मत्ति 10
10
तेन्हे साल्तेङ दिङगिल्कालाइको काम
(मरकुस ३:१३-१९; ६:७-१३; लुका ६:१२-१६; ९:२-६)
1इसु ताइको तेन्हे चात्यागेलाइहेङ काइतेङ मासानगेलाइ ओल्हिपाका, गोताङ खाल्को मासाअ्धेका रो रोगाइकालाइ एल्पाका खाबारा पिहि।
2तेन्हे साल्तेङ दिङगिल्कालाइको मिङ इदोइ: लाङ, पत्रुस जाइहेङ सिमोन बुङ दोअ्खे रो वाको ओने आन्द्रियास, जब्दियाको चानगेलाइ याकुब रो वाको ओने युहन्ना, 3फिलिप रो बारथोलोमाइ, थोमा रो तिरो ल्होपाका मत्ति, आल्फायसको चान याकुब रो थेदियस, 4मुलुकभक्त सिमोन कनानि रो यहुदा इस्करियोत, जाइ जालपातेङ इसुहेङ रिम्पाहि।
5इसु इदोइ तेन्हे चात्यागेलाइहेङ एसा दोअ्तेङ हुकुम पितेङ दिङगिल्हि, “बोजात्यागेलाइको माझाता मान्हेसु रो सामरिगेलाइको पुरता मादुल्सु। 6कालाउबुङ इस्राएल द्याङगेलाइकोता हानिसु जाइ राम्का भेरागेलाइभाइपा जेङका हि। 7‘स्वरगको सारभि भेरपाङ लोका हि’ दोअ्तेङ हिम्पासु। 8मासाअ्धेकालाइहेङ एल्पासु, सिकालाइहेङ सिन्हुपासु, रोग्याल्होकालाइहेङ सुदो बान्हाइसु रो मासानगेलाइहेङ ओल्हिपासु। नेलाइ एन्साङ निङसुन्हा, एन्साङ पिसु। 9नेलाइ ताइको तेपानाता सोना, रुपा रो तामाको टाका माचुम्सु, 10हाइदोनु जनगेलाइ वाको गोइका चिज निङलिङ गोयाङ। कालाउ दामाता गोयाङ दोअ्तेङ झोला, भेनेङ लोखोन, जुता रो लाठि हाइदोङ माचुम्सु।#१ कोरिन्थि ९:१४; १ तिमोथि ५:१८
11 “जेदोङ पुर रो देराता नेलाइ दुलस्वाना, इन्ता बान्सा बुझाइका द्याङगेलाइ भोसु रो बेदाङगि मापिसाधाउ इन्ताङ हिसु। 12इङको साअ्ता दुल्लाउ ‘सहसाम्पा ज्याको’ दोअ्तेङ सेउपासु। 13इङको साअ्को द्याङ बान्सा बुझाइका हिनु, नेलाइको पिका सहसाम्पा इङको साअ्ता ह्याको। कालाउबुङ इङको साअ्ता बान्सा बुझाइका द्याङ मान्थुनु, नेलाइको पिका सहसाम्पा नेलाइदोफाङ घुरितेङ ल्वाको। 14हासुङ नेलाइहेङ मान मापानु रो नेलाइको बचन माहिङनु, इङको साअ् माकुनु पुरसो ओल्हिलाउ ताइको खोकोइको धुला थिपिगिल्सु।#साल्तेङ दिङगिल्का १३:५१ 15जातिङको, का नेलाइहेङ दोअ्खा, नियाको दिनाता इङको पुरको हालत खान्तेङ भुरुङ सदोम रो गमोरा पुरको दासा हेन्जा सहेलि दोका ज्यावा।#मत्ति ११:२४; सिरजाइ १९:२४-२८; लुका १०:४-१२
लोलि तोम्का सान्ताइका
(मरकुस १३:९-१३; लुका २१:१२-१७)
16 “खाङसु, का नेलाइहेङ स्याइलेको माझाता भेराभाइपा दिङगिलदोङखा। इदोइभाअ्सिङ नेलाइ पुह्याँभाइपाङ चान्डाल रो कुरजाभाइपाङ नोइका जेङसु। #
लुका १०:३
17कालाउबुङ द्याङगेलाइसो होस पातेङ हिसु, हाइदोनु एम्बालाइ नेलाइहेङ कचहरिसाअ्ता चुमप्वावा रो एम्बालाइको कचहरिसाअ्गेलाइता चुम्पुतेङ नेलाइहेङ छरि म्हेअ्तावा।#मरकुस १३:९-११; लुका १२:११-१२; २१:१२-१५ 18नेलाइ कासेहेङ खान्धुर पानाङसिङ एम्बालाइ बारका हाकिम रो राजागेलाइको आगाता जाअ्पावा। नेलाइ एम्बालाइ रो बोजात्यागेलाइको भाअ्सिङ दासि पिलि गोइस्वाना। 19कालाउबुङ जेलाउ एम्बालाइ नेलाइहेङ रिमपाप्यावा, कालाउ हेसापा रो हाइ धुयाङका दोअ्तेङ पिर मापासु। नेलाइ हाइ धुइलिगोयाङ, इङकोङ पहर नेलाइहेङ दोअ्प्यावा। 20हाइदोनु धुइका नेलाइ ताइमिङ माजेङस्वाना, कालाउबुङ नेलाइको परमेस्वर आबाको हाङसा नेलाइसो धुयावा।
21 “दादाओनेगेलाइ ताइकोङ दादाओनेगेलाइहेङ सेअ्लिको भाअ्सिङ रिम्पावा। आबा चानचामिन्दिहेङ, चानचामिन्दिगेलाइ आबा आमाइको खिलापता ल्होकावा रो एम्बालाइहेङ सेअ्लि लागायावा। #
मरकुस १३:१२; लुका २१:१६ 22कासेहेङ पिताइनाङ झाराङसो नेलाइ हेला जेङस्वाना। कालाउबुङ जाइ न्हुअ्थिकापा खान्धुरता आरितेङ हिखे, इङको सिन्हुतावा।#मत्ति २४:९,१३; मरकुस १३:१३; लुका २१:१७ 23जेलाउ एम्बालाइ नेलाइहेङ एलोङ पुरता सान्तायावा कालाउ भेनाङता खाअ्तेङ हानिसु। हाइपानु जातिङको का नेलाइहेङ दोअ्खा, का द्याङको चान लोकाखान्तेङ लाम्फा नेलाइ हिदिङ रितसो इस्राएलको गोताङ देरा पुरगेलाइता घुराइलिदोका मान्थुस्वाना।
24 “चात्या ताइ मास्टरखान्तेङ रो बान्धाइ ताइको मालिकखान्तेङ बारका जेङलि मादोखे। #
लुका ६:४०; युहन्ना १३:१६; १५:२० 25चात्या ताइको मास्टरभाइपा रो बान्धाइ ताइको मालिकभाइपा जेङलि निङकाता लेङचा। एला एम्बालाइ साअ्को मालिकहेङ दोङ मासानको राजा साइतान#१०:२५ साइतान जाइको माने “तुइर्हाङको प्रभु” रो “मासानको मालिक” जेङखे। जाइहेङ यहुदिगेलाइ “साइतान” बुङ दोअ्घाखे। दोअ्काहिपानु, वाको खालगेलाइहेङ झन हेथे हेन्जा मारेम्का दोअ्तावा?#मत्ति ९:३४; १२:२४; मरकुस ३:२२; लुका ११:१५
हासुदोफा थिलि?
(लुका १२:२-७)
26 “इदोङभाअ्सिङ एम्बालाइदोफा माथिसु। हाइदोनु थुमन्हाका गोताङ काथा तिनावा रो म्होअ्न्हाका गोताङ काथा ग्यावा। #
मरकुस ४:२२; लुका ८:१७ 27जेदोङ का नेलाइहेङ कितिकितिकाता दोअ्खा, इङको नेलाइ फाइसालाम्काता दोअ्पिसु। जेदोङ नेलाइ न्हातोङता सिपापा हिङस्वाना, इङको साअ्को र्हुतासो हिङपासु। 28नेलाइको जिउहेङ सेअ्लिदोफा माथिसु। कालाउबुङ नेलाइको हाङसा रो जिउ न्हेलोङहेङ नरकता थुकापातेङ मुअ्पाकादोफा थिसु। 29हाइ एअ् पाइसाता न्हेलोङ बागाराइ माबिकाइखे कुनु? कालाउबुङ एलोङ सारन्ह्या बुङ नेलाइको परमेस्वर आबाको इछा माकोसिङ भोनोता माहुलावा। 30नेलाइको पुरिङको पुसिङगेलाइ बुङ गोताङ गान्देन्हाका हि। 31इदोइभाअ्सिङ नेलाइ माथिसु, नेलाइ बागाराइ खान्तेङ हेन्जा मोलको हिसुन्हा।
32 “इदोइभाअ्सिङ जाइ द्याङगेलाइको आगाता कासेहेङ मन्जुर पावा, का बुङ वासेहेङ स्वरगता हिका काङको आबाको आगाता मन्जुर पाङका। 33कालाउबुङ जाइ कासेहेङ द्याङगेलाइको आगाता नामन्जुरि पावा, का बुङ वासेहेङ स्वरगता हितेङ हिका काङको आबाको आगाता नामन्जुरि पाङका।#२ तिमोथि २:१२
चात्यागेलाइ सहिलि गोइका पिर
(लुका १२:५१-५३; १४:२६-२७)
34 “का सुमिङता सान्ति चुमालि लोका दोअ्तेङ माफोमपासु। सान्ति चुमालि माको, कालाउबुङ काति चालाइलि का लोका हिघा। 35हाइपानु का द्याङहेङ वाको आबाको खिलापता, चामिन्दिहेङ वाको आमाइको खिलापता रो नामाहेङ वाको जुबेको खिलापता चेरसुपालि लोका हिघा।#मिका ७:६ 36द्याङको दुस्मन वाको ताइको खाल लिअ्ताकोलाइ ज्यावा। 37जाइ कासेहेङ खान्तेङ हेन्जा ताइको आबा माकुनु आमाइहेङ माया पावा, वा काङको चात्या जेङलि लाएकको माज्यावा। जाइ कासेहेङ खान्तेङ हेन्जा ताइको चान माकुनु चामिन्दिहेङ माया पावा, वा काङको चात्या जेङलि लाएकको माज्यावा। 38जाइ ताइको कुरुस तोल्हेतेङ कासेहेङ मापितायावा, वा काङको चात्या जेङलि लाएकको माज्यावा।#मत्ति १६:२४; मरकुस ८:३४; लुका ९:२३ 39जाइ ताइको पारान जोगाइलि भोकावा, इङको होइपावा रो जाइ ताइको पारान काङको भाअ्सिङ होइपावा इङको बान्चिपावा।#मत्ति १६:२५; मरकुस ८:३५; लुका ९:२४; १७:३३; युहन्ना १२:२५
इनामको बारेता
(मरकुस ९:४१; लुका १०:१६)
40 “नेलाइहेङ मन्जुरि पाका कासेहेङ मन्जुरि पावा रो कासेहेङ मन्जुरिपाका कासेहेङ दिङगिल्काहेङ मन्जुरि पावा। #
लुका ९:४८; १०:१६; युहन्ना १३:२०; मरकुस ९:३७ 41जाइ परमेस्वर पाहासो धुइकाहेङ मन्जुरि पावा, इङको परमेस्वर पाहासो धुइकाको इनाम निनावा। जाइ धरमाति द्याङहेङ धरमाति दोअ्तेङ मन्जुरि पावा इङको धरम जनको भाइपाङ इनाम निनावा। 42जातिङको का नेलाइहेङ दोअ्खा, जाइ इदोइ म्हुइकालाइता एअ्मिहेङ काङको चात्या मानितेङ एअ् बाति तिरका चि खिनिङ आम्लि प्यावा, इङको ताइको इनाम हेअ्लाउ बुङ माहोइपावा।”
നിലവിൽ തിരഞ്ഞെടുത്തിരിക്കുന്നു:
मत्ति 10: DHIM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2025 by Nepal Bible Society and Wycliffe Bible Translators, Inc.
