मत्ति 8
8
रोग्याल्होका एल्का
(मरकुस १:४०-४५; लुका ५:१२-१६)
1इसु आरदाङसो खुअ्लाउ द्याङगेलाइको बारका चेअ्सुमेअ्सुका वासेहेङ पिताइहि। 2इङकोङ पहर एअ्मि रोग्याखोअ्का वाकोता लोहि रो वाको आगाता तिर्हो थोतेङ एसा दोअ्हि, “ओइ प्रभु, नाङको इछा हिनु कासेहेङ एल्पालि द्वाना।” 3इसु ताइको खुरहोइ साइतेङ इङकोहेङ दोअ्हि, “का इछा पाखा, ना एल।” उदोङघरि इङकोको रोग्या एल्हि। 4कालाउ इसु इङकोहेङ दोअ्हि, “इदोइ काथा हासुहेङ मादोअ्, कालाउबुङ हाने रो ताइमि एल्का धामिहेङ तिङपा। कालाउ मोसा आर्हाइका भाइपा नाङको चार्हाइका भेटि दासिको रुपता ज्याको।”#लेबि १४:१-३२
रोमि कप्तानको कामत्या एल्का
(लुका ७:१-१०)
5इसु कफरनहुम पुरता दुललाउ एअ्मि रोमि काप्तान लोतेङ वाकोदोफा बिम्ति पालि तेङहि। 6इङको दोअ्हि, “ओइ प्रभु, काङको कामत्या गाइल्हि खोअ्तेङ हेन्जाङ पिर निङचातेङ साअ्ता तुपाइतेङ हि।” 7इसु वासेहेङ दोअ्हि, “का लोतेङ इङकोहेङ एल्पा प्याङका।” 8कालाउबुङ काप्तान दोअ्हि, “ओइ प्रभु, नासेहेङ काङको सिता चुमपुलि लाएकको का मान्थुघा। ना बचन खिनिङ धुइपि, कालाउ काङको कामत्या एलावा। 9हाइपानु का बुङ हाकिमगेलाइको आधिनता हिघा, कालाउ काङको आधिनता बुङ सिपाल्हाइ हि। का एअ्मिहेङ ‘हाने’ दोअ्खा, इङको हानिखे, भेनेङहेङ ‘लोउ’ दोअ्खा, इङको लोखे। काङको कामत्याहेङ ‘एसा पा’ दोअ्खा, वा एन्साङ पाखे।”
10कप्तानको काथा हिङतेङ इसु भारभुसाइहि रो वासेहेङ पिताइतेङ लोकालाइहेङ दोअ्हि, “जातिङको, का नेलाइहेङ दोअ्खा, इस्राएलिगेलाइता बुङ इस्का बारका खान्धुर का निङका मान्थुघा। 11का नेलाइहेङ दोअ्खा, नुहेँ रो दिहेँसो बोजात्यागेलाइ हेन्जाङ ल्वावा कालाउ आब्राहाम, इसहाक रो याकुबदोफा स्वरगको सारभिको भतेरता चालि योमावा।#लुका १३:२९ 12कालाउबुङ स्वरगको सारभिता हिलिगोइका इस्राएलिगेलाइचाहिँ बाहार कितिकितिकाता थालन्हावा। इन्ता एम्बालाइ खारस्वावा रो तासि रेअ्तावा।”#मत्ति २२:१३; २५:३०; लुका १३:२८
13कालाउ इसु काप्तानहेङ दोअ्हि, “हाने, जिसिका ना खान्धुर पाका हिन्हा, इन्सिकाङ ज्याको।” कालाउ इङको कामत्या ओदोङघरि एल्हि।
रोगाइकालाइ एल्का
(मरकुस १:२९-३४; लुका ४:३८-४१)
14इसु पत्रुसको साअ्ता लोलाउ वा पत्रुसको जुबेहेङ मेसासो तुपाइतेङ जिमतेङ हिका तिङहि। 15इसु इङकोको खुर साइपिहि रो मेसा वासेहेङ लाअ्हि। कालाउ वा ल्होहि रो वाको सेवा पालि तेङहि।
16जेलाउ बेल्हाहि, कालाउ द्याङगेलाइ वाकोता मासान खोअ्का हेन्जाङहेङ चुमाहि। इसु बचनसो दोङ मासानगेलाइहेङ ओल्हिपाहि रो जेथे मासाअ्धेकालाइ हिघाखे, एम्बालाइ झाराङहेङ एल्पाहि। 17एसापा यासाइया परमेस्वर पाहासो धुइका बचन पोङघालि इदोइ जेङका हिघाहि:
“वा ताइमिङ केलाइको निमसरिगेलाइ फुहि
रो केलाइको रोगगेलाइ एल्पाहि।”#यासाइया ५३:४
इसुहेङ पिताइलाउ भोगिलिगोइका तु:
(लुका ९:५७-६२)
18जेलाउ इसु ताइको कोरबितिङ द्याङगेलाइको चेअ्सुमेअ्सुका तिङहि, कालाउ वा चावान्दिको ओदोइपार हानिलि हुकुम पिहि। 19इङको दोङ पहर एअ्मि धरम मास्टर वाकोता लोतेङ दोअ्हि, “मास्टर, ना जेता जेता हानाना, का नासेहेङ पितायाङका।” 20इसु वासेहेङ दोअ्हि, “खाङ, स्याइलेको घारा रो जिह्याँ जुइलेङगेलाइको भासा हिखे, कालाउबुङ का द्याङको चानको भाअ्सिङ पुरिङ धाल्का थामे बुङ मान्थु।”
21वाको चात्यागेलाइता भेनेङ एअ्मि दोअ्हि, “प्रभु, लाम्फा हानितेङ कासेहेङ काङको आबाहेङ लिअ्लि हानिलि पि।” 22कालाउबुङ इसु वासेहेङ दोअ्हि, “कासेहेङ पिताइ, सिका दोङ सिकाहेङ लिअ्ताको।”
इसु दुमभेरमाहेङ गाङपाका
(मरकुस ४:३५-४१; लुका ८:२२-२५)
23कालाउ इसु नाउता धोल्कान्हुअ्सो वाको चात्यागेलाइ वासेहेङ पिताइहि। 24ओदोङघरि चावान्दिता बारका दुम्भेरमा लोहि रो लहर लोतेङ नाउहेङ थुम्लि तेङहि। कालाउबुङ इसु निन्धातेङ हिघाहि। 25चात्यागेलाइ लोतेङ एसा दोअ्तेङ वासेहेङ ल्होपाहि, “सिन्हुपा प्रभु! केलाइ दुबितेङ सिलि तोमन्हाहोइ।” 26इसु एम्बालाइहेङ दोअ्हि, “खोइ कुनु नेलाइको खान्धुर? नेलाइ हाइपालि थिसुखेना?” कालाउ ल्होतेङ वा दुमभेरमाहेङ रो लहरहेङ हाकाराइहि, कालाउ भेरमा रो लहर ओदोङघरि गाङहि। 27इदोइ तिन्तेङ झाराङ भारभुसाइतेङ दोअ्लि तेङहि, “याते हिसिका द्याङ वाला, दुमभेरमा रो चिको छाल्का बुङ वाको हुकुम साअ्खे।”
मासान खोअ्का न्हेमि द्याङ एल्का
(मरकुस ५:१-२०; लुका ८:२६-३९)
28जेलाउ इसु चावान्दिको ओदोइपार गदरिनिगेलाइको माउजाता लोहि, कालाउ मासान खोअ्का न्हेमि द्याङगेलाइ तोमहिका थामेसो लोकाताङ पालाउ इसुहेङ दुसुहि। एम्बालाइ हेन्जाङ थिनाङभाइका हिनाङसिङ हासु बुङ इन्तासो पाकपिलि मादोघाखे। 29एम्बालाइ एसा दोअ्तेङ र्हिकाइहि, “ओइ परमेस्वरको चान, नाङको केलाइदोफा हाइ मतलब? नियाको पहर माथुकासिङ केलाइहेङ हाइपालि साजाइ पिलि लोका हिन्हा?”
30एम्बालाइसो आसा दुरे पायाको एलोङ बारका जेर चारेदोङघाहि। 31मासानगेलाइ इसुहेङ एसा दोअ्तेङ भनसुन पाहि, “ना केलाइहेङ ओल्हिपान्हा पानु, केलाइहेङ पायाको जेरता दिङगिलपि।” 32कालाउ वा एम्बालाइहेङ दोअ्हि, “हानिसु!” कालाउ एम्बालाइ ओल्हितेङ पायागेलाइलिअ्ता दुल्हि रो पायाको गोताङ जेर धाअ्तेङ हानिलाउ आरदाङसो चावान्दिता हुलतेङ चिता दुबितेङ सिहि।
33कालाउ पाया घोकालाइ खाअ्हि रो पुरता हानितेङ गोताङ घाटाना रो मासान खोअ्कालाइ हाइ जेङहि इङको हिम्पापिहि। 34इदोइ काथा हिङकान्हुअ्सो पुरको झाराङ द्याङगेलाइ इसुहेङ दुसुलि लोहि रो वासेहेङ तिङतेङ द्याङगेलाइ एम्बालाइको माउजासो हानिपि दोअ्तेङ बिम्ति पाहि।
നിലവിൽ തിരഞ്ഞെടുത്തിരിക്കുന്നു:
मत्ति 8: DHIM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2025 by Nepal Bible Society and Wycliffe Bible Translators, Inc.
