Balevi 17
17
Kuzilikiwa kwa mukeza
1Nyambi ya Ngula wambile kuli Moshesha ngayi, 2“Tongweza Aloni na bana bendi na bantu nimwabo ba ishalela oku kufundiziza. 3Muntu nimwendi wa kaishalela ukukombelela ngombe hinge mbelele hinge mpongo mu munkungwa hinge kumukombelela ha munkanda wa munkungwa, 4na kubula kuyileta ku menginino a Ntanda ya Shikungulukilo kwinga ntupu kuli Nyambi ya Ngula, uli na mulandu wakuyita mukeza, kami kukahanganikiwa kwinga umo wa bantu ba Nyambi ufwako. 5Kutontoloka kwa kufundiziza kuno ngayi bantu ba Ishalela bakalehe kukombelelanga bimuna mu wande. Haya bakabaletenga tuhu kuli Nyambi ya Ngula kuli mukankombela ku menginino a Ntanda ya Shikungulukilo na kubakombelela kwinga zinkombela za kulilumikila. 6Mukankombela ukayitila mukeza ku zimbalila za kaala ku menginino a Ntanda ya Shikungulukilo na kuhokesha mazi, pe nkombela yiya yikaleta livumba liya likuwahililisha Nyambi ya Ngula. 7Bantu ba Ishalela bafwako kuka kombelelanga kuli Nyambi ya Ngula tuhu bimuna byabo, kwinga nkombela ku mayimbwe akufweka bampongo. Bantu ba Ishalela ba ku fwanina kulama kufundiziza oku ku bihemwinino byabo nimwabyo.
8“Kaishalela nimwendi hinge lipukwenda nimwendi, wekala mu shikungulukilo ou ukakombelela nkombela ya kuhokesha hinge nkombela nimwayo 9kwashenge na kubula kuyitila ku menginino a Ntanda ya Shikungulukilo kwinga nkombela kuli Nyambi ya Ngula, pe kukahanganikiwa kwinga umo wa bantu bendi ufwako.
10 #
Shit 9:4; Bal 7:26-27; 19:26; Nday 12:16, 23; 15:23. “Kaishalela nimwendi hinge lipukwenda nimwendi, wekala mu shikungulukilo ukulya nyama yili na mukeza, Nyambi ya Ngula ukamufutulukila, kami kukamuhanganikila kwinga umo waku bantu bendi ufwako. 11#Bah 9:22. Wumi wa byuma nimwabyo bya kuyoya uli mu mukeza, pe ngayi nisho shuma shiya Nyambi ya Ngula abatongwezele ngayi mukeza ukayitiwile ha kaala mu kuyelesha bantu ku wubi wabo. Mukeza niwo wenga wumi, ukwambwililisha kufumisha wubi wa bantu. 12Ngayi nisho kami shuma shiya Nyambi ya Ngula anatongweze bantu ba ishalela ngayi hinge nibo hinge lipukwenda wazika hakati kabo kukalya mukeza bafwako.
13“Kaishalela nimwendi, hinge lipukwenda nimwendi, wazika mu shikungulukilo ukuyomba kayamana hinge kubebula kayoni aka kanengi kakashe, uku fwanina kuyitila mukeza wako hanci na kubuwaho limvu, 14ndaba wumi wa byuma nimwabyo bya kuyoya uli mu mukeza. Nisho shuma shiya Nyambi atongwezele bantu ba ishalela ngayi kukalya mukeza mufwako, kami ngayi muntu nimwendi ou ukutenda noho kukahanganikiwa kami kwinga umo waku bantu bendi ufwako.
15“Muntu nimwendi wa Kaishalela, hinge lipukwenda nimwendi, ou wakulya nyama ya kayamana uya wakulifwila hinge wakuliwa ku tunzama twa lishaka, uku fwanina kuyowesha bivwalo byendi, kami ayowele na kutatilila kukuma ku mazolo noho aziluluke. 16Ndi kutenda noho ufwako ukalileyekamo niyemwine.”
Libuka Lya Kuyela © Bible Society of Zambia, 2020.