Balevi 16
16
Mutena wakukuliza
1Nyambi ya Ngula wambile kuli Moshesha oho bana ba Aloni babalume babili bafwakale, aba bakombelelele mundilo wa wubi kuli Nyambi ya Ngula. 2#Bah 6:19. Pe wambile ngayi, “Tongweza yayiyobe Aloni ngayi hinga ezanga ku nciza ya shibaamba mu Mwanya wa kuyela ha shikati shimo, ndaba ngayi nimo nikamonekelanga mu likumbi hayilu ya muhuko wa nceshe, ou uli hayilu ya Likwati lya Kulimama, kutina akafwa. 3#Bal 9:7. Aloni tuhu ukengina mu mwanya wa kuyela oho akaleta nkunzi wamushe wa ntupu ya ha wubi na shikungwe wa mbelele ha nkombela ya kuhokesha. 4Niho Nyambi ya Ngula afundizizile ndayano eze, oho Aloni shilolo engine mu Mwanya wa Kuyela, uku fwanina kuyowela na kuvwala bivwalo bya mukankombela, shivwalo sha likwiza lya kulelema lyambangubo, hamo na tuputula na mukunzi na kahoshi ka likwiza lya kuzenga ku mutwe.
5“Pe shikungulukilo sha Ishalela shikapana Aloni babikungwe ba bampongo babili ha ntupu ya ha wubi na shikungwe wa mbelele kwinga nkombela ya kuhokesha.
6“Pe ukakombelela nkunzi kwinga ntupu ya ha wubi na wubi wendi niyemwine na nou wa ba lupashi lwendi. 7Niho akashimba bampongo babili kutwala ku menginino aku Ntanda ya Shikungulukilo. 8Kuyo niko akakuna nyela ya kutendesha mamanya abili, limo lya kumangula ngayi, ‘Lya Nyambi ya Ngula’ lyamina kami ngayi, ‘Lya wa Azazele.’#16:8 Azazele: Lizu elye mu shihebelu lifwako kuyuvwanika shiwahe eshe likutontoloka, kampe likutontolola mayimbwe amu libelelengwa. 9Niho Aloni ukakombelela mpongo wakuhatiwa ku nyela kwinga ya Nyambi ya Ngula, kami ukamukombelela kwinga ntupu ya ha wubi. 10Ngoboni mpongo wakuhatiwa na nyela kwinga mpongo wa shihingo ukatwaliwa ku meho a Nyambi ya Ngula hayoya, pe ukatandiwila mu libelelengwa kwinga mpongo wa shihingo, wakwambwililisha bantu ku wubi wabo.
11“Aloni ukakombelela nkunzi kwinga ntupu ya ha wubi na wubi wendi niyemwine na nou wa ba lupashi lwendi. 12Pe ukashimba shinzoyo sha kukalila mundilo sha kwinzala na mashanga a mundilo aku kaala, kami maboko abili akwinzala a incence ya kutwa muhungahunga. Pe ukabitwala mu Mwanya wa Kuyela. 13Kuyo ku meho a Nyambi ya Ngula, ukayaka incence ha mundilo ngayi wishe uyo ukaholeke muhuko wa nceshe ou unafwiki Likwati lya Kulimama lili na wupaki wa Nyambi ya Ngula, kutina akafwa. 14Pe ukashimba mukeza umo wa nkunzi na kuwu myanzila hayilu ya muhuko wa nceshe na munwe wendi, pe kami na ku myanzilaho umo bikati mutanu na bibili kumbili ya Likwati lya Kulimama.
15 #
Bah 9:12. “Niho ukaziha mpongo waha ntupu ya ha wubi na kuleta mukeza wendi mu Mwanya wa Kuyela na kuwu myanzila ha muhuko wa nceshe, pe kami kumbili ya Likwati lya Kulimama ngonehe atendele na mukeza wa nkunzi. 16Muntendelo eye ukayelesha Mwanya wa Kuyela ndaba ya kubula kuyela kwa bantu ba Ishalela na kuluwa kwabo naku wubi wabo nimwawo, uku fwanina kutenda noho ku Ntanda ya Shikungulukilo, ndaba yili mukati ka munkungwa owe wuli mukati ka bantu bakubula kuyela. 17Ku balika ku shikati akwingina Aloni mu Mwanya wa Kuyela mukutenda shiheka sha kukuliza kaliha kukafwanina kwikala muntu mu Ntanda kumbili ya Nyambi ya Ngula, hantu unatutiki. Oho watendakale shiheka sha kukuliza niyemwine na ba lupashi lwendi na shikungulukilo nimwasho sha Ishalela, 18niho uku fwanina haya kututika ha munkanda ku kaala ka zinkombela za kuhokesha. Pe ukatenda shiheka sha kukuliza kaala. Ukafwanina kushimba mukeza umo wa nkunzi na mukeza umo wa mpongo na ku wu yaka ha mashengo aku zinkomi za kaala. 19Pe ukafwanina kumyanzilaho mukeza umo ha kaala na munwe wendi bikati mutanu na bibili. Mu ntendelo eye ukashiyelesha ku kubula kuyela kwa bantu ba ishalela na ku zilulula.
20“Oho ndi Aloni wamanishakale kutenda shiheka sha kukuliza Mwanya wa Kuyela na wingi wabya Ntanda ya shikungulukilo na kaala, ukatwala mpongo wamumi unahatiwili kwinga mpongo wa shihingo kuli Nyambi ya Ngula. 21Ukayaka maboko wendi wubili wawo ha mutwe wa mpongo uya wa shihingo na kulitabililaho kuluwa kwabo nimwako na wubi nimwawo na mafutufutu a bantu ba ishalela, pe Aloni ukabinungulwila ku mutwe wa nou mpongo, pe ukamutandila mu ngawungawu. 22Pe mpongo ukashimba wubi wa bantu nimwawo na kuwu twala mu ngawungawu, pe ukaleha mpongo ngayi akaliyile mu libelelengwa.
23 #
Ezek 44:19. “Niho Aloni ukaboka ku Ntanda ya Shikungulukilo na kuvwula shivwalo sha likwiza lya kulelema sha mukankombela shiya avwala oho enginanga mu Mwanya wa Kuyela na ku shishiya oho shilolo engine mu Ntanda. 24Uku fwanina kuyowelela mu mwanya umo washizila na kuvwala bivwalo byamina. Ha kumanisha, ukaya ku kaala oku akatenda nkombela ya kuhokesha ya kukuliza na kuliyelesha niyemwine nanobo bantu. 25Pe ukahokeshela mazi a shimuna wa ntupu ya ha wubi ha kaala.
26“Mulume ou watwala mpongo wa shihingo uku fwanina kuyowesha bivwalo byendi na kuyowela oho shilolo aboke ku munkungwa. 27#Bah 13:11. Nkunzi na mpongo baya batendeshiwa ku ntupu ya ha wubi, bamwine mukeza uya waletiwile mu Mwanya wa Kuyela mu kukuliza ku wubi, bakabatutwishila ha munkanda wa munkungwa na kubahokesha. Shitembe na nyama na wutoko nimwabyo bikahokeshiwe na mundilo. 28Muntu wakubihokesha uku fwanina kuyowesha bivwalo byendi na kuyowela oho shilolo aboke ku munkungwa.”
Kulama mutena wakukuliza
29 #
Bal 23:26-32; Kul 29:7-11. “Kufundiziza oku kukalamiwenga kubikati bikeza kumbili nimwabyo. Ha mutena wa likumi wa ngonda wa mutanu na zibili ba ishalela nimwabo na mapukwenda bazika hakati kabo ba ku fwanina kuzila byakulya na kubula kutenda mulimo umo, 30Ha mutena uyo shiheka shikatendiwa sha kumi kuliza ku wubi wenu nimwawo mu kumiyelesha pe mwanga mukenge ba kuyela. 31Mutena uyo ukenga mutena wakukatala, umo ou wakuzilanga kulya na kubula kutenda mulimo umo, oku kufundiziza kukalamiwenga kubikati bikeza kumbili nimwabyo. 32Mukulwane wa bakankombela nimwabo, ou nahenguliwi na kuzilikiwa mu kushwana tatiyendi, ukatenda shiheka sha kukuliza. Ukavwala bivwalo bya mukankombela bya likwiza lya kulelema, 33na kutenda mu kukuliza Mwanya wa Kuyela na mwanya nimwawo wa Ntanda ya Shikungulukilo na kaala na bakankombela na bantu nimwabo ba shikungulukilo. 34Oku kufundiziza ku kalamiwenga kubikati bikeza kumbili nimwabyo. Eshe shiheka shiku fwanina kutendiwa kamo ha mwaka mu kukuliza bantu ba ishalela ku wubi wabo nimwawo.”
Pe Moshesha watendele ngonehe amutongwezele Nyambi ya Ngula.
Libuka Lya Kuyela © Bible Society of Zambia, 2020.