Amosi 4
4
1Vôganyôṉ’igamba nyiṉo, aṉwè inyar’inyantô si Basan si dwaṉa gô nômba yi Samarya, aṉwè yi bangaty’ikuge, aṉwè yi tuga mongi wi re jela pa, n’aṉwè yi buliny’aṉôm̃e saṉi inè. Ṽagaṉi, ko zwè jonga! 2Rerè, Yeôva, are tanga p’ôrangô n’ôrundi wè inè: vônaṉi, intyugu si be bya gôre ṉwè si be bonga waô ṉwè n’imyanga yi jakizô yom̃a, n’awaṉi waṉi n’alowo; 3aṉwè be kogwa n’azege, ôm’edu gô nkôṽi yè, n’aṉwè be falô gô nagô njoli, bulye Yeôva.
4Gèndaṉi gô Betèl, ko janjaṉ’ibe! Gèndaṉi gô Gilgal, ko janjaṉ’ibe vyagaṉô! Yiraṉ’intyagô saṉi ibangy’edu, n’imbèy saṉi avila gw’igôm̃i ntyugw’edu ntyarô! 5Yiraṉ’intyagô saṉi s’akeṽa ni levèn! Rakilyaṉi, ko myezaṉ’intyagô saṉi si mpagaga! Konde yom̃a yiṉo yô tondô ṉwè, aṉwè awaṉa w’Israèl, bulye Rerè, Yeôva. 6Na myè, my’arôm̃i njaṉa gw’inkali saṉi sôdu, n’inya s’asili gw’alwaṉô maṉi môdu. Vangaṉe yeṉo, aṉwè pa fwinya gôre myè, bulye Yeôva. 7Na myè my’aṉim̃iṉi ṉwè ningô, gw’avegagi e p’are agwèli ararô kwanga gw’egômbe z’iteṉa; n’aṉogizi myè ningô gô nkala mori, ko my’aṉogize ningô gô nkala nyèṉè; ni ningô y’aṉogi g’ômpind’ôm̃ori, n’ômpind’ôm̃ori wi re wi pa nogiṉô ningô w’ayôm̃i. 8Yeṉo nkala mbaṉi ntyo ntyarô s’agèndagèndi gô nkala nyèṉè gô jong’aṉingô, ndô si re jôre. Vangaṉe yeṉo aṉwè pa fwinya gôre myè, bulye Yeôva. 9My’are bôla pa ṉwè ni nyanga n’itôwa; intyagi saṉi inyenge, intyagi saṉi s’igoli, ni rere yaṉi yi figi, na yi yôlivi yi re nyô pa n’isakampazô. Vangaṉe yeṉo aṉwè pa fwinya gôre myè, bulye Yeôva. 10My’are tôm̃a pe vunga gôre ṉwè, egolaṉi ga gw’Egipt; my’are jôṉa p’awanjo maṉi n’ôkwara, my’are tiga p’ikavali saṉi gô bongô; my’are panga p’ômpuṉa w’ôlakô waṉi gô panda kwanga gw’isoguṉi yaṉi y’ômpômbô. Vangaṉe yeṉo aṉwè pa fwinya gôre myè. 11My’are bôṉa pa ṉwè bundu, egolaṉi ga Sôdoma ni Gômora, y’ayilizô ne Anyambyè; n’aṉw’are dwaṉa pa egolaṉi ga inyingilya nya gèlagèla ny’atômbô avila g’ôgôṉi. Vangaṉe yeṉo aṉwè pa fwinya gôre myè, bulye Yeôva ... 12Yeṉo mi be dendiṉo mbela mèmô, Israèl, na gô re nè mi be dendiṉo mbela mèmô, sambô, gekiza gô dataṉa n’Anyambyè yo, Israèl! 13Konde vôna, ayè y’avang’inômba n’ômpunga, na yi myez’ipikilyi sè gôr’ôma, ayè yi kaluṉ’ibanga mpiri, na yi kangaṉa gw’imbôr’indôndwi si ntye: ini nyè ne Yeôva, Anyambyè y’imbèli.
നിലവിൽ തിരഞ്ഞെടുത്തിരിക്കുന്നു:
Amosi 4: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.