Mareke 12
12
Ngana ye akyeli nguunu baabi
(Lekese se Matye 21.33-46; Luke 20.9-19)
1Jezu wobi bila bo ma ngana ndi: «Kiigi ŋa balaga lemo le lekuni nguunu ye vinye, nde njii yo ma lepangi, nde cumi bila ma kapya maali, ŋa nde cwi njo ye ma kakyele. Amana nde nyini vinye ŋa akyeli nguunu ŋa nde yeni opinga. 2Ntini etoyi, nde tumi ojanji mpila akyeli nguunu ma kabaga le bo bugu lemburu. 3Ŋaa bo akwari ojanji, abumi nde luuba, ŋa vuti nde eli kiila ma kwogo kali. 4Ŋaa nga nguunu tumi ojanji okima, wua, bo aberi nde ka ocu ŋa atugi nde. 5Nga nguunu vuri tumi okima, ŋa wua, bo abumi nde. Nde vuri tumi ajanji akima kuna, ŋa akyeli nguunu aberi ake ŋa baamo bo abumi. 6Wo osiili mwana omo o nga nguunu wo kajii kuna. Nde tumi bo nde lebiza, kabila nde ki baraga mini: “Bo baaje kanyima mwana mi.” 7Ŋaa akyeli nguunu ka ba aduga kanca mpanaŋa bo mini: “Lemono nga wanda! Lecwe lebuma nde, nguunu eka e bizi a be.” 8Bo akwari mwana wua, abumi nde ŋa acuni njuru a nde kangula nguunu.»
9Jezu apiza ndi: «Nga vinye yiga bunu kaasa? Nde aje kaya, nde abuma ajanji, ŋa nde ampa yo ŋa akima. 10Be lekini yuga mbari ye amaateende nca buku le Njyami ndi:
“Kele le ancwa anjo kiigi acuni,
lo lemi kiriga kele leenini, le lesuga njo ŋi.
11Mfumu wo si bwa,
ma bizi, kasima keeve ka miizi a bizi#12.11 Pisome 118.22-23.!”»
12Ampi ambwoŋi baasaga kakwara Jezu, kabila bo kiigi ayayi ndi nde dugi ngana yia ŋa bo. Ŋaa bo kiigi ŋa obwogo ba lembuuru, bo yiga anyini nde oyeni.
Lempo le awuri ŋa okunji
(Lekese se Matye 22.15-22; Luke 20.20-26)
13Ampi ambwoŋi atumi mpila Jezu aFarizi ake ŋa baari ake ba okunji Erode, ma kayaga nde ma tanga ma ojugu omo. 14Bo ayi duga nde ndi: «Oyizigi, bizi leyayi ni we aduga syele, we obwogo o mbuuru kali, we akamono onini o mbuuru ŋi, ŋaa eyizigi e we e jaajaa yila eki ba jii Njyami. Duga bizi, ngiri a bizi ye laga bizi ma kawura lempo ŋa Sezar sikali?» 15Ŋaa Jezu kiigi yayi ndi bo ba acwogo ebarigi e bo, nde dugi bo ndi: «Meema be lege mi tanga? Leya ŋa mi lempara lenkozo lemo, mi jii lo kamono.» 16Bo amvyeri nde lempara lemo, ŋa Jezu pizi bo ndi: «Kadisi ki bila nkuumu yi ena?» Bo akaali ndi: «Ye Sezar.» 17Ŋaa Jezu ŋa bo ndi: «Ba Sezar, levuta jo ŋa Sezar, ŋa levuta ba Njyami ŋa Njyami.» Ntini ye yugi bo ojugu wua ekoli bo.
Ojugu yila enyuzugi
(Lekese se Matye 22.23-33; Luke 20.27-40)
18ASadiseye ake ayi paana Jezu. Bo baari ba baaduga ndi ba amakpa ba kayuga ŋi. Bo alegi nde ejugu bi ndi: 19«Oyizigi, Moyize kiigi maateende ma bizi a be nca okanda wo angiri ndi: “Aka mbuuru omo ŋa ndumu eli kiigi maasa baala, ŋaa nde ma kpaa, ŋaa nde kabiza kula. Ndumu a nde baali okaazi wo okuulu wua. Mabuni nde kuli ofu wua kacya#12.19 Lekese Deterenome 25.5-6..” 20Ŋi kiigi ŋa andumu ncaami. Wo ncomi obaali okaazi, ŋa nde kpi mwana kali. 21Wo ywele se vuri baali okaazi wua, ŋa nde kpi, nde ki kula ŋi. Jaa lomankulu lya leyi ma wo otari, 22ŋa bo aso ancaami ba abali okaazi wua, akpi, ŋa se wookuli kali. Amana bo aso, okaazi wua se kpi. 23Ma cugu eli ba amakpa baanyuzuga, kanca andumu ba ncaami wo aka olumi okaazi wua na? Kabila bo aso abagi nde mva okari!» 24Jezu kaali bo ndi: «Be lekura bemankulu kabila be leki ya se ma maateendi ŋi se mpari a Njyami ŋi. 25Okorogo, ntini ye nyuzuga bo kanca baakpa kpa, leka ma yaga okari bila olumi ŋi, ŋaa bo baaka mva antuma-yulu. 26Ma baari ba baanyuzuga, be lekini tanga kanca buku le Moyize ma dugi Njyami nde tuga ŋa kaboligi mini: “Mi Njyami Abarayame, Njyami Izake bila Njyami Jakobe#12.26 Exode 3.6..” 27Jezu lusi, Njyami ka Njyami a baari baakpa kpa ŋi, ŋaa nde Njyami a baari amwo, jaajaa, be lemitamaŋa bemankulu.»
Ngiri ye vuli abuga onini
(Lekese se Matye 22.34-40; Luke 10.25-28)
28Oyizigi angiri omo yugi kawobo bo. Nde moni ni Jezu yemiŋi ka kaali aSadiseye. Ŋaa nde yi ciina mpaana nde ŋa pizi nde ndi: «Kanca angiri aso ye evuli onini yini?» 29Jezu kaali nde ndi: «Lemono ngiri ye ncomi: “Yuga, Ezerayele! Mfumu Njyami bizi a be, nde kamaka nde tu Mfumu. 30Ave we jii Mfumu wo Njyami a we, ma otuma we oso, ma o mbuuru o we oso, ecimiŋi e we eso bila mpari we eso#12.30 Deteronome 6.5-6..” 31Ŋa mono ngiri yo ywele: “Ave we jii buga lengulu mva kajya wemankulu#12.31 Levitike 19.18..” Ngiri kima ye evuli ma abwele maa kali.» 32Oyizigi angiri dugi ŋa Jezu ndi: «Ma dugi we tata: Mfumu Njyami ndemotu, ŋa Njyami okima mva nde kali. 33Mbuuru ŋa mbuuru ave jii Njyami ma otuma o nde oso, ma o mbuuru o nde oso, ma mpari nde eso bila ecimiŋi e nde eso. Ŋa ave nde jii buga le nde lengulu mva ndemankulu. Bwa evuli everege eso bila ambwoŋi ma anyama.» 34Ntini ye moni Jezu ndi nde kaali bila ncimi, nde dugi nde ndi: «We ki lala ma omfumu o Njyami ŋi.» Kamana bwa, mbuuru ki ma mpa nde ejugu ŋi.
Masiya bila Davide
(Lekese se Matye 22.41-46; Luke 20.41-44)
35Jezu ayiziga kanca Njo Njyami yeenini. Nde legi bo ojugu wu ndi: «Ayizigi angiri ba aduga ni Masiya mwana Davide. Ŋaa bo buni ba aduga bwa? 36Kabila Davide aduga ndemankulu ma mpari ye Oduduma Cece ndi:
“Mfumu Njyami aduga ŋa Mfumu a mi mini:
Ya ka mancina ka kwogo ka mi ka kalumu.
Tii ke lege mi anywon a we aka ncina ntaami e we.”
37Davide ndemankulu acwolo nde “Mfumu”, ŋa nde kavura ka mwana nde buni?»
Jezu ayieze lembuuru ma ayizigi angiri
(Lekese se Matye 23.1-36; Luke 20.45-47)
Bege le lembuuru le kiigi yuga Jezu bila kase. 38Jezu dugi kanca eyizigi e nde ndi: «Lesa oyeri, lendaga kasa mva ayizigi angiri. Bo njala kayira ma amfa maave, bo njala ndi abigi bo ma ebiri ba emakuga baari kanca kangundu. 39Bo njala kaka ma ebiri encomi kanca anjo ma maabwono ŋa ma kaka ma ebiri encomi ba akiza. 40Bo ayagi akuuli elogo eso, bo ba biga nca ebwoni e bo, ma kamvyere ndi bo baari baave. Mabwa esisi ba asisa Njyami bo be evula ba abuga.»
Overege wo ampa okuulu wo ofuga
(Lekese se Luke 21.1-4)
41Kanca Njo-Njyami, ŋa biri lemo eli baari ba ampa ampara ma overege. Jezu ki mancina ŋa nde kakese maasa bo. Anga kabaga kuna ba kampa bege le ampara. 42Okaazi omo wo okuulu kiigi ofuga, ŋa olegi ampara ma akyege ma ankoro mwele. 43Ŋaa Jezu cwoli alwoni a nde ŋa dugi bo ndi: «Mi eduga be, jaajaa: okuulu wo ofuga wua ompi eso ba evuli abuga. 44Okorogo, abuga baamo ampi ampara mali kalogo ma kasa kali. Ŋaa okuulu wua wo kiigi nca kaama, ompi ampara aso ma kiigi ŋa nde.»
നിലവിൽ തിരഞ്ഞെടുത്തിരിക്കുന്നു:
Mareke 12: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
