Mareke 13
13
Jezu awobo ma ecali e Njo Njyami yeenini
(Lekese se Matye 24.1-2; Luke 21.5-6)
1Amana Jezu cuugi kanca Njo Njyami yeenini, ŋa omo kanca alwoni a nde ŋa nde ndi: «Oyizigi, kese! Ma akele maave, ma anjo maanini.» 2Jezu akaala nde ndi: «We amono anjo maanini ma? Yeeje kasiila kakuni se kele lemo kayila buga ŋi, eso baaje kacala.»
Ampasi bila andogo
(Lekese se Matye 24.3-14; Luke 21.7-19)
3Jezu vi mancina kayila kakuru ka Olivye, ka ovuzu o Njo Njyami Yeenini. Pyere, Jake, Jan bila Andere bo ali bomantu bila nde ŋa bo apizi nde ndi: 4«Duga bizi ntini yeeje kayira maami ma, ŋa kaliimi keeje kamweze ntini eli maami ma aso maaje kaya.»
5Ŋaa Jezu dugi bo ndi: «Lesa oyeri ni mbuuru kabiza be kakura. 6Bege le baari baaje kaya ma nkuumu a mi. Bo baaje kaduga mini: “Masiya mi!” Ŋa bo ba akura bege le baari. 7Be leyuga ba awobo ma eta bila baari ba atemeŋe ma eta, be lebizi bwogo kamono. Ave maami ma aso ayi, ŋaa ka ewi ba okiri ŋi. 8Kasi kamon ka ejwana bila kasi kakima, omfumu bila omfumu okima, ncye yeeje kanyiga ma ebiri eso, bila njala yeenini. Yeeje kaka mva ebaani encomi ba ekuli. 9Ŋaa be, leyuga yemiŋi ma maaya ma be! Baari baaje kapama be ma ebiri ba baapama, baaje kabere be kanca anjo ma maabwono. Baaje kabira be ka ovuzu ba anguverenere bila akunji ma mi. Ŋaa be leeje kaka atemi a mi ka levuzu le bo. 10Ave abaani kampa Ncya yeemve ma esi eso. 11Ŋa ntini ye ba abira be ma kapama be, lebiza kabaana kabaraga ma kapiza ni: “Bizi jo ema leduga?” Ma ntini yia be leduga ambari ma ampa Njyami be. Okorogo ka be leeje kawobo ŋi, ŋaa Oduduma Cece. 12Ndumu aje kakaba ndumu a nde mabuni abuma nde, taara aje kasa bwa ma mwana nde. Baana baaje kaka anywo ba ankwono a bo, ŋa bo baaje kabuma bo. 13Baari aso baaje kabele be ma nkuumu a mi. Ŋaa wo aje kasa mpana tii ka ba amana, aje kavuuga.»
Baari ba amono mpasi kuna
(Lekese se Matye 24.15-28; Luke 21.20-24)
14«Be leeje kamono “Kalogo keebi kabele Njyami” nca biri eli nde akabuna kaka ŋi. Mbuuru wo atanga elogo bya ave yuzugi yemiŋi! Ŋaa ba baaje kaka ka Jude baaje kaduma ma kacu ka ekuru, 15mbuuru wo aje kaka kayila kalembe ka njo akamavura suraga, ma kanyunuŋa nca njo nde ma kayaga biibi ŋi, 16ŋa mbuuru wo aje kaka kanca nguunu ki masaga kavuruga njo nde ma kaje saga ngoyi ŋi. 17Ma cugu lya, ndogo yeeje kaka ma akaazi ba anga ayimi bila ba baaje kaka avaligi. 18Lebwono Njyami ni elogo bya ebiza kama ya ma ovu woobi. 19Okorogo ecugu bya, baari baaje kamono mpasi kuna. Mbuuru kamono mpasi mva bwa ŋi, kaasa baana okiri ntini ye Njyami ye kawangi eso, tii lubu. Ŋa mbuuru aka maaje kamono mpasi mva bwa ŋi. 20Aka Mfumu Njyami kiigi ki kura ojugu ma kasyele ecugu, mbuuru ka ma vuuga ŋi, ŋaa nde kuri ojugu ma kasyele ecugu ma baari ba swoli nde. 21Aka mbuuru aduga be ni: “Lekese Masiya li kakunu” sikali: “Lekese nde li kaŋa”, lebiza nde kayalaga. 22Okorogo amasiya ba alaa bila antuma-Njyami baabi baaje kaya. Bo baaje kasa elogo ba ekemi bila ampiri, ma kakura baari eli Njyami ma swolo, aka ba abuna. 23Yiga be lesa oyeri! Mi ayieze be ma maami aso ma maaje kaya.»
Eyi e Mwana Mbuuru
(Lekese se Matye 24.29-31; Luke 21.25-28)
24Ecugu bya, baari baaje kamono mpasi kuna. Amana, muyi aje kapiina, ngondo akama je kampa kawi ŋi. 25Anyari ba wa yulu maaje kava, ŋa mpari ye yulu yeeje katerege. 26Ŋaa baaje kamono kaya Mwana Mbuuru kanca kaduba, bila mpari a nde eso ŋa lekuma le nde leso. 27Ŋaa nde aje katuma antuma-yulu, ŋa nde kavuruga baari ba swoli nde, ecu ena ba okiri, ma ncwo ncye tii ncwo yulu.
Ngana ye ofingye
(Lekese se Matye 24.32-35; Luke 21.29-33)
28«Leyuga ngana ye ampa ofingye: ntini ye akele aliri nca ataŋa ŋa ncuuzu a nde ye mene, be leyayi ni, ovu o mvula yiga tuga kaya. 29Ma lemigi lomankulu lya, be se, ntini yeeje kamono be maami ma maaya, ave be leyayi ni Mwana Mbuuru yiga tuga kaya, nde li ka kadubugu ka be. 30Mi eduga be, jaajaa, ntini yeeje kaya maami ma, baari a lubu ba kaaje kakpa aso ŋi. 31Yulu bila ncye yeeje kawa, ŋaa mbari a mi ye kaaje kawa ŋi.»
Njyami ndemotu aya ntini ye awa okiri
(Lekese se Matye 24.36-44)
32«Ŋaa cugu bila tari eli elogo bya beeje kaya, mbuuru ki ya ŋi, se antuma-yulu, se Mwana Njyami. Taara ndemotu yayi. 33Lesa oyeri! Lenyina tolo kapwo, kabila be leki ya kaya ntini ŋi. 34Lebaraga, ma osumbu, eli balaga aje ma opinga. Nde cyegi njo nde ŋa mpi yo ŋa ajanji a nde. Nde mpi mbuuru ŋa mbuuru janja ma kasa ŋa tumi okyele kadubugu ka njo ma kaka osigi. 35Lesa oyeri, kabila be leki ya cugu le aya mfumu a njo ŋi. Aka lempiibi sikali otuma lempiibi, sikali, ka kwogo ncuzu, sikali ka nkara encyere. 36Aka nde aya parabu ŋa, ave nde bizi be ma tolo kamono. 37Ma dugi mi be, mi eduga mo ŋa baari aso: leka mwoyi.»
നിലവിൽ തിരഞ്ഞെടുത്തിരിക്കുന്നു:
Mareke 13: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
