोको न्हअ्न्हुअ् हानिहि।
20इङकोङ पहर एअ्मि तेन्हे बाअ्सारसो हिति होका बेथा हिका एअ्मि बेबाल न्हुअ्पाहासो लोतेङ इसुको धाबाको फेन्चा साइहि। 21हाइपानु वा मनमनताङ फोम पाका हिघाहि, “का वाको धाबाखिनिङ साइघा पानु बुङ का एल्धाङका।” 22कालाउ इसु घुरितेङ खाङलाउ इङको बेबालहेङ तिङहि रो दोअ्लि, “चामिन्दि, हिमत पा, नाङको खान्धुरसो नासेहेङ एल्पाका हि।” ओदोङघरि इङको बेबाल एल्हि।
23जेलाउ इसु हाकिमको साअ्ता थुकालिलोहि, वा बासुलि धुइपाका रो खारतेङ हिका द्याङगेलाइहेङ तिङहि। 24वा एम्बालाइहेङ दोअ्लि, “बाहार हानिसु, हाइपानु बेजान सिनाङ मान्थु, कालाउबुङ निन्धाका हि।” एम्बालाइ वासेहेङ लेङपिहि। 25जोम्तेङ हिकालाइहेङ बाहार ओल्हिपाकान्हुअ्सो वा लिअ्ता दुल्हि रो इङको बेजानको खुर चा:हि, कालाउ इङको बेजान जुरुक्पा ल्होहि। 26कालाउ इदोइ काथाको नावाइ माउजाको गोताङ थामेता चारचाराइहि।
कान्हा रो लाटा एल्का
27इसु इन्तासो हानिलाउ न्हेमि कान्हागेलाइ दामाता वासेहेङ पिताइतेङ र्हिकाइतेङ दोअ्हि, “दाउदको चान केलाइहेङ दाया पा।” 28वा साअ्ता दुल्कान्हुअ्सो इङको न्हेमि कान्हागेलाइ बुङ इन्ताङ थुकालिलोहि। इसु एम्बालाइहेङ हिअ्हि, “का इदोइ पालि द्वाङका दोअ्तेङ हाइ नेलाइ खान्धुर पासुखेना?” एम्बालाइ वासेहेङ दोअ्हि, “एइ, प्रभु।” 29कालाउ वा एम्बालाइको मिँ साइपितेङ दोअ्हि, “नेलाइको खान्धुर आन्सार भाइपाङ नेलाइहेङ ज्याको।” 30कालाउ एम्बालाइ मिँ तिङका जेङहि। इसु एसा दोअ्तेङ एम्बालाइहेङ कारा हुकुम पितेङ दोअ्हि, “इदोइ काथा हासुहेङ बुङ मादोअ्सु।” 31कालाउबुङ एम्बालाइ हानिहि रो इङको माउजाता वाको बारेता हिम्पागिल्हि। 32जेलाउ ओबालाइ ओल्हितेङ हानिदोङघाहि, कालाउ मासान खोअ्का एअ्मि लाटा द्याङ वाकोता चुमाहि। 33मासान ओल्हिपाकान्हुअ्सो इङको लाटा धुइका जेङहि। कालाउ “इस्राएलता हेअ्लाउ इस्का मातिन्हाहि” दोअ्तेङ द्याङगेलाइ भारभुसाइहि। 34कालाउबुङ फरिसिगेलाइ दोअ्लि तेङहि, “मासानको मालिकसो इङको मासान ओल्हिपाखे।”#मत्ति १०:२५; १२:२४; मरकुस ३:२२; लुका ११:१५
आतुइसा जनगेलाइ
(मरकुस ६:३४; लुका १०:२)
35इसु गोताङ पुरगेलाइ रो देरागेलाइभारि एम्बालाइको कचहरिसाअ्ता बिद्या पितेङ स्वरगको सारभिको रेम्काबानाल हिम्पातेङ गोताङ खाल्को रोगाइका द्याङगेलाइहेङ एल्पातेङ हिगिल्हि।#मत्ति ४:२३; मरकुस १:३९; लुका ४:४४ 36द्याङगेलाइको चेअ्सुमेअ्सुका तिङतेङ वा दायाहि। हाइदोनु एम्बालाइ घोकालाइ मान्थुका भेरागेलाइभाइपाङ माउर्या जेङका हिघाखे।#गान्देका २७:१७; १ राजा २२:१७; २ इतिहास १८:१६; इजकिएल ३४:५; मरकुस ६:३४ 37कालाउ वा ताइको चात्यागेलाइहेङ दोअ्हि, “बालि हेन्जाङ हि, कालाउबुङ जनगेलाइ आतुइसा हि।#लुका १०:२ 38इदोइभाअ्सिङ बालिको प्रभुहेङ ताइको बालि ल्होपालि जनगेलाइ दिङगिलप्याको दोअ्तेङ पारथाना पासु।”
നിലവിൽ തിരഞ്ഞെടുത്തിരിക്കുന്നു:
मत्ति 9: DHIM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2025 by Nepal Bible Society and Wycliffe Bible Translators, Inc.
