Amosi 2
2
1Yeṉo kambe Yeôva inè: G’ômwanja w’ibe tarô si Môab, na si nay kè, mi ze jôṉ’ivangi nyam̃, konde are peza pe pa y’ôga w’Edom g’ômbu. 2Mi be tôm̃’ôgôṉi gô Môab, ko wô pez’inagô s’aga si Keriyot; ni Môab e be juwa gô garegare y’edungu, gô garegare yi mbôgiṉa y’igoṽi na yi nyongolè y’ôrombo. 3Mi be jiliz’ôyèkèli avila gô gare ya yô, mi be jôṉ’ivangiṉi yè yôdu na yè, bulye Yeôva.
4Yeṉo kambe Yeôva inè: G’ômwanja w’ibe tarô si Yuda, na si nay kè, mi ze jôṉ’ivangi nyam̃, konde wi re pèdya p’ivanga nyi Yeôva, ko w’avenjavenj’isômbyi sè, konde wi re fwem̃izô pa ne ikaṉa s’inôka s’agangaṉôgô ne ireri saô. 5Mi be tôm̃’ôgôṉi gô Yuda, ko wô pez’inagô s’aga si Yerusalèm.
6Yeṉo kambe Yeôva inè: G’ômwanja w’ibe tarô s’Israèl, na si nay kè, mi ze jôṉ’ivangi nyam̃, konde wi re kôla p’ôma w’ôgôre g’ômwanja wi sika ya pupu, n’ôkuge g’ômwanja w’iwora nyi ntyôzô. 7Wi pègum̃a gô jeṉe ntyèngè yi ntye gô wônjô y’ikuge, ko waô tômb’ôgôre wa mongi wi re jela pa. Ômwaṉa ni rerè wi kènda gô sông’ômwaṉ’ômwantô mèmô, gô fweviz’ini nyam̃ ny’ôrunda. 8Wi dèwa pyèrè ni mbôry’edu yi jirô intyagô gw’ingoy si re pô pe puṉu, ko waô jonga gw’inagô s’inyambyè saô ivè nya mongi wi pa waô ôgara. 9Ndô sambô my’ayilizi mongi Amôre gw’azô maô, elôndwinyi z’avegagi ga ikum̃e, ni ngulu ga mbilinga; my’ayiliz’ilônda ya yô gw’igôṉô, n’iramba ya yô gô ntye. 10Ndô sambô my’agogunyi ṉwè avila gô ntye y’Egipt, ko mi kèndya ṉwè agôm̃i m’impum̃’anay gw’itôve, gô niviza ṉwè ntye ya mongi Amôre. 11N’aṉongunyi myè gôr’awaṉi waṉi ivogisi, na gôr’awanjo maṉi aṉôm̃e nazirea. Yi zele yeṉo, aṉwè awaṉa w’Israèl? bulye Yeôva ... 12N’aṉw’are panga pe nazirea gô jong’ivè, azômby’ivogisi inè: Avogaṉi! 13Vônaṉi, mi be nyigyanyigya ṉwè, ga nte nyigyanyigye ntye ntyôṉe yi re ralye n’ata. 14Ayè yi re javura e ze jolye gô fanga, ayè yi re ni ngulu e ze jolye gô jolize ngulu yè, n’ôma w’eṽèmba e ze jolye sungiṉ’em̃èṉo zè; 15ayè yi noz’elendiṉa e ze kum̃aṉe, ayè yi r’intyôzô javura e ze pere, n’ôma wi panda gô kavala e ze sungiṉ’em̃èṉo zè; 16ayè yi r’eṽèmba gôr’iṉweṉisi e be fanga tele gô ntyugu mèyoṉo, bulye Yeôva.
നിലവിൽ തിരഞ്ഞെടുത്തിരിക്കുന്നു:
Amosi 2: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.