मत्ति 7
7
बोमिहेङ मादुसिसु
(लुका ६:३७-३८,४१-४२)
1इसु आरोङ दोअ्काताङ हानिहि, “बोमिहेङ मादुसिसु रो नेलाइ बुङ दुस मानिङचास्वाना। 2हाइदोनु जेसापा नेलाइ बोमिहेङ दुसिस्वाना, एन्सा दोङ नेलाइ बुङ दुस निङचास्वाना। जेदोङ दोङकाहोइ नेलाइ दोङस्वाना, एन्साङपातेङ नेलाइको भाअ्सिङ बुङ दोङन्हावा।#मरकुस ४:२४ 3हाइपालि ना ताइको ओनेको मिँता हिका धुला तिङखेना, कालाउबुङ नाङको ताइकोङ मिँता हिका धेङगाराचाहिँ मागिखेना? 4ताइको मिँको धेङगारा बुङ मातिङका ताइको ओनेहेङ हेसापा दोअ्लि द्वाना, ‘कासेहेङ नाङको मिँसो धुला ओल्हिपालि पि।’ 5ओइ चिम्काटागेलाइ, लाम्फा ताइकोङ मिँसो खाति ओल्हिपा, कालाउ कि नाङको ओनेको मिँसो धुला ओल्हिपालि रेम्फा तिङलि द्वाना।
6 “जाइ पुनित हि इङको खियागेलाइहेङ मापिसु, माकुनु घुरितेङ नेलाइहेङ चि:लि भोकावा। नेलाइ ताइको मोतिगेलाइ पायाको आगाता माथाल्सु, माकुनु इङकोहेङ ताइको खोकोइहोइ यानावा।
पारथानाको बारेता बिद्या
(लुका ११:९-१३)
7 “र्हेसु ते नेलाइहेङ प्यावा, भोसु ते नेलाइ दुसुस्वाना, चालापासु ते नेलाइको भाअ्सिङ हेन्हावा। 8हाइपानु जाइ र्हेकावा इङको निनावा, जाइ भोकावा इङको निनावा रो जाइ चालाप्यावा, इङकोको भाअ्सिङ फिनु हेन्हावा। 9नेलाइता हिदोइ द्याङ हि वाला, जाइ ताइको चान तोले र्हेलाउ इङकोहेङ उन्ठुइ प्यावा? 10माकुनु हाया र्हेलाउ पुह्याँ प्यावा? 11एसापा नेलाइ दुरजन हितेङ बुङ चानचामिन्दिगेलाइहेङ रेम्का सामान पिलि गिसुन्हा पानु, झन स्वरगता हिका नेलाइको आबा वाकोदोफा र्हेकालाइहेङ हेथे हेन्जा रेम्का सामान प्यावा।
जिबनता थुकापाका दामा रो फिनु
(लुका ६:३१; १३:२४)
12 “द्याङगेलाइ नेलाइदोफा जिसिका चालचलन पाको दोअ्का नेलाइ भोसुखेना, नेलाइ बुङ एम्बालाइदोफा इन्सिकाङ चालचलन पासु। हाइदोनु इङको दोङ न्याम रो परमेस्वर पाहासो धुइकाको मुल काथागेलाइ। #
लुका ६:३१
13 “चेअ्का फिनुसो लिअ्ता दुल्सु, हाइदोनु मुअ्काता थुकापाका दामा फाराका रो फिनु सुकाका हिखे। इतासो लिअ्ता दुल्कालाइ हेन्जाङ हिखे। 14कालाउबुङ जिबनता थुकापाका दामा मासुकाका रो फिनु चेअ्का हिखे। इस्का दामा रो फिनु निङकालाइ चाहिँ आतुइसा खिनिङ हिखे।
द्याङ वाको कामसोङ नाल्खे
(लुका ६:४३-४६; १३:२५-२७)
15 “का परमेस्वरसो धुइका दोअ्तेङ ढाटाइका परमेस्वर पाहासो धुइका दोफा होस पातेङ हिसु। इस्का द्याङगेलाइ नेलाइकोता भेराको रुपता लोखे, जाइ लिअ्तापाहा चाहिँ थिलिगोइका स्याइलेगेलाइ भाइका हिखे। 16नेलाइ एम्बालाइहेङ ओबालाइको कामसोङ नालस्वाना। हाइ चुइको सिङसो आङगुर माकुनु चुभ्रिको सिङसो दुमरि पेन्हाखे कुनु? 17एन्साङपातेङ गोताङ रेम्का सिङ रेम्काङ फल सेपाखे। कालाउबुङ मारेम्का सिङ मारेम्काङ फल सेपाखे। 18रेम्का सिङ मारेम्का फल सेपालि मादोखे, ना मारेम्का सिङ रेम्का फल सेपालि दोखे। 19रेम्का फल सेपालि मादोका गोताङ सिङ पाल्तेङ उन्धिपावा रो मेता थालन्हावा।#मत्ति ३:१०; लुका ३:९ 20एसापा इङको परमेस्वर पाहासो धुइकालाइहेङ एम्बालाइको पाका कामसो नालस्वाना।#मत्ति १२:३३
21 “कासेहेङ ‘प्रभु’, ‘प्रभु’ दोअ्का झाराङ स्वरगको सारभिता दुल्लि मानिनावा। स्वरगता हिका काङको आबाको इछा मानिका द्याङखिनिङ स्वरगको सारभिता दुल्लि निनावा। 22इङको दिना हेअ्मि कासेहेङ दोअ्तावा, ‘प्रभु, प्रभु, हाइ केलाइ नाङको मिङता आगमबानि माधुइन्हाहि? हाइ नाङको मिङता मासानगेलाइ माओल्हेपान्हाहि? हाइ नाङको मिङता भारभुसाइका कामगेलाइ मापान्हाहि कुनु?’ 23कालाउ का एम्बालाइहेङ दोअ्ताङका, ‘का नेलाइहेङ हेअ्लाउ नाल्का मान्थुघा। ओइ दुरजन काम पाकालाइ, कासो दुरे जेङसु।’#ले ६:८
साअ्को न्हे खालको जग
(लुका ६:४७-४९)
24 “इदोइभाअ्सिङ काङको बचनगेलाइ हिङका रो मानिका द्याङहेङ चाहिँ ताइको साअ् रेम्का थामेता बान्हाइका एअ्मि आकिल हिका द्याङदोफा दाज्याङका। 25कालाउ वाइ लोहि, बाने लोहि, दुमभेरमा लोहि रो इङको साअ्ता फेअ्न्हाहि। कालाउबुङ इङको साअ् माउन्धिहि, हाइपानु इङको रेम्का थामेता बान्हाइका हिघाहि। 26कालाउबुङ जाइ काङको बचन हिङतेङ बुङ मामानिका द्याङहेङ चाहिँ ताइको साअ् मारेम्का थामेता बान्हाइका एअ्मि आकिल मान्थुका द्याङदोफा दाज्याङका। 27कालाउ वाइ लोहि, बाने लोहि, दुमभेरमा लोहि रो इङको साअ्ता फेअ्न्हाहि रो वाको साअ् गारामगुरुम्पा उन्धिहि।”
28इसु इदोइ काथा दोअ्लि दोकान्हुअ्सो इन्ता जोम्कालाइ वाको बिद्या हिङतेङ भारभुसाइहि।#मरकुस १:२२; लुका ४:३२ 29हाइपानु वा एम्बालाइको धरम मास्टरगेलाइ भाइपा माको, कालाउबुङ खाबारा हिका द्याङ भाइपा पातेङ धिरपाघाहि।
നിലവിൽ തിരഞ്ഞെടുത്തിരിക്കുന്നു:
मत्ति 7: DHIM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2025 by Nepal Bible Society and Wycliffe Bible Translators, Inc.
