Amosi 5
5
1Vôganyôṉ’igamba nyiṉo, edingô ziṉo zi kambô myè gôre ṉwè, nagô y’Israèl! 2Izali nyi re nyi pa dèwa n’ôṉôm̃e ni mori ny’Israèl, ny’apôswi, nyi ze tô nongwe nyèṉè; nyi re dèwa pa gô ntye, e zel’ôma wi be nongunyè. 3Konde yeṉo kambe Rerè, Yeôva inè: Nkala y’agèndagi gô nwa ni ntozèny y’aṉôm̃e yi be tigaṉa kaô ni nkam̃a, na y’agèndagi gô nwa ni nkam̃a y’aṉôm̃e yi be tigaṉa kaô n’igôm̃i, gô nagô y’Israèl.
4Konde yeṉo kambe Yeôva gô nagô y’Israèl inè: Wutaṉi myè, ko ṉwè tôla! 5Awutaṉi Betèl, agèndaṉi gô Gilgal, agèndaṉi gô Beèr‐Seba. Konde Gilgal e be kôtô ikôte, ni Betèl e be jilizô. 6Wutaṉi Yeôva, ko ṉwè tôla! ryaṉi nè, e vende sazuṉe nagô yi Yôsèf egolaṉi g’ôgôṉi, ko ôgôṉi mè w’aveza yô, ôma fo gô Betèl gô nim̃a wô, 7Aṉwè yi kaluṉ’ôgôre g’abisènte na yi jar’ôgôre gô ntye!
8Ayè re panga pe Pleyade n’Ôryon, e kaluṉe mpiri ibanga, e jilangaṉ’ôm̃anda gô panga wô ôgwèra, e fwey’aṉingô mi mbeṉe, ayira mô g’ôzô wi ntye: Yeôva ne ini nyè. 9E nonguny’ijiliza gôre mongi wi ngulu, n’ijiliza si bya gw’inagô injoli.
10Wi bik’ôma wi sèmba waô gw’iguge, aṽik’ôma wi kamb’ôrèti. 11Yeṉo, gô re nè aṉw’are jara p’ôkuge, ko ṉwè bongiṉè bile ga mpagaga, aṉw’are nôga p’inagô n’adô mi mpaṉôgô, ndô aṉwè ze dwaṉe gô sô; aṉw’are bèṉa p’intyag’imbya s’igoli, ndô aṉwè ze jong’ivè nya sô. 12Konde, my’avôrô ibuṉa s’ipavi saṉi, ibe saṉi s’abuṉi; aṉwè bangaty’ôma w’ôgôre, aṉwè bonge mpagaga, ko ṉwè tômb’ikuge gw’iguge avila g’ôgôre waô. 13Sambô ôma w’ôkeli e dwaṉa do gw’egômbe ôṉongo wiṉo; konde gômbe mèyoṉo yi re ṽe.
14Gombizaṉi mbya arange mbe, ko ṉwè tôla, ko Yeôva, Anyambyè y’imbèli, dwaṉa na ṉwè, ga nte bulya ṉwè. 15Ṽikaṉi mbe ko tondaṉi mbya, ko dwaṉizaṉ’ôgôre g’ômpômbala; vendetwa Yeôva, Anyambyè y’imbèli, e be pôgiṉe mbèy yi Yôsèf.
16Sambô yeṉo kambe Yeôva, Anyambyè y’imbèli, Rerè inè: Edingô zi be deṉô gw’imbôra sôdu, e be bulyô gw’agala môdu inè: Èñ, Èñ! Ôma wi tumbiṉe ntye e be fweyô gw’iwoga, na gô dingô waô wi sim̃iṉa. 17E be deṉô edingô gw’intyaga sôdu s’igoli, gô be pyagaṉa myè gô garegare yo, bulye Yeôva.
18Azile gôre waô wi jônguṉe ntyugu yi Yeôva! ezande zi pengiṉa ṉwè gô ntyugu yi Yeôva! yi be dwaṉe mpiri arang’ôzange. 19Aṉwè be dwaṉ’egolaṉi g’ôma wi fanga avila gôre liyoni ko ursi dataṉa na yè, e jingiṉa gô nagô yè, avit’ôgo wè g’ôzira, ko yè nôm̃ô n’ôm̃amba. 20Ntyugu yi Yeôva yi be dwaṉe ntyugu yi mpiri, aranga y’ôzange, yi be dwaṉa ntyugu yi mpiri mpôlô, n’ônjèlènjèlè fo.
21Mi bika, mi pèdy’ifèti saṉi, my’ayolye jeṉ’idataṉi saṉi. 22Vang’aṉwè ajiriṉa myè intyagô si pezô na s’inya, mi ze tonde sô; n’inyar’impôm̃i si jirô ṉwè gw’intyagô s’akeṽa, mi pa pôna sô. 23Rômbe nyongolè y’ijembô so bô avila gôre myè, mi pa pôganyô inyôy ny’intyambi so. 24Ndô ôgôre wi ga vôve g’aṉingô, n’ôrèti ga mw’ôloṽi wi re w’agam̃iṉe du. 25Aṉw’are jiriṉa pa myè intyagô n’intyagô s’inya agôm̃i m’impum̃’anay gw’itôve, nagô y’Israèl? ... 26Sambô rômbiṉaṉi Sikut, y’ôgi waṉi, ni Kijun, y’ikaṉi saṉi, ôgègèṉi w’anyambyè yaṉi w’avangiṉô ṉwè ikuṽi yaṉi! 27Na mi be kèndiza ṉwè ikôte gô ntye mori yi Damas, bulye Yeôva, are ini nyè ne Anyambyè y’imbèli.
നിലവിൽ തിരഞ്ഞെടുത്തിരിക്കുന്നു:
Amosi 5: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.