Mareke 11
11
Jezu anyunuŋa nca Jeruzaleme mva okunji
(Lekese se Matye 21.1-11; Luke 19.28-40; Jan 12.12-19)
1Ntini ye eciini bo Jeruzaleme, paana ampugu ma Betefaye ŋa Betani, bo ato mpila Kakuru ka Elivye. Jezu tumi alwoni a nde bwele. 2Nde ŋa bo ndi: «Leje mpugu yeeli ka levuzu le be. Kaŋa, be leje kamono mwana nyama ane ka amakura ma ondi. Mbuuru kini kakuma yila ko ŋi. Lepisa ko ŋa leya ŋa ko kuni. 3Aka mbuuru apiza be ndi: “Meema be lesa bwa?” Be le kaali nde mini: “Mfumu ŋa kaama, ŋaa nde avuta nde parabu kakunu.”»
4Bo ayeni ŋa abagi mwana nyama ane kajii, nca owombo, amaakura ma kadubugu ka njo. Bo anaani ko. 5Baari ba kiigi kaŋa apizi bo ndi: «Be ema lesa? Meema be le pisa mwana nyama ane?» 6Alwoni akaali bo ma dugi Jezu, ŋa anyini bo ayeni. 7Bo ayi ŋa mwana nyama ane mpila Jezu, bo alegi amfa a bo maala yila nyama, ŋa Jezu ki manci yila ko. 8Bege le baari le legi amfa yila njila, ŋa akima alegi antaga ma teŋi-teŋi ma aba eli bo kiigi amacaga nca anguunu. 9Ba akiigi je levuzu le Jezu ŋa ba kiigi lwono nde ati nya ndi: «Lekuma leka ŋa Njyami! Ndi Njyami kampa puga ŋa wooli aya ma nkuumu Mfumu! 10Ndi Njyami kampa puga ŋa omfumu ba bo ya, omfumu o Davide wo taara bizi a be! Lekuma leka ŋa Njyami ka yulu!» 11Jezu nyunuŋi Jeruzaleme, ŋa yeni Njo-Njyami Yeenini. Kamana kese aso baali kapaana nde, nde yeni Betani bila alwoni a kuumu ŋa bwele, kabila atari kiigi yiga amimana yira.
Jezu alogo ofingye
(Lekese se Matye 21.18-19)
12Anyuziga, ma ntini ye kiigi cyege bo Betani, Jezu bagi njala. 13Nde moni kalala ofingye omo wo kiigi ŋa ncuuzu, ŋa nde yeni kakese aka nde amono mburu, ŋaa ntini ye nde ka katoyi paana oti, nde bazigi ncuuzu tu, kabila kiigi ka ovu ba mburu ofingye ŋi. 14Ŋaa Jezu dugi ŋa ofingye ndi: «Mbuuru ki ma aja mburu a we ŋi!» Ŋa alwoni a nde ayugi nde.
Jezu nca Njo Njyami Yeenini
(Lekese se Matye 21.12-17; Luke 19.45-48; Jan 2.13-22)
15Bo ato Jeruzaleme. Jezu yeni Njo Njyami Yeenini ŋa nde cuti ba kiigi tege sikali ba kiigi suuma nca Njo Njyami Yeenini. Nde funuŋi abisa ba baba kaala ampara bila baba atege akuuna, 16ŋa nde ki nyina se mbuuru ma kabira kiila ma kayira bila ko nca lebugu le Njo Njyami ŋi. 17Ŋa nde yizigi bo ndi: «Kanca ampiri, Njyami aduga mini: “Baaje kacwolo njo mi ma njo obwoni ma baari aso.” Ŋaa be, be lema sa kamangi ka asara.» 18Amfumu ba ampi ambwoŋi ŋa ayizigi angiri ayugi bwa ŋa bo kiigi ba saga lemigi le kabuma Jezu. Okorogo, bo kiigi ŋa bwogo o nde, ma lembuuru leso lekiigi nca akimi ma eyizigi e nde. 19Ekolo eto, Jezu bila alwoni a nde acuugi kanca kangundu.
Jezu ŋa ofingye wo kaya
(Lekese se Matye 21.20-22)
20Anyuziga ka ecyere, ntini e bo ka kiigi yira ma njila, bo amoni ofingye: ŋa nde kiigi ma kaya tii ekaŋa. 21Pyere barigi ma ayiri ŋa dugi ŋa Jezu ndi: «Oyizigi, kese ofingye eli we logi mi kaya.» 22Jezu dugi ŋa alwoni a nde ndi: «Mi eduga be, sisyele: Lebaga lila ma Njyami! 23Aka mbuuru aduga kakuru ki mini: “Cyege kaŋa ŋa va nca lemere”, ŋa aka nde ki sa ekemi nca otuma nde ŋi, ŋaa ayalaga ni ba edugi nde beeje kaya, bya beeje kaya ma nde. 24Ma bwa, mi eduga be: Ntini ye ebwono be ma kapiza kiila, leyalaga ni be lemi baga ko ŋa bwa baaje kampa be. 25Ŋa ntini yeeli be ma otele ma kabwono, aka be ŋa jaa ma njuru a mbuuru, le bologo nde, mabuni Taara be wooli kayulu kabologo be se ma maami maabi ma maasa be. [26Ŋaa aka be leka bologo abuga ŋi, Taara be wooli kayulu a ka bologo be se ma maami maabi maasa be ŋi#11.26 Olwo wu ba kamono nde kanca bege le ampiri akala ŋi..]»
Onkani o Jezu kunu ba owa?
(Lekese se Matye 21.23-27; Luke 20.1-8)
27Bo ayi vuruga Jeruzaleme. Ntini ye Jezu ka kiigi je ŋa ka kiigi ya Njo Njyami, ampi ambwoŋi, ŋa ayizigi angiri bila akuuru ayi mpila nde. 28Bo apizi nde ndi: «We ma bani omfumu wo asa maami ma? We ampa we otori ma kasa maami ma na?» 29Jezu kaali ŋa bo ndi: «Mi elege be ojugu, aka be lekaala mi, mi eduga be ma otori o na mi esa bwa. 30Wo otumi Jan ma kampa ateemi na? Njyami sikali abalaga? Lekaala mi.» 31Ŋaa bo yiga ba awobo ka mpanaŋa bo ŋa adugi ndi: «Aka bizi a be leyalaga ni Njyami mbuuru wo tumi nde, nde aje kapiza bizi a be mini: “Meema be lebizi kayalaga mbari a Jan?” 32Ŋaa bizi a be lebuna kaduga mini: “Baari omwo atumi nde”?» Bo kiigi ŋa bwogo ba lembuuru, kabila aso akiigi cimiŋa ni Jan kiigi ntuma Njyami o jaajaa. 33Ŋaa bo akaali ŋa Jezu ndi: «Bizi leki ya ŋi.» Jezu kaali ndi: «Yemiŋi, mi se kali, mi e kaduga be ma otori o na mi esa maami ma ŋi.»
നിലവിൽ തിരഞ്ഞെടുത്തിരിക്കുന്നു:
Mareke 11: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
